2 USamuyeli 23 - iBhayibhili Elingcwele 1978

Amazwi okucina kaDavida

¹ La ngamazwi okucina kaDavida; amazwi kaDavida indodana kaJese, amazwi omuntu ophakanyiselwe phezulu, ogcotshiweyo kaNkulunkulu kaJakobe, umhlabeleli omuhle wakoIsrayeli;

² uthi: Umoya weNkosi ukhuluma ngami, ilizwi layo lisolimini lwami.

³ UNkulunkulu kaIsrayeli usekhulumile, iDwala likaIsrayeli likhulumile kimi lathi: Obusa abantu ngokulunga, abuse ngokumesaba uNkulunkulu,

⁴ unjengokukhanya kwasekuseni ekuphumeni kwelanga, ilanga elikhanyayo ekuseni kungekho amayezi, lanjengezulu elihlumisa utshani emhlabathini.

⁵ Impela indlu yami ithembekile kuNkulunkulu na? Ngoba wenzile lami isivumelwano esingelakuphela, esimiswe kuhle ezintweni zonke, lesithembekileyo, Ngoba kayikuphumelelisa konke ukusizwa kwami lesifiso sami na?

⁶ Kodwa bonke abangamesabiyo uNkulunkulu banjengameva alahliweyo, angelakuthathwa ngesandla;

⁷ kodwa owathintayo uwathinta ngensimbi langoluthi lomkhonto, atshiswa ngomlilo aphele.

Amaqhawe kaDavida

⁸ La ngamabizo amaqhawe kaDavida; uIshiboshethi waseHakimoni, owayeyinduna yabathathu; nguye owagiya ngomkhonto wakhe phakathi kwabangamakhulu aficaminwembili, wababulala ngasikhathi sinye.

⁹ Wayelandelwa nguEleyazare indodana kaDodo waseAhohi, omunye wamaqhawe amathathu. WayeloDavida ePasidamimi lapho amaFilistiya ayebuthanele khona ukulwa. Kwathi lapho abakoIsrayeli sebehlehlile,

¹⁰ wasuka wagwaza amaFilistiya saze sadinwa isandla sakhe, isandla sakhe sanamathela emkhontweni. INkosi yabanika ukunqoba okukhulu ngalolosuku; abantu babuya bamlandela ukuba baphange abafileyo.

¹¹ Yena wayelandelwa nguShama indodana kaAge waseHarari. AmaFilistiya ayebuthene eLehi, lapho kwakukhona insimu elemibhida; lapho abantu bewabalekela amaFilistiya,

¹² yena wema phakathi kwensimu, wayivikela, wawabulala amaFilistiya. INkosi yabanika ukunqoba okukhulu.

¹³ Abathathu ezinduneni ezingamatshumi amathathu basuka, baya kuDavida obhalwini lwaseAdulamu ngesikhathi sokuvuna; ibutho lamaFilistiya lalimise esihotsheni saseRegayimi.

¹⁴ UDavida wayesesenqabeni, lamabutho alindayo amaFilistiya ayeseBetlehema.

¹⁵ UDavida wasesoma kakhulu, wathi: Hawu, kungathi nginganathiswa amanzi omthombo waseBetlehema ongasesangweni.

¹⁶ Lawomaqhawe amathathu afohlela ezihonqweni zamaFilistiya, akha amanzi emthonjeni waseBetlehema owawungasesangweni, awathatha awaletha kuDavida. Kodwa uDavida wala ukuwanatha; wawathululela eNkosini.

¹⁷ Wathi: Ngingeke ngikwenze lokho, Nkosi; kungaba njengokunatha igazi labantu abangenise ukuphila kwabo engozini. Ngalokhoke wala ukuwanatha. Lezizinto zenziwa yilawomaqhawe amathathu.

¹⁸ UAbishayi, umfowabo kaJowabi indodana kaZeruya, wayeyinduna yabangamatshumi amathathu. Wagiya ngomkhonto wakhe phezu kwabangamakhulu amathathu ayebabulele, wazizuzela ibizo phakathi kwalabo abangamatshumi amathathu.

¹⁹ Wayelodumo olukhulu phakathi kwabangamatshumi amathathu, waba yinduna yabo; kodwa wayengalingani lamaqhawe amathathu ngobuqhawe.

²⁰ UBenaya indodana kaJehoyada waseKabizeli wayeliqhawe elenza izenzo ezinkulu ezinengi. Nguye owabulala amaqhawe amabili aseMowabi; futhi wangena emgodini, wabulala isilwane mhla kulongqoqwane.

²¹ Wabulala lomGibithe, umuntu oqatha kakhulu. UmGibithe lowo wayephethe umkhonto; kodwa uBenaya waya kuye ephethe induku nje, wawuhluthuna umkhonto esandleni sakhe, wambulala ngomkhonto wakhe.

²² Lezizinto wazenza uBenaya indodana kaJehoyada, wazizuzela ibizo phakathi kwalabo abangamatshumi amathathu.

²³ Wayelodumo phakathi kwabangamatshumi amathathu, kodwa wayengalingani lamaqhawe amathathu ngobuqhawe. UDavida wambeka induna yabalindi bakhe.

²⁴ UAsaheli umfowabo kaJowabi wayengomunye wabangamatshumi amathathu, loElihanani indodana kaDodo waseBetlehema,

²⁵ loShama waseHarodi, loElika waseHarodi,

²⁶ loHelezi waseBeti‐Peleti, loIra indodana kaIkeshi waseTekowa,

²⁷ loAbiyezeri waseAnathithi, loMebunayi waseHusha,

²⁸ loZalimoni waseAhohi, loMaharayi waseNetofa,

²⁹ loHeledi indodana kaBahana waseNetofa, loIthayi indodana kaRibayi waseGibeya lakoBenjamini,

³⁰ loBenaya wasePirathoni, loHidayi wangasezifuleni zaseGashi,

³¹ loAbi‐Aliboni waseBeti‐Araba, loAzimavethi waseBahurimi,

³² loEliyaba waseShaliboni, loJasheni waseGizoni,

³³ loJonathani indodana kaShama waseHarari, loAhiyamu indodana kaSharari waseHarari,

³⁴ loElifeleti indodana kaAhasibayi indodana yomMahakathi, loEliyamu indodana kaAhithofeli waseGilo,

³⁵ loHezirayi waseKarmeli, loParayi waseArabi,

³⁶ loIgali indodana kaNathani waseZoba, loBani wakoGadi,

³⁷ loZeleki waseAmoni, loNaharayi waseBerothi, umphathi wezikhali zikaJowabi indodana kaZeruya,

³⁸ loIra waseIthira, loGarebi waseIthira,

³⁹ loUriya umHethi; babengamatshumi amathathu lesikhombisa bebonke.