AmaHebheru 11 - iBhayibhili Elingcwele 1978

Amaqhawe okukholwa

¹ Ukukholwake kuyikuqiniseka ngezinto ezithenjiweyo, kuliqiniso ngezinto ezingabonwayo.

² Abendulo bafakazelwa ngakho emibhalweni.

³ Ngokukholwa sibona ukuthi umhlaba wenziwa ngelizwi likaNkulunkulu, kuze kuthi okubonwayo kwavela kokungabonwayo.

⁴ Ngokukholwa uAbela wanikela kuNkulunkulu umhlatshelo owamukelekayo kulokaKayini, wazuza ngakho ubufakazi bokuthi ulungile, uNkulunkulu uqobo emfakazela ngokwamukela iziphiwo zakhe; langokukholwa usakhuluma, loba esefile.

⁵ Ngokukholwa uEnoki wathathwa ukuze angezwa ukufa; kabe esafunyanwa, ngoba uNkulunkulu wayesemthethe; engakathathwa wafakazelwa ngokuthi umthokozisile uNkulunkulu;

⁶ ngaphandle kokukholwa kakwenzeki ukumthokozisa; ngoba ozayo kuNkulunkulu umele ukukholwa ukuthi ukhona lokuthi uyabanika umvuzo labo abamdingayo.

⁷ Ngokukholwa uNowa exwayisiwe nguNkulunkulu ngezinto ebezingakabonwa wakha umkolo wokusilisa indlu yakhe; wawulahla umhlaba ngokukholwa, waba yindlalifa yokulunga okuvela ngokukholwa.

⁸ Ngokukholwa uAbrahama walalela ebizwa ukuba asuke aye endaweni ayezakuyinikwa ibe yilifa lakhe; waphuma engazi lapho aya khona.

⁹ Ngokukholwa wahlala njengomuntu wezizweni elizweni lokuthenjiswa, ehlala emathenteni loIsaka loJakobe ababeyizindlalifa kanye laye zalesosithembiso;

¹⁰ ngoba wayelindele umuzi olezisekelo eziqinileyo, owakhiwa wenziwa nguNkulunkulu.

¹¹ Ngokukholwa laye uSara uqobo wazuza amandla okuthatha isisu eseluphele, ngoba wathi uthembekile lowo owathembisayo.

¹² Ngakhoke kwavela koyedwa, laye esenjengosewafa, abangangezinkanyezi zezulu ngobunengi, langangesihlabathi esisokhunjini lolwandle esingelakubalwa.

¹³ Bonke laba bafela ekukholweni, bengamukeliswanga okwathenjiswayo, kodwa bakubonela khatshana, bakuthakazelela, bavuma ukuthi bangabezizwe lezihambi emhlabeni.

¹⁴ Ngoba abatsho njalo batshengisa ukuba badinga ilizwe lakibo.

¹⁵ Uba kambe babecabanga ngalelolizwe ababesuke kulo, babelalo ithuba lokubuyela kulo;

¹⁶ kodwake bafisa ilizwe elihle kulalelo okutsho elasezulwini. Ngakhoke uNkulunkulu kalanhloni ngokuthiwa nguNkulunkulu wabo, ngoba ubalungisele umuzi.

¹⁷ Ngokukholwa uAbrahama lapho ehlolwa wanikela ngoIsaka, yebo, yena owayenikwe isithembiso, wavuma ukunikela ngendodana yakhe eyodwa,

¹⁸ okwakuthiwe ngayo: Inzalo yakho izakubizwa ngoIsaka.

¹⁹ Ngoba wathi uNkulunkulu ulamandla okuvusa abantu ekufeni, ngokulinganisa wabuya wayizuza isivela kwabafileyo.

²⁰ Ngokukholwa uIsaka wabusisa uJakobe loEsawu ngezinto ebezizakuza.

²¹ Ngokukholwa uJakobe esezakufa wabusisa lowo lalowo wamadodana kaJosefa, wakhuleka ebambelele ngodondolo lwakhe.

²² Ngokukholwa uJosefa esezakufa wakhuluma ngokuphuma kwabakoIsrayeli, walayezela ngokungcwatshwa kwamathambo akhe.

²³ Ngokukholwa uMose esezelwe wafihlwa ngabazali bakhe inyanga ezintathu, ngoba bembona engumntwana omuhle, bengawesabi umthetho wenkosi.

²⁴ Ngokukholwa uMose esekhulile wala ukuthiwa uyindodana yendodakazi kaFaro;

²⁵ wakhetha ukuphathwa kubi kanye labantu bakaNkulunkulu kulokuba athokoze isikhatshana esonweni.

²⁶ Wathi ukuthukwa ngenxa yoGcotshiweyo kuyinotho enkulu kulamagugu aseGibithe, ngoba wayekhangele umvuzo.

²⁷ Ngokukholwa wasuka eGibithe, engalwesabi ulaka lwenkosi; ngoba waqinisela kungathi uyambona uNkulunkulu ongabonwayo.

²⁸ Ngokukholwa wamisa iPhasika efafaza igazi, ukuze umbhubhisi wamazibulo angawathinti amazibulo akoIsrayeli.

²⁹ Ngokukholwa abakoIsrayeli badabula uLwandle oluBomvu kungathi kusemhlabathini owomileyo, okwathi abaseGibithe bekulinga lokho, baminzwa.

³⁰ Ngokukholwa imiduli yaseJeriko yadilika, isibhodiwe insuku eziyisikhombisa.

³¹ Ngokukholwa uRahabi iwule kabhubhanga kanye labangalalelanga, ngoba wazamukela izinhloli.

³² Ngisezakuthini na? Ngoba ngingaphelelwa yisikhathi uba ngilandisa ngoGidiyoni, loBaraki, loSamsoni, loJefta, langoDavida langoSamuweli, langabaprofethi,

³³ abathi ngokukholwa banqoba imibuso, basebenza ukulunga, bazuza izithembiso, bavimba imilomo yezilwane,

³⁴ bacima umlilo ovuthayo, baphepha emkhontweni, bazuza amandla ebuthakathakeni, baba ngamaqhawe empini, baxotsha izimpi zabezizwe.

³⁵ Abesifazana bamukeliswa abafileyo babo sebevusiwe ekufeni. Abanye bazwiswa ubuhlungu, bengavumi ukukhululwa, ukuze bazuze ukuvuka okuhle.

³⁶ Abanye benziwa inhlekisa batshaywa, babotshwa ngamaketane, bafakwa entolongweni;

³⁷ bakhandwa ngamatshe, baqunywa ngesaha, babulawa ngomkhonto, bahamba bembethe izigogo zezimvu lezezimbuzi, baswela, bazwiswa ubuhlungu, baphathwa kubi,

³⁸ umhlaba ungabafanele bona, bazula enkangala lasezintabeni, emihomeni lasezimbalwini zomhlaba.

³⁹ Bonke labo, lanxa babefakazelwe ngokukholwa, kabakuzuzanga okwathenjiswayo,

⁴⁰ lokhu uNkulunkulu wayesibonele thina okuhle kulalokho, ukuze kuthi ngaphandle kwethu bangapheleliswa.