Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

2 USamuyeli 22 - iBhayibhili Elingcwele 1978


Ihubo lokubonga kukaDavida

1 UDavida wakhuluma eNkosini amazwi alelihubo mhla iNkosi imophula ezitheni zakhe zonke lakuSawuli.

2 Wathi: INkosi ilidwala lami, lenqaba yami, lomkhululi wami;

3 uNkulunkulu wami ulidwala lami engiphephela kulo, lesihlangu sami, lesivikelo sami, inqaba yami lesiphephelo sami; umkhululi wami ongikhulula kokubi.

4 Ngizakhuleka eNkosini efanele ukudunyiswa, ngikhululwe ezitheni zami.

5 Amavinqo okufa angizingeleza, lezikhukhula zokubhujiswa zangethusa,

6 izibopho zendawo yabafileyo zangithandela, lemijibila yokufa yangivimbela.

7 Ekuhluphekeni kwami ngakhuleka eNkosini, ngakhala kuNkulunkulu wami. Walizwa ilizwi lami esethempelini lakhe, ukukhala kwami kwafinyelela endlebeni zakhe.

8 Umhlaba wazamazama, wagedezela, lezisekelo zephezulu zaqhaqhazela, zazamazama ngoba wayethukuthele.

9 Kwaphuma intuthu emakhaleni akhe, lomlilo otshisayo emlonyeni wakhe; amalahle avuthayo aphuma kuye.

10 Wakhothamisa amazulu, wehlela phansi; umnyama omkhulu wawuphansi kwenyawo zakhe.

11 Wakhwela phezu kwekherubi, waphapha, waphapha ngamaphiko omoya.

12 Wenza umnyama waba yisisitheliso sakhe, lokuqoqana kwamanzi kwaba ngamayezi amnyama.

13 Ekukhanyeni okuphambi kwakhe kwavutha amalahle omlilo.

14 INkosi yakhwaza isezulwini, oPhezukonke wazwakalisa ilizwi lakhe.

15 Yathuma imitshoko, yabachitha; yaphazamisa imibane, yabaphaphathekisa.

16 Ng’khona kwabonakala itshebetshebe elingaphansi kolwandle, kwambulwa lezisekelo zomhlaba ekukhwazeni kweNkosi, ekufutheni komoya wamakhala ayo.

17 Yaselula isandla sayo iphezulu, yangibamba, yangikhupha emanzini atshonayo.

18 Yangophula esitheni sami esilamandla, lakibo abangizondayo, ngoba basebengehlulile.

19 Bangifikela osukwini losizi lwami, kodwa iNkosi yaba yinsika yami.

20 Yangikhuphela endaweni ebanzi, yangikhulula, ngoba ibingithanda.

21 INkosi yangipha umvuzo ofanele ukulunga kwami, yangibuyisela ngokufanele ukuhlambuluka kwezandla zami.

22 Ngoba ngizilondolozile indlela zeNkosi, kangimukanga kuNkulunkulu wami ngokubi.

23 Ngoba zonke izimiso zayo zaziphambi kwami, kangiyidelanga imithetho yayo.

24 Ngangimsulwa phambi kwayo, ngibuxwayile ububi.

25 Ngakhoke iNkosi ingibuyisele ngokufanele ukulunga kwami, langokufanele ukuhlambuluka kwami phambi kwayo.

26 Kothembekileyo uziveza uthembekile; kopheleleyo uziveza uphelele;

27 kohlambulukileyo uziveza uhlambulukile; lakongaqondanga uziveza ungaqondanga.

28 Uyakhulula abantu abathobekileyo, kodwa amehlo akho aphezu kwabazigqajayo ukubehlisela phansi.

29 Yebo, wena uyisibane sami, Nkosi, loNkulunkulu wami uyakhanyisa umnyama wami.

30 Yebo, ngawe ngingadiliza umduli, ngoNkulunkulu wami ngingeqa umthangala.

31 LuNkulunkulu indlela yakhe iphelele; ilizwi leNkosi lithembekile; uyisihlangu kubo bonke abaphephela kuye.

32 Ngoba ngubani onguNkulunkulu ngaphandle kweNkosi na? Ngubani olidwala ngaphandle kukaNkulunkulu wethu na?

33 uNkulunkulu ongambathisa amandla, owenza indlela yami ibe lula.

34 Wenza inyawo zami zibe njengezempala, wangimisa ezingqongeni.

35 Ufundisa izandla zami ukulwa, ukuze ingalo zami zigobise idandili lethusi.

36 Wena unginikile isihlangu senkululeko yakho, lokusiza kwakho kungikhulisile.

37 Wenzile zaba banzi izinyathelo zami, lenyawo zami kazitshelelanga.

38 Ngaxotshana lezitha zami ngazibhubhisa, kangibuyanga ngingakaziqedi.

39 Ngaziqeda; ngazigwaza, zaze zahluleka ukuvuka; zawa phansi kwenyawo zami.

40 Ngoba wena wangambathisa amandla okulwa, wabawisela phansi abayizitha zami.

41 Wazenza zingibalekele izitha zami, labangizondayo ngababhubhisa.

42 Bakhala, kodwa kakubanga khona obasizayo, bakhala eNkosini, kodwa kayibaphendulanga.

43 Ngabacholisisa baba njengothuli lomhlabathi, ngabanyathela phansi njengodaka lwendlela.

44 Wangikhulula esiphithiphithini sabantu, wangimisa ngaba yinhloko yezizwe, labantu engangingabazi bangisebenzela.

45 Abezizweni bazithoba phambi kwami; banela ukungizwa nje ngendaba bangilalela.

46 Abezizweni bethuka, baphuma ezinqabeni zabo bethuthumela.

47 INkosi ikhona; kalidunyiswe idwala lami, kaphakanyiswe uNkulunkulu, idwala lenqaba yami;

48 uNkulunkulu onginike impindiselo, wehlisela izizwe ngaphansi kwami;

49 ongikhulule ezitheni zami wena wangiphakamisa phezu kwezitha zami, wangikhulula ebantwini ababi.

50 Ngenxa yalokhu ngizakukubonga phakathi kwezizwe, Nkosi, ngihubele ibizo lakho.

51 Uyanika inkosi yakhe ukunqoba okukhulu, ebonakalisa uthando lwakhe olungapheliyo kogcotshiweyo wakhe uDavida, lenzalweni yakhe kuze kube nini lanini.

Bible Society of Zimbabwe 1978

Bible Society of Zimbabwe
ကြှနျုပျတို့နောကျလိုကျပါ:



ကြော်ငြာတွေ