AmaHubo 65 - iBhayibhili Elingcwele 1978

Ukubonga izipho zikaNkulunkulu

¹ Sifanele ukukudumisa, wena Nkulunkulu, eZiyone, lezifungo zenziwe kuwe.

² Wena ozwayo imikhuleko bazakuza kuwe abantu bonke,

³ ngenxa yezono. Lapho iziphambeko zethu zisahlula, uyasithethelela.

⁴ Ubusisiwe omkhethayo wena, omsondezayo ukuba ahlale emagumeni akho. Sizakusutha ngokuhle kwendlu yakho, ithempeli lakho elingcwele.

⁵ Ngezenzo ezesabekayo uyasiphendula, usikhulule, Nkulunkulu ongumsizi wethu, wena olithemba labantu bomhlaba wonke, lelabantu abahlala ngaphetsheya kolwandle olukhatshana,

⁶ wena omisa izintaba ngamandla akho, owambethe amandla;

⁷ uthulisa ukuduma kwezinlwandle, lenhlokomo yamavinqo azo; lokuxokozela kwabantu,

⁸ ukuze abakhileyo emikhawulweni yomhlaba besabe izibonakaliso zakho; wenza abahlala empumalanga lasentshonalanga bathokoze kakhulu.

⁹ Uyahambela umhlaba uwunethise ngezulu, uwuvundise kakhulu; imifula kaNkulunkulu igcwele amanzi; uyabalungisela abantu ukudla. Uwulungisa ngokunjalo umhlaba,

¹⁰ uyathelela imisele yawo, ulalise imigelo yawo, uyithambise ngezihlambo, ubusise ukumila kwawo.

¹¹ Uyaphelelisa umnyaka ngokuphana kwakho; izindlela zakho zigcwele okunengi.

¹² Amadlelo eganga agcwele, lezintaba zambethe ukuthokoza.

¹³ Amadlelo agcwele izimvu, lezigodi zisitshekelwe ngamabele; konke kuyajabula kakhulu, kuhlabele.