2 uTimothi 1 - iBhayibhili Elingcwele 1978

Isibingelelo

¹ Mina Pawuli, umphostoli kaKristu Jesu ngentando kaNkulunkulu ngokwesithembiso sokuphila okukuKristu Jesu,

² ngithi kuTimothi, umntanami othandekayo: Kakube kuwe umusa lesihawu lokuthula okuvela kuNkulunkulu uBaba lakuKristu Jesu iNkosi yethu.

UTimothi welulekwa ukuba azivuselele

³ Ngiyambonga uNkulunkulu engimkhonzayo njengabokhokho bami ngesazela esimhlophe, lapho ngikukhumbula futhifuthi ekukhulekeni kwami.

⁴ Ebusuku lemini ngilangatha ukukubona, ngikhumbula inyembezi zakho ukuze ngigcwaliswe yintokozo.

⁵ Ngikhunjuzwe ukukholwa kwakho okuqotho okwaba khona kuqala kunyokokhulu uLowisi lakunyoko uYunike; yebo, ngithemba kukhona lakuwe.

⁶ Ngakhoke ngiyakukhu mbuza ukuba uvuselele isiphiwo sikaNkulunkulu esikhona kuwe ngokubekwa kwezandla zami.

⁷ Ngoba uNkulunkulu kasinikanga umoya wobugwala, kodwa wasinika umoya wamandla lowothando lowokuzithinta.

⁸ Ngalokhoke ungabi lanhloni lapho ufakazela iNkosi yethu, loba ngami isibotshwa sayo, kodwa hlanganyela ukuhluphekela ivangeli ngamandla kaNkulunkulu.

⁹ Yena wasisilisa ngokubiza okungcwele, kungesikho ngokwemisebenzi yethu kodwa ngokwecebo lakhe langomusa asinika wona kuKristu Jesu ekudatshulweni kwesikhathi,

¹⁰ osubonakalisiwe khathesi ngokubonakala koMsilisi wethu uKristu Jesu, owachitha ukufa, waletha ekukhanyeni ukuphila lokungabhubhi ngevangeli.

¹¹ Ngamiselwa lona ukuba ngibe ngumtshumayeli lomphostoli lomfundisi.

¹² Ngalokhoke ngiyahlupheka; kodwa kangilamanhloni ngoba ngiyamazi engakholwa kuye, ngiyazi ukuthi ulamandla okulondoloza lokho anginike khona kuze kufike lolosuku.

¹³ Bambelela kuso isibonelo samazwi aqotho owawezwayo kimi ngokukholwa langothando olukuKristu Jesu.

¹⁴ Iqiniso oliphathisiweyo lilondoloze ngoMoya oNgcwele ohlezi kithi.

¹⁵ Uyakwazi ukuthi bonke abaseAsiya bangihlamuka, abaphakathi kwabo ngoFigelo loHermogene.

¹⁶ INkosi kayinike indlu kaOnesiforo umusa, ngoba wangithokozisa kanengi. Wayengelanhloni ngezibopho zami,

¹⁷ kodwa ekufikeni kwakhe eRoma wangidingisisa waze wangifumana.

¹⁸ INkosi imnike ukuba azuze isihawu eNkosini ngalolosuku. Konke ukusebenza kwakhe eEfesu uyakwazi wena kakhulu.