AmaHubo 115 - iBhayibhili Elingcwele 1978

Udumo kalube eNkosini yodwa

¹ Kakungabi yithi, Nkosi, kakungabi yithi, kodwa kakube libizo lakho elinikwa udumo, ngenxa yothando lwakho olungapheliyo lobuqotho bakho.

² Izizwe zizakutsho ngani ukuthi: Ungaphi uNkulunkulu wabo na?

³ Owethu uNkulunkulu usezulwini, wenza konke akuthandayo.

⁴ Izithombe zabo ngezesiliva legolide, umsebenzi wezandla zabantu.

⁵ Imilomo zilayo, kodwa kazikhulumi; lamehlo zilawo, kodwa kaziboni;

⁶ zilendlebe, kodwa kazizwa; impumulo zilayo, kodwa kazinuki.

⁷ Zilezandla, kodwa kaziphathi; lenyawo zilazo, kodwa kazihambi; kazikhulumi.

⁸ Abazenzayo bafana lazo, kanye labo bonke abathemba kuzo.

⁹ Israyeli, themba eNkosini. Yona ilusizo lwakho lesihlangu sakho.

¹⁰ Wena ndlu kaAroni, themba eNkosini. Yona ilusizo lwakho lesihlangu sakho.

¹¹ Lina elesaba iNkosi, thembani eNkosini. Yona ilusizo lwenu lesihlangu senu.

¹² INkosi isikhumbule, izakusibusisa; izakubusisa indlu kaIsrayeli, ibusise indlu kaAroni;

¹³ izakubusisa labo bonke abayesabayo, abancinyane labakhulu.

¹⁴ INkosi kayilandise lina labantwana benu;

¹⁵ kalibe ngababusisiweyo yiNkosi eyenza izulu lomhlaba.

¹⁶ Amazulu ngaweNkosi, kodwa umhlaba iwunikile abantu.

¹⁷ Abafileyo kabayidumisi iNkosi, kakho loyedwa wabo abehlela elizweni labafileyo oyidumisayo.

¹⁸ Kodwa thina sizakuyibonga iNkosi kusukela kulesisikhathi kuze kube nininini. Dumisani iNkosi!