AmaHubo 58 - iBhayibhili Elingcwele 1978

Ukucela ukuba ababi bachithwe

¹ Imbala liyahlulela ngokulungileyo lina bakhulu na? Liyabahlulela abantu ngeqiniso na?

² Ingani enhliziyweni zenu lithama okubi, lezandla zenu zenza okubi emhlabeni.

³ Ababi balahleka kusukela esiswini, bayaphambuka kusukela ekuzalweni kwabo, beqamba amanga.

⁴ Ubuhlungu babo bunjengobuhlungu benyoka, banjengebululu elingezwayo, elivimba indlebe zalo,

⁵ ukuze lingezwa ilizwi lezinyanga ezilumba amalumbo ngokuhlakanipha.

⁶ Nkulunkulu, yaphula amazinyo omlomo wabo, uphohloze amazinyo emihlathi yezilwane, Nkosi.

⁷ Kabanyamalale njengamanzi agelezayo; njengotshani kabanyathelwe phansi babune.

⁸ Kababe njengomnenke oncibilika uphele; kababe njengomphunzo ongasoze ubone ilanga.

⁹ Imbiza zenu zingakafudumali ngomlilo wameva aluhlaza ingabe avuthayo, uzakubaphephula bona.

¹⁰ Olungileyo uzakuthokoza lapho ebona impindiselo, uzakugezisa inyawo zakhe egazini lababi.

¹¹ Abantu bazakuthi: Impela ukhona umvuzo wolungileyo, impela ukhona uNkulunkulu owahlulela umhlaba.