AbaseRoma 8 - iBhayibhili Elingcwele 1978

Ukuphila okungoMoya

¹ Ngakhoke kakusekho ukulahlwa kibo abakuKristu Jesu.

² Ngoba kuKristu Jesu umlayo woMoya ophilisayo ungikhulule emlayweni wesono lowokufa.

³ UNkulunkulu ukwenzile lokho okwahlula umlayo, ngoba umlayo waba buthakathaka ngenxa yesimo somuntu; ngokuthuma iNdodana yakhe ilesimo esifana lesomuntu esibi, ibe ngumhlatshelo wesono, walahla isono kulesosimo,

⁴ ukuze lokho okwamiswa ngomlayo kugcwaliseke kithi, esingahambi ngokwabantu kodwa esihamba ngokukaMoya.

⁵ Ngoba bona abokwabantu banakana ngezinto zokwabantu; kodwa abakaMoya banakana ngezinto zikaMoya.

⁶ Ukunakana ngokwabantu kuyikufa; kodwa ukunakana ngoMoya kuyikuphila lokuthula.

⁷ Ngoba ukunakana ngezinto zokwabantu kuyibutha kuNkulunkulu; kakuzehliseli ngaphansi komlayo kaNkulunkulu; impela kungekwenze;

⁸ abaphila ngokwabantu bangemthokozise uNkulunkulu.

⁹ Kodwa lina kaliphili ngokwabantu; likuMoya, uba phela uMoya kaNkulunkulu ehlala kini; uba umuntu engelaye uMoya kaKristu, lowo kasuye owakhe.

¹⁰ Kodwa uba uKristu ekini, lanxa umzimba usufile ngenxa yesono, umoya uyikuphila ngenxa yokulunga.

¹¹ Uba uMoya walowo owavusa uJesu kwabafileyo ehlala kini, yena owavusa uKristu Jesu kwabafileyo uzakuphilisa lemizimba yenu efayo ngoMoya wakhe ohlala kini.

¹² Ngakhoke, bazalwane, kasilamlandu wokuba sihambe ngokwabantu.

¹³ Ngoba uba lihamba ngokwabantu, lizakufa; kodwa uba libulala imisebenzi yomzimba ngoMoya, lizakuphila.

¹⁴ Ngoba bonke abaholwa nguMoya kaNkulunkulu bangabantwana bakaNkulunkulu.

¹⁵ Kalamukeliswanga umoya wobugqili ukuba libuye lesabe, kodwa lamukeliswa umoya wobuntwana, esimemeza ngawo sisithi: Aba, Baba!

¹⁶ Ngalokhuke nguMoya kaNkulunkulu uqobo ofakaza kanye lomoya wethu ukuthi singabantwana bakaNkulunkulu;

¹⁷ uba singabantwana, siyizindlalifa futhi, izindlalifa zikaNkulunkulu lezindlalifa kanye loKristu, uba phela sihlupheka kanye laye ukuze sidunyiswe kanye laye.

Ukungena enkazimulweni emva kwezinhlupheko

¹⁸ Ngithi inhlupheko zalesisikhathi kazilakulinganiswa lenkazimulo ezakwambulwa kithi.

¹⁹ Ngoba okudaliweyo kulindele ngokulangatha okukhulu ukwambulwa kwabantwana bakaNkulunkulu.

²⁰ Okudaliweyo kwehliselwa ngaphansi kobuze, kungesikho ngokwentando yakho, kodwa ngentando yalowo owakwehliselayo; kanti kukhona ithemba

²¹ lokuthi lokho okudaliweyo kuzakukhululwa ebugqilini bokubhubha, kuzuze inkululeko lenkazimulo yabantwana bakaNkulunkulu.

²² Siyazi ukuthi konke okudaliweyo kuyabubula kanyekanye, kuyahelelwa kuze kube khathesi.

²³ Kakusikho okudaliweyo kuphela, kodwa lathi uqobo lwethu esinikwe ingqabutho zikaMoya, siyabubula ngaphakathi kwethu, silindele ukwamukelwa sibe ngabantwana bakaNkulunkulu lokukhululwa kwemizimba yethu.

²⁴ Ethembeni leli sisilisiwe. Kodwa ithemba elibonwayo kayisilo ithemba; ngoba ngubani othemba lokho akubonayo na?

²⁵ Kodwa uba sithemba lokho esingakuboniyo, sikulindela ngokubekezela.

²⁶ Ngokunjalo loMoya uyasisiza ebuthakathakeni bethu; ngoba kasikwazi ukukhuleka njengokufaneleyo, kodwa uMoya uqobo usikhulekela ngokububula okungelakuphumisela.

²⁷ LoNkulunkulu ohlola inhliziyo uyayazi ingqondo kaMoya, ngoba uMoya ukhulekela abangcwele ngokwentando kaNkulunkulu.

²⁸ Siyazi ukuthi kukho konke usebenza okuhle lalabo abamthandayo uNkulunkulu, ababiziweyo ngokwecebo lakhe.

²⁹ Ngoba labo uNkulunkulu abazi ngaphambili, wabamisa ngaphambili ukuba bafane lesimo seNdodana yakhe, ukuze yona ibe lizibulo phakathi kwabazalwane abanengi;

³⁰ labo abamisayo ngaphambili wababiza futhi; labo ababizayo ubalungisisile futhi; labo abalungisisayo ubaphile inkazimulo.

Ukuqiniswa kothando lukaNkulunkulu

³¹ Phoke, sizakuthini ngalokhu na? Uba uNkulunkulu engakithi, ngubani ongamelana lathi na?

³² Yena ongayigodlanga eyakhe iNdodana, kodwa wayinikelela thina sonke, angehluleka kanjani ukusinika konke kanye layo na?

³³ Ngubani ozakubabeka icala abakhethiweyo na? NguNkulunkulu olungisisayo;

³⁴ ngubani obalahlayo? NguKristu Jesu owafayo, owavuswa kwabafileyo, ongakwesokunene sikaNkulunkulu losikhulekelayo.

³⁵ Kuyini okuzakusahlukanisa lothando lukaKristu na? Yikuhlupheka, losizi, lokuzingelwa, lendlala, lokuhambaze, lengozi loba umkhonto na?

³⁶ Kulotshiwe ukuthi: Ngenxa yakho siyabulawa usuku lonke, kuthiwa siyizimvu zokuhlatshwa.

³⁷ Kodwa kulokhu konke silokunqoba okukhulu ngaye owasithandayo.

³⁸ Ngoba ngileqiniso ukuthi kasikho ukufa, lokusila, lezithunywa, lababusi, lezinto ezikhona lezinto ezizayo, lamandla,

³⁹ lokudepha, lokutshona, lakho konke okudaliweyo okuzakuba lamandla okusahlukanisa lothando lukaNkulunkulu olukuKristu Jesu, iNkosi yethu.