2 USamuyeli 2 - iBhayibhili Elingcwele 1978

UDavida ubekwe abe yinkosi yakoJuda

¹ Emva kwalokho uDavida wabuza eNkosini wathi: Ngiye yini komunye umuzi wakoJuda? INkosi yathi kuye: Yana. UDavida wathi: Ngiye kuwuphi na? Yathi: EHebroni.

² Ngakho uDavida wasesiya lapho, labafazi bakhe bobabili, uAhinowama waseJezereli loAbigayili umkaNabali waseKarmeli.

³ UDavida wathatha abantu bakhe ababelaye, bonke lemizi yabo; bahlala emizini yaseHebroni.

⁴ Kwasekufika abantu bakoJuda, bamgcoba khona uDavida, waba yinkosi yakoJuda. Kwathi bemtshela uDavida besithi: Abantu baseJabeshi‐Gileyadi yibo abangcwaba uSawuli;

⁵ uDavida wathumela izithunywa ebantwini baseJabeshi‐Gileyadi, wathi kibo: INkosi uNkulunkulu ilibusise, ngoba litshengise ukuthembeka kwenu kuSawuli inkosi yenu, lamngcwaba.

⁶ INkosi kayibe lothando olungapheliyo kini leqiniso; lami ngizalenzela okuhle, ngoba lenze lolulutho.

⁷ Ngakhoke qinani libe lesibindi; ngoba uSawuli inkosi yenu ufile; abakoJuda sebegcobe mina, ngaba yinkosi yabo.

UDavida ulwa labendlu kaSawuli

⁸ UAbineri indodana kaNeri, induna yempi kaSawuli, wayethethe uIshiboshethi indodana kaSawuli, wamkhuphulela eMahanayimi,

⁹ wambeka inkosi yaseGileyadi, leyamaAshuri, leyaseJezereli, lakoEfrayimi, lakoBenjamini, leyakoIsrayeli wonke.

¹⁰ UIshiboshethi, indodana kaSawuli, wayeleminyaka engamatshumi amane ekuqaliseni kwakhe ukubusa uIsrayeli, wabusa iminyaka emibili. Kodwa abakoJuda balandela uDavida.

¹¹ UDavida waba yinkosi yakoJuda eHebroni okweminyaka eyisikhombisa lenyanga eziyisithupha.

¹² UAbineri indodana kaNeri, lenceku zikaIshiboshethi indodana kaSawuli, basuka eMahanayimi, baya eGibeyoni.

¹³ UJowabi indodana kaZeruya, lenceku zikaDavida, basuka bayahlangana labo echibini laseGibeyoni; bahlala phansi, abanye ngapha kwechibi labanye ngale kwalo.

¹⁴ UAbineri wathi kuJowabi: Insizwa ake zisukume zivikisane phambi kwethu. UJowabi wathi: Kazisukume.

¹⁵ Zasezisukuma, zeza ngamunye ngamunye, zaba litshumi lambili koBenjamini lakoIshiboshethi indodana kaSawuli, lenceku zikaDavida zaba litshumi lambili.

¹⁶ Zabambana ngamakhanda, zagwazana ngemihedla enhlangothini; zawela phansi kanyekanye. Ngakho leyondawo kwasekuthiwa yiNsimu yenhlangothi eseGibeyoni.

¹⁷ Kwaba lempi enzima ngalolosuku, uAbineri labantu bakoIsrayeli behlulwa zinceku zikaDavida.

¹⁸ Ayekhona lapho amadodana amathathu kaZeruya, oJowabi, loAbishayi loAsaheli. UAsaheli wayelesiqubu njengomziki,

¹⁹ waxotshana loAbineri; ekumxotsheni kwakhe kaphambukelanga ngakwesokunene langakwesokhohlo.

²⁰ UAbineri wanyemukula, wasesithi: Nguwe Asaheli na? Yena waphendula, wathi: Yimi.

²¹ UAbineri wasesithi kuye: Phambukela ngakwesokunene loba ngakwesokhohlo, ubambe enye insizwa, uyithathele impango yayo. Kodwa uAsaheli kavumanga ukuphambuka ekumlandeleni.

²² UAbineri wabuye wathi kuAsaheli: Yekela ukungilandela; ngizakubulalelani na? Ngingamkhangelelwa yini uJowabi umfowethu na?

²³ Kodwa yena wala ukumyekela; ngakho uAbineri wasemgwaza esiswini ngesidindi somkhonto wakhe, umkhonto waze wayathutsha emhlana wakhe; wawela phansi khona lapho, wafela khona. Kwathi bonke abafika endaweni lapho uAsaheli ayefele khona, bema.

²⁴ Kodwa uJowabi loAbishayi baxotshana laye uAbineri; ilanga labatshonela befika oqaqeni lwaseAma, olungaphambi kwaseGiya endleleni yasenkangala yaseGibeyoni.

²⁵ AbakoBenjamini babuyela ngakuAbineri, baba lixuku linye, bema phezu koqaqa oluthile.

²⁶ UAbineri wasememeza uJowabi esithi: Sizakulwa kokuphela na? Kawazi yini ukuba kuzakuba kubi ekucineni na? Koze kube nini ungebalayi abantu bakho ukuba bangaxotshani labafowabo na?

²⁷ UJowabi wathi: Ngifunga uNkulunkulu, uba ubungakhulumanga, impela abantu bebengayikuyekela ukuxotshana labafowabo kuze kube sekuseni.

²⁸ UJowabi wasetshaya uphondo, bonke abantu basebesima, kababe besaxotshana laye uIsrayeli, futhi kabasalwanga.

²⁹ UAbineri labantu bakhe badabula iAraba bonke lobobusuku; bachapha iJordani, bahamba ingxenye yonke yosuku, bafika eMahanayimi.

³⁰ UJowabi wabuya ekuxotshaneni loAbineri; esebuthanisile bonke abantu, encekwini zikaDavida kwasilela abalitshumi labaficamunwemunye ngaphandle kukaAsaheli.

³¹ Kodwa inceku zikaDavida zazibulele abakoBenjamini labakaAbineri abantu abangamakhulu amathathu lamatshumi ayisithupha.

³² Bamthatha uAsaheli, bamngcwaba engcwabeni likayise elaliseBetlehema. UJowabi labantu bakhe bahamba ubusuku bonke, kwasa beseHebroni.