Abahluleli 14 - iBhayibhili Elingcwele 1978

USamsoni lowesifazana waseTimina

¹ USamsoni waya eTimina, wabona khona enye yezintombi zamaFilistiya.

² Wasebuya ukutshela uyise lonina wathi: Ngibone enye yezintombi zamaFilistiya eTimina. Ake lingizuzele yona ibe ngumkami.

³ Kodwa uyise lonina bathi: Kakulantombi yini phakathi kwezihlobo zakho laphakathi kwabo bonke abakithi ukuba uyethatha umfazi kumaFilistiya angasokanga na? Kodwa uSamsoni wathi kuyise: Ngithathele yena ngoba ngiyamthanda.

⁴ Uyise lonina babengazi ukuba lokho kuvela eNkosini eyayifuna ithuba lokulwa lamaFilistiya ayebabusa abakoIsrayeli ngalesosikhathi.

⁵ USamsoni wasehamba esiya eTimina, wafika ezivinini zakhona; wabona isilwane sisiza kuye sibhonga.

⁶ Umoya kaNkulunkulu wehlela ngamandla phezu kwakhe; wasidabula isilwane ngezandla zakhe njengomuntu edabula izinyane. Kodwa kabatshelanga oyise lonina lokho akwenzileyo.

⁷ Wasesiya ukukhuluma lowesifazana, wamthanda kakhulu.

⁸ Ngemva kwesikhathi wabuyela ukuyamthatha abe ngumkakhe; waphambuka ukuba abone isidumbu sesilwane, wafumanisa inyosi esidunjini sesilwane kanye loluju.

⁹ Wazithapha ngezandla zakhe, wadlula, wahamba esidla, wafika kuyise lonina, wabanika ezinye, badla. Kodwa kabatshelanga ukuthi wayethaphe inyosi esidunjini sesilwane.

¹⁰ Uyise wayibona intombi, loSamsoni wenza idili khona, ngoba zazisenza njalo insizwa.

¹¹ Kwathi lapho abantu bembona bamlethela abanakwabo abangamatshumi amathathu ukuba bahlale laye.

¹² USamsoni wathi kibo: Ake ngililibhe, uba lingangitshela ukuthi kuyini ensukwini eziyisikhombisa zedili, likufumane, ngizalinika izambatho zelembu elihle ezingamatshumi amathathu lengubo ezintsha ezingamatshumi amathathu.

¹³ Kodwa uba lisehluleka ukungitshela ukuthi kuyini, lizanginika lina izambatho zelembu elihle ezingamatshumi amathathu lengubo ezintsha ezingamatshumi amathathu. Bathi kuye: Tshono ilibho lakho ukuba silizwe.

¹⁴ Wathi kubo: Kokudlayo kwaphuma ukudla, kokulamandla kwavela okumnandi. Behluleka ukuliqamba ilibho ensukwini ezintathu.

¹⁵ Ngosuku lwesine bathi kumkaSamsoni: Huga umkakho ukuba asitshele ilibho, funa sikutshise ngomlilo kanye lendlu kayihlo. Lisimemele ukuba lisiphange na?

¹⁶ UmkaSamsoni wakhala phambi kwakhe wathi: Uyangizonda, kawungithandi; ubalibhile abantu bakithi, kawungitshelanga ukuba ilibho liyini. Yena wathi kuye: Kangibatshelanga ubaba lomama, ngizatshela wena na?

¹⁷ Umkakhe wakhala phambi kwakhe insuku eziyisikhombisa zedili labo. Ngosuku lwesikhombisa uSamsoni wasemtshela ngoba wamcindezela. Yena wasebatshela abakibo ilibho.

¹⁸ Ngosuku lwesikhombisa engakangeni endlini yomthimba, abantu bomuzi bathi kuye: Kuyini okumnandi ukwedlula uluju? Kuyini okulamandla kulesilwane na? Yena wathi kibo: Uba belingalimanga ngethokazi lami, belingayikuliqamba ilibho lami.

¹⁹ Umoya kaNkulunkulu wehlela ngamandla phezu kwakhe, wasuka waya eAshikeloni, wabulala khona amadoda omuzi angamatshumi amathathu, wathatha impango, wababika ingubo ezintsha labo ababeqambe ilibho lakhe. Ngokuthukuthela okukhulu wabuyela endlini kayise.

²⁰ Umkakhe wanikwa umngane kaSamsoni, owayengumkhaphi wakhe.