2 uTimothi 4 - iBhayibhili Elingcwele 1978

UTimothi ulaywa ukuba aqine

¹ Ngiyakulaya phambi kukaNkulunkulu loKristu Jesu ozakuthonisisa abaphilayo labafileyo, langokubonakala kwakhe langombuso wakhe,

² ukuba utshumayele ilizwi, uqinise ngazo izikhathi ezilungileyo lezingalunganga, usole, ukhuze, weluleke, ungadinwa yikubekezela lokufundisa.

³ Ngoba isikhathi siyeza lapho bengayikuvuma ukufundisa okuqotho, kodwa ngokwenkanuko zabo bazakuzibuthela abafundisi abakholisa indlebe zabo;

⁴ bafulathelise indlebe zabo eqinisweni, baphambukele ezinganekwaneni.

⁵ Kodwa wena zinqande njalo, ubekezelele izinhlupheko, wenze umsebenzi womvangeli, uphelelise inkonzo yakho.

⁶ Ngoba mina sengilungele ukwenziwa umnikelo, lesikhathi sokusuka kwami sesifikile.

⁷ Ngilwile ukulwa okuhle, ngiqedile ukuhamba kwami, ngikulondolozile ukukholwa.

⁸ Sengibekelwe umqhele wokulunga ezakunginika wona ngalolosuku iNkosi, umthonisisi olungileyo, kungesimi ngedwa ozakuwunikwa, kodwa bonke labo abathanda ukubonakala kwayo.

UTimothi ucelwa ukuba afike kuPawuli

⁹ Phangisa uze kimi masinyane;

¹⁰ ngoba uDema, ngokuthanda lumhlaba, ungihlamukile, waya eTesalonika, uKresena uye eGalathiya, uTitosi eDalmathiya;

¹¹ nguLuka yedwa olami; uze loMarko, ngoba uyangisiza kakhulu ngokungisebenzela.

¹² UTikiko ngimthume eEfesu.

¹³ Ekuzeni kwakho ungiphathele ijazi engalitshiya kuKarpo eTrowa, lezingwalo ikakhulu incwadi eziqakathekileyo.

¹⁴ UAleksandro umkhandi wethusi wangenzela okubi okunengi; iNkosi izakumbuyisela ngokwemisebenzi yakhe.

¹⁵ Umxwaye lawe, ngoba wamelana kakhulu lamazwi ethu.

¹⁶ Ekuziphenduleleni kwami kwakuqala kwakungekho muntu owangimelayo; bonke bangihlamuka. Kakungabalelwa kibo lokho.

¹⁷ Kodwa iNkosi yangimela, yangipha amandla okuba ngitshumayele ivangeli ngokupheleleyo, ukuze bonke abezizwe balizwe; ngakhutshwa emlonyeni wesilwane.

¹⁸ INkosi izakungikhupha kukho konke okubi, ingisilisele umbuso wayo wezulu. Kakube kuyo ubukhosi kuze kube nininini. Ameni.

Isicino

¹⁹ Bingelela oPriska loAkwila lendlu kaOnesiforo.

²⁰ UErastu wasala eKorinte, uTrofimu ngamtshiya egula eMilethu.

²¹ Phangisa ufike ubusika bungakafiki. Bayakubingelela oYubulu, loPudeni, loLino, loKlawudiya labo bonke abazalwane.

²² INkosi kayibe lomoya wakho. Umusa kawube lani lonke.