2 USamuyeli 21 - iBhayibhili Elingcwele 1978

AbaseGibeyoni bayaphindisela

¹ Kwaba khona indlala ensukwini zikaDavida iminyaka emithathu ngokulandelana; uDavida wabuza iNkosi uNkulunkulu. Yathi: USawuli ulecala legazi kanye lendlu yakhe, ngoba wabulala abaseGibeyoni.

² Ngakho inkosi yasibiza abaseGibeyoni. AbaseGibeyoni babengesibo abantu bakoIsrayeli, kodwa babengabasalayo bamaAmori; lanxa abakoIsrayeli babefungile ukubayekela, uSawuli wafuna ukubabulala ekutshisekeleni kwakhe abakoIsrayeli labakoJuda.

³ UDavida wathi kwabaseGibeyoni: Ngingalenzelani na? Ngingakwenza kanjani ukubuyisana ukuba libusise abantu beNkosi uNkulunkulu na?

⁴ AbaseGibeyoni bathi kuye: Indaba yethu loSawuli lendlu yakhe ingehlawulwe ngesiliva langegolide; futhi kasidingi ukubulala umuntu koIsrayeli. Wasesithi: Pho, lithi ngilenzeleni na?

⁵ Basebesithi enkosini: Umuntu owasibulalayo, wayeqonde ukusibhubhisa, ukuze singabi landawo elizweni lonke lakoIsrayeli,

⁶ asinikwe amadodana akhe ayisikhombisa ukuze siwaphanyeke phambi kweNkosi uNkulunkulu eGibeyoni entabeni yayo. Inkosi yathi: Ngizalinika bona.

⁷ Kodwa yamtshiya uMefiboshethi indodana kaJonathani kaSawuli ngenxa yesifungo uDavida loJonathani indodana kaSawuli ababesenzile ebizweni leNkosi uNkulunkulu.

⁸ Yathatha amadodana amabili kaRizipa indodakazi kaAya ayewazele kuSawuli, uArimoni loMefiboshethi, lamadodana amahlanu kaMerabi indodakazi kaSawuli ayewazele kuAdriyeli indodana kaBarizilayi waseMehola,

⁹ yabanikela ezandleni zabaseGibeyoni, babaphanyeka entabeni phambi kweNkosi uNkulunkulu, bafa labo abayisikhombisa bonke. Babulawa ensukwini zokuqala zokuvuna, ekuqaleni kokuvunwa kwebhali.

¹⁰ URizipa indodakazi kaAya wathatha isaka, wazendlalela lona phezu kwedwala, kusukela ekuqaleni kokuvuna baze banethwa lizulu; kavumelanga inyoni zaphezulu ukuba zihlale phezu kwabo emini, lezilo zeganga ebusuku.

¹¹ Lapho uDavida ebikelwa lokho okwenziwe nguRizipa indodakazi kaAya, omunye umfazi kaSawuli,

¹² uDavida wasuka wayathatha amathambo kaSawuli lakaJonathani ebantwini baseJabeshi‐Gileyadi ababewebile emdangeni waseBeti‐Shani, lapho amaFilistiya ayebaphanyeke khona mhla ebulala uSawuli eGilibowa.

¹³ Wathatha lapho amathambo kaSawuli lawendodana yakhe uJonathani; waqoqa lamathambo alabo ababephanyekiwe.

¹⁴ Bawangcwaba amathambo kaSawuli lakaJonathani indodana yakhe elizweni lakoBenjamini eZela, engcwabeni likaKishi uyise. Bakwenza konke inkosi eyayibalaye khona. Emva kwalokho uNkulunkulu wayizwa imikhuleko eyenzelwa ilizwe.

Abantu bakaDavida babulala iziqhwaga

¹⁵ AmaFilistiya abuye alwa impi futhi loIsrayeli; uDavida wahamba kanye lenceku zakhe, bayakulwa lamaFilistiya; ekulweni kwabo uDavida wadinwa.

¹⁶ UBenobi owayengomunye wabantwana beziqhwaga, omkhonto wakhe wawulobunzima obungamashekeli angamakhulu amathathu ethusi, wayehlome ngomhedla omutsha, wayesezambulala uDavida.

¹⁷ Kodwa uAbishayi indodana kaZeruya wamlamulela, wamtshaya umFilistiya wambulala. Abantu bakaDavida basebefunga kuye besithi: Kawusayikuphuma impi lathi, funa ucime isibane sikaIsrayeli.

¹⁸ Emva kwalokhu kwaba khona impi futhi lamaFilistiya eGobi; uSibekayi waseHusha wabulala uSafi, omunye wabantwana beziqhwaga.

¹⁹ Kwaba khona futhi impi lamaFilistiya eGobi; uElihanani indodana kaJayiri waseBetlehema, wabulala uGoliyathi waseGiti, oluthi lomkhonto wakhe lwalungangogodo lomaluki.

²⁰ Kwabuye kwaba khona impi eGathi, lapho kwakukhona umuntu omude, owayeleminwe eyisithupha esandleni, lamazwane ayisithupha onyaweni, kungamatshumi amabili lane kukonke; laye wayengomunye wabantwana beziqhwaga.

²¹ Lapho eseyisa uIsrayeli, uJonathani indodana kaShimeya, umfowabo kaDavida, wambulala.

²² Labo bobane babezalwa yiziqhwaga eGathi; bonke babulawa nguDavida layizinceku zakhe.