AmaNani 1 - iBhayibhili Elingcwele 1978

Ukubalwa kwabakoIsrayeli eSinayi

¹ INkosi yakhuluma kuMose enkangala yaseSinayi ethenteni lokuhlangana, ngosuku lokuqala lwenyanga yesibili, ngomnyaka wesibili emva kokuphuma kwabo eGibithe, yathi:

² Balani inani lebandla lonke labakoIsrayeli ngensendo zabo langezindlu zaboyise, lilobe amabizo abo bonke abesilisa ngamunye ngamunye.

³ Bonke abakoIsrayeli abaleminyaka engamatshumi amabili lengaphezulu, abangaphuma impi, wena loAroni lizakubabala ngamabandla abo.

⁴ Thathani kuleso lalesosizwe indoda eyodwa, eyinhloko yendlu, ilisize.

⁵ Nanka amabizo amadoda azakulisiza. KoRubeni: uElizuri indodana kaShedewuri.

⁶ KoSimeyoni: uShelumiyeli indodana kaZurishadayi.

⁷ KoJuda: uNashoni indodana kaAminadaba.

⁸ KoIsakari: uNethaneli indodana kaZuwari.

⁹ KoZebuluni: uEliyabi indodana kaHeloni.

¹⁰ Kubantwana bakaJosefa, koEfrayimi: uElishama indodana kaAmihudi; koManase; uGamaliyeli indodana kaPedazuri.

¹¹ KoBenjamini: uAbidani indodana kaGideyoni.

¹² KoDani: uAhiyezeri indodana kaAmishadayi.

¹³ KoAsheri: uPagiyeli indodana kaOkirani.

¹⁴ KoGadi: uEliyasafi indodana kaDehuweli.

¹⁵ KoNafitali: uAhira indodana kaEnani.

¹⁶ Yibo abakhethwa ebandleni, beyizikhulu zezizwe zabokhokho babo lezinhloko zensendo zabo.

¹⁷ UMose loAroni basebethatha lawomadoda akhethiweyo.

¹⁸ Ngosuku lokuqala lwenyanga yesibili bahlanganisa lonke ibandla; abantu batsho ukuthi ngobani okhokho babo ngensendo zabo langezindlu zaboyise; kwabhalwa amabizo abo bonke abaleminyaka engamatshumi amabili lengaphezulu.

¹⁹ Njengokulaya kweNkosi uMose wababala enkangala yaseSinayi.

²⁰ Lapho abantu bakoRubeni, izibulo likaIsrayeli, bebalwa ngezizukulwana zabo langensendo zabo langezindlu zaboyise, kwagwalwa wonke amabizo abesilisa abaleminyaka engamatshumi amabili lengaphezulu, abangaphuma impi;

²¹ inani labo esizweni sakoRubeni lalizinkulungwane ezingamatshumi amane lesithupha, lamakhulu amahlanu.

²² Lapho abantu bakoSimeyoni bebalwa ngezizukulwana zabo langensendo zabo langezindlu zaboyise, kwagwalwa wonke amabizo abesilisa abaleminyaka engamatshumi amabili lengaphezulu, abangaphuma impi.

²³ Inani labo esizweni sakoSimeyoni lalizinkulungwane ezingamatshumi amahlanu lesificamunwemunye, lamakhulu amathathu.

²⁴ Lapho abantu bakoGadi bebalwa ngezizukulwana zabo langensendo zabo langezindlu zaboyise, kwagwalwa wonke amabizo abesilisa abaleminyaka engamatshumi amabili lengaphezulu, abangaphuma impi;

²⁵ inani labo esizweni sakoGadi lalizinkulungwane ezingamatshumi amane lanhlanu, lamakhulu ayisithupha, lamatshumi amahlanu.

²⁶ Lapho abantu bakoJuda bebalwa ngezizukulwana zabo langensendo zabo langezindlu zaboyise, kwagwalwa wonke amabizo abesilisa abaleminyaka engamatshumi amabili lengaphezulu, abangaphuma impi;

²⁷ inani labo esizweni sakoJuda lalizinkulungwane ezingamatshumi ayisikhombisa lane, lamakhulu ayisithupha.

²⁸ Lapho abantu bakoIsakari bebalwa ngezizukulwana zabo langensendo zabo langezindlu zaboyise, kwagwalwa wonke amabizo abesilisa abaleminyaka engamatshumi amabili lengaphezulu, abangaphuma impi;

²⁹ inani labo esizweni sakoIsakari lalizinkulungwane ezingamatshumi amahlanu lane, lamakhulu amane.

³⁰ Lapho abantu bakoZebuluni bebalwa ngezizukulwana zabo langensendo zabo langezindlu zaboyise, kwagwalwa wonke amabizo abesilisa abaleminyaka engamatshumi amabili lengaphezulu, abangaphuma impi;

³¹ inani labo esizweni sakoZebuluni lalizinkulungwane ezingamatshumi amahlanu lesikhombisa, lamakhulu amane.

³² Lapho abantu bakoJosefa, ngitsho abantu bakoEfrayimi, bebalwa ngezizukulwana zabo langensendo zabo langezindlu zaboyise, kwagwalwa wonke amabizo abesilisa abaleminyaka engamatshumi amabili lengaphezulu, abangaphuma impi;

³³ inani labo esizweni sakoEfrayimi lalizinkulungwane ezingamatshumi amane lamakhulu amahlanu.

³⁴ Lapho abantu bakoManase bebalwa ngezizukulwana zabo langensendo zabo langezindlu zaboyise, kwagwalwa wonke amabizo abesilisa abaleminyaka engamatshumi amabili lengaphezulu, abangaphuma impi;

³⁵ inani labo esizweni sakoManase lalizinkulungwane ezingamatshumi amathathu lambili, lamakhulu amabili.

³⁶ Lapho abantu bakoBenjamini bebalwa ngezizukulwana zabo langensendo zabo langezindlu zaboyise, kwagwalwa wonke amabizo abesilisa abaleminyaka engamatshumi amabili lengaphezulu, abangaphuma impi;

³⁷ inani labo esizweni sakoBenjamini lalizinkulungwane ezingamatshumi amathathu lanhlanu, lamakhulu amane.

³⁸ Lapho abantu bakoDani bebalwa ngezizukulwana zabo langensendo zabo langezindlu zaboyise, kwagwalwa wonke amabizo abesilisa abaleminyaka engamatshumi amabili lengaphezulu, abangaphuma impi;

³⁹ inani labo esizweni sakoDani lalizinkulungwane ezingamatshumi ayisithupha lambili, lamakhulu ayisikhombisa.

⁴⁰ Lapho abantu bakoAsheri bebalwa ngezizukulwana zabo langensendo zabo langezindlu zaboyise, kwagwalwa wonke amabizo abesilisa abaleminyaka engamatshumi amabili lengaphezulu, abangaphuma impi;

⁴¹ inani labo esizweni sakoAsheri lalizinkulungwane ezingamatshumi amane lanye, lamakhulu amahlanu.

⁴² Lapho abantu bakoNafitali bebalwa ngezizukulwana zabo langensendo zabo langezindlu zaboyise, kwagwalwa wonke amabizo abesilisa abaleminyaka engamatshumi amabili lengaphezulu, abangaphumi impi;

⁴³ inani labo esizweni sakoNafitali lalizinkulungwane ezingamatshumi amahlanu lantathu, lamakhulu amane.

⁴⁴ Yibo labo ababalwa nguMose loAroni besizwa yizikhulu zakoIsrayeli ezilitshumi lambili, yileso laleso isikhulu simele isizwe.

⁴⁵ Kwabalwa bonke abakoIsrayeli abaleminyaka engamatshumi amabili lengaphezulu, abangaphuma impi, ngezindlu zaboyise;

⁴⁶ babezinkulungwane ezingamakhulu ayisithupha lantathu, lamakhulu amahlanu, lamatshumi amahlanu.

⁴⁷ Kodwake amaLevi kawabalwanga ngezindlu zabokhokho bawo.

AmaLevi azakukhonza eTabernakeleni

⁴⁸ INkosi yathi kuMose:

⁴⁹ Isizwe sakoLevi ungasibali, futhi ungabali inani laso phakathi kwabantu bakoIsrayeli;

⁵⁰ kodwa abeke amaLevi ukukhonza eTabernakeleni lobufakazi, lokulondoloza yonke impahla yalo lakho konke okwalo. Azathwala iTabernakeli layo yonke impahla yalo, alilondoloze, amise amathente awo ukuze alizingelezele.

⁵¹ Ekusukeni kweTabernakeli amaLevi azakulidiliza, njalo ekumisweni kwalo amaLevi alimise. Uba kusondela kulo omunye umuntu, uzakubulawa.

⁵² Abantu bakoIsrayeli bazakumisa amathente abo ngamabandla abo, kube yilabo lalabo ezihonqweni zakhe, ngaphansi kophawu lwakhe.

⁵³ Kodwa amaLevi azakumisa amathente awo alizingelezele iTabernakeli lobufakazi, ukuba kungehleli ulaka lukaNkulunkulu phezu kwalo lonke ibandla lakoIsrayeli; amaLevi azakulondoloza iTabernakeli.

⁵⁴ Abantu bakoIsrayeli benza njalo njengakho konke iNkosi eyayimlaye khona uMose.