AmaHubo 66 - iBhayibhili Elingcwele 1978

Ukumdumisa uNkulunkulu lokumbonga

¹ Mhubeleni ngokuthokoza uNkulunkulu, mhlaba wonke;

² hlabelani ngodumo lwebizo lakhe, libabaze ukudunyiswa kwakhe.

³ Tshonini kuNkulunkulu lithi: Yeka ukwesabeka kwezenzo zakho! Ngenxa yobukhulu bamandla akho izitha zakho ziyaququbala phambi kwakho.

⁴ Umhlaba wonke uyakukhonza, uhlabela izibongo zakho, uhlabela ukubonga ibizo lakho.

⁵ Wozani libone izenzo zikaNkulunkulu; kuyesabeka ukwenza kwakhe phakathi kwabantu.

⁶ Ulwandle waluphendula lwaba ngumhlaba owomileyo, abantu bawela umfula ngenyawo. Lapho sathokoza kuye.

⁷ Ubusa ngamandla akhe kuze kube nininini, omehlo akhe ayazilinda izizwe; abalenkani kabangaziphakamisi.

⁸ Bongani uNkulunkulu lina zizwe, lizwakalise ukudunyiswa kwakhe,

⁹ yena osilondoloze phakathi kwabaphilayo, ongavumanga ukuba inyawo zethu zitshelele.

¹⁰ Ngoba wena, Nkulunkulu, usihlolile, wasihlola njengesiliva.

¹¹ Wasingenisa embuleni, wabeka imithwalo enzima emihlana yethu,

¹² wavumela abantu ukukhwela phezu kwamakhanda ethu; sadabula phakathi komlilo lamanzi, kodwa wasiletha endaweni ebanzi.

¹³ Ngizakungena endlini yakho ngileminikelo yokutshiswa, ngizakugcwalisa kuwe izifungo zami,

¹⁴ ezakhulunywa ngomlomo wami, zathenjiswa ngomlomo wami ngisekuhluphekeni.

¹⁵ Ngizakunikela kuwe iminikelo yokutshiswa yezinonileyo, kanye lephunga lomnikelo wezinqama; ngizakunikela umnikelo wezinkunzi lezimbuzi.

¹⁶ Wozani lizwe lina lonke elimesabayo uNkulunkulu, ngizakulitshela lokho angenzele khona.

¹⁷ Ngakhala kuye, ngamdumisa ngolimi lwami.

¹⁸ Uba bengiqonde ububi enhliziyweni yami, ibingayikuzwa iNkosi.

¹⁹ Impela uNkulunkulu ungizwile, walalela ilizwi lomkhuleko wami.

²⁰ Kabongwe uNkulunkulu, ngoba kawalanga umkhuleko wami, futhi kalususanga kimi uthando lwakhe olungapheliyo.