AmaHebheru 5 - iBhayibhili Elingcwele 1978

¹ Ngoba ilowo lalowo umpristi omkhulu okhethwa ebantwini umiselwa abantu ezintweni zikaNkulunkulu, ukuze anikele izipho lemihlatshelo ngenxa yezono;

² angababekezelela abangaziyo labaduhayo, lokhu laye ephethwe yibuthakathaka;

³ ngenxa yalokhu kufanele ukuba, njengalokhu enikelela izono zabantu, anikelele lezakhe.

⁴ Kakulamuntu ozithathela lesisikhundla, kodwa ubizelwa kuso nguNkulunkulu njengoAroni.

⁵ Ngokunjalo loKristu kaziphakamisanga yena aze abe ngumpristi omkhulu, kodwa wamiswa yilowo owathi kuye: Wena uyiNdodana yami, lamuhla ngikuzele.

⁶ Njengokuba esitsho futhi kwenye indawo ukuthi: Wena ungumpristi kuze kube nini lanini ngokwendlela kaMelkizedeki.

⁷ Ensukwini zokuphila kwakhe uJesu wakhuleka, enxusa ngokukhala okukhulu langezinyembezi kuye olamandla okumkhulula ekufeni; wezwiwa ngenxa yokwesaba kwakhe uNkulunkulu.

⁸ Loba eyiNdodana, wafunda ukulalela ngalokho ahlupheka ngakho;

⁹ lapho esephelelisiwe waba ngumthombo wokusiliswa okungapheliyo kibo bonke abamlalelayo,

¹⁰ ebizwa nguNkulunkulu ngokuthi ungumpristi omkhulu ngokwendlela kaMelkizedeki.

¹¹ Silokunengi esingakutsho ngalokhu okulukhuni ukulichasisela, lokhu selaba buthundu enhliziyweni.

¹² Ngoba ngalesisikhathi beselifanele ukuba ngabafundisi; kodwa lisadinga futhi ukuba kube khona olifundisayo iziqalo zezifundiso zelizwi likaNkulunkulu. Lifanele uchago, kungesikho ukudla okuqinileyo.

¹³ Lowo odla uchago kakazi lutho ngezinto zokulunga, ngoba useyingane.

¹⁴ Kodwa ukudla okuqinileyo kungokwabo abakhulileyo, asebejwayele ukusebenzisa ingqondo zabo, asebelakho ukwahlukanisa okuhle kokubi.