2 USamuyeli 19 - iBhayibhili Elingcwele 1978

¹ Kwabikwa kuJowabi kwathiwa: Inkosi uDavida iyakhala, ililela uAbisalomu.

² Ukunqoba ngalolosuku kwaphenduka isililo ebantwini bonke, ngoba bezwa kuthiwa: Inkosi idabukile ngendodana yayo.

³ Abantu bangena ngokunyenya emzini ngalolosuku njengabantu ababaleke empini bengena ngokunyenya belenhloni.

⁴ Inkosi yagubuzela ubuso bayo, yakhala ngelizwi elikhulu yathi: Hawu, ndodana yami Abisalomu, hawu Abisalomu, ndodana yami, ndodana yami!

⁵ UJowabi wangena endlini yenkosi wathi: Lamuhla uziyangisile zonke izinceku zakho ezikusilise ekufeni wena lamadodana akho lamadodakazi akho labomkakho labanye abafazi bakho.

⁶ Uyabathanda abakuzondayo, uzonde abakuthandayo. Ngoba ukuveze obala lamuhla ukuthi induna zempi lenceku kazisilutho kuwe; ngoba ngiyabona lamuhla ukuthi uba uAbisalomu ubesaphila, thina sonke besifile lamuhla, ube uzathokoza.

⁷ Ngakhoke sukuma, uphume uyekhuluma kuhle lenceku zakho; ngoba ngifunga iNkosi uNkulunkulu ngithi uba ungaphumi, kakulamuntu ozahlala lawe ngalobubusuku. Lokhu kuzakuba kubi kuwe kulakho konke okubi okukwehlele kusukela ebutsheni bakho kuze kube lamuhla.

⁸ Yasisuka inkosi, yahlala esangweni. Batshelwa abantu kwathiwa: Inkosi ihlezi esangweni; basebesiza abantu bonke phambi kwayo. Bonke abakoIsrayeli babebaleke baya emakhaya abo.

UDavida ubuyela eJerusalema

⁹ Kuzo zonke izizwe zakoIsrayeli abantu babephikisana besithi: Inkosi uDavida yasikhulula ezitheni zethu, yasophula ezandleni zamaFilistiya; kodwa khathesi isibalekile elizweni ibalekela uAbisalomu.

¹⁰ Kodwa uAbisalomu esamgcoba ukuba abe yinkosi yethu usefele empini. Phoke, lithuleleni lingatsho lutho ngokubuyisa inkosi na?

¹¹ Konke abakoIsrayeli ababekutsho kwafinyelela endlebeni zenkosi. Inkosi uDavida yathuma ilizwi kuZadoki lakuAbiyatha abapristi, isithi: Khulumani labadala bakoJuda lithi: Kungani ukuba libe ngabokucina ukubuyisela inkosi emzini wayo na?

¹² Lina liyizihlobo zami, lingabegazi lami; phoke, kungani ukuba libe ngabokucina ukubuyisa inkosi na?

¹³ Lithi kuAmasa: Angithi ungowegazi lami na? UNkulunkulu kangihlanekele engezelele futhi, uba ungayikuba yinduna yempi yami esikhundleni sikaJowabi kusukela lamuhla.

¹⁴ Wazehlula inhliziyo zabantu bonke bakoJuda, basebethuma ilizwi enkosini besithi: Buya wena lazo zonke inceku zakho.

¹⁵ Inkosi yasibuya eJordani; abantu bakoJuda beza eGiligali ukuba bayihlangabeze, bayichaphise umfula.

¹⁶ UShimeyi indodana kaGera wakoBenjamini, waseBahurimi, waphangisa weza labantu bakoJuda ukuyihlangabeza inkosi uDavida.

¹⁷ Weza labantu abayinkulungwane bakoBenjamini; loZiba inceku yendlu kaSawuli, lamadodana akhe alitshumi lanhlanu, lenceku zakhe ezingamatshumi amabili, wayekhona. Bazimuka baya eJordani ngaphambi kwenkosi,

¹⁸ bachapha ezibukweni ukuwelisa abendlu yenkosi lokwenza okufunwa yiyo. UShimeyi indodana kaGera waziwisela phansi phambi kwenkosi isizachapha iJordani.

¹⁹ Wathi kuyo: Inkosi yami ingangibambeli umlandu, futhi ungakhumbuli okubi okwenziwa yinceku yakho mhla inkosi yami isuka eJerusalema; inkosi ingakubeki enhliziyweni.

²⁰ Ngoba inceku yakho iyazi ukuba yonile; ngakho ngifikile lamuhla, ngingowokuqala kuyo yonke indlu kaJosefa ukuzahlangabeza inkosi yami.

²¹ Kwasekuphendula uAbishayi indodana kaZeruya wathi: UShimeyi kayikubulawa yini ngalokhu, ngoba wathuka ogcotshiweyo weNkosi na?

²² UDavida wathi: Ngilani lani, lina madodana kaZeruya, ukuba limelane lami lamuhla na? Kuzabulawa umuntu lamuhla koIsrayeli na? Ngiyazi sibili ukuba lamuhla ngiyinkosi koIsrayeli.

²³ Wasesithi kuShimeyi: Kawuyikubulawa. Wafunga kuye.

²⁴ UMefiboshethi indodana kaSawuli weza ukuhlangabeza inkosi. Wayengagezanga inyawo zakhe, engagelanga lendevu zakhe, engagezisanga lezigqoko zakhe, kusukela mhla inkosi isuka eJerusalema kwaze kwaba mhla ibuya isilile.

²⁵ Kwathi esefikile evela eJerusalema ukuhlangabeza inkosi, inkosi yathi kuye: Kungani ungahambanga lami, Mefiboshethi na?

²⁶ Yena wathi: Nkosi yami, inceku yami yangikhohlisa; ngoba ngathi kuyo: Ngibophelela ubabhemi ukuba ngigade, ngihambe lenkosi, ngoba ngiyaqhula.

²⁷ Ingihlebile kuwe, nkosi yami; kodwa, nkosi yami, unjengesithunywa sikaNkulunkulu; ngakho yenza okubona kufanele.

²⁸ Ngoba bonke abendlu kababa babenjengabantu abaqunyelwe ukufa phambi kwenkosi yami; kodwa wangibeka mina engiyinceku yakho phakathi kwalabo abadla etafuleni yakho. Phoke, ngiselalungelo bani ukuba ngibuye ngikhale enkosini yami na?

²⁹ Inkosi yasisithi kuye: Usakhulumelani ngendaba zakho na? Ngithe: Wena loZiba lizakwahlukaniselana ilizwe.

³⁰ UMefiboshethi wasesithi enkosini: Kalithathe lonke, lokhu inkosi yami isibuyile ekhaya isilile.

³¹ UBarizilayi waseGileyadi wayefikile laye evela eRogelimi; wahamba lenkosi waze wafika eJordani, wayichaphisa waseyivalelisa.

³² UBarizilayi wayesengumuntu omdala kakhulu, eseleminyaka engamatshumi aficaminwembili; wayipha ukudla inkosi ekuhlaleni kwayo eMahanayimi, ngoba wayenothile kakhulu.

³³ Inkosi yathi kuBarizilayi: Chapha kanye lami wena, ngizakukubonela kanye lami eJerusalema.

³⁴ Kodwa uBarizilayi wathi enkosini: Ngiseleminyaka emingaki yokuphila ukuba ngiye eJerusalema lenkosi na?

³⁵ Lamuhla ngileminyaka engamatshimi aficaminwembili; ngingabe ngisahlukanisa phakathi kokubi lokuhle na? Inceku yakho ingabe isezwa ekudlayo lekunathayo na? Ngingabe ngisawezwa amazwi amadoda lawabesifazana abahlabelayo na? Inceku yakho isizakuba ngumthwalo enkosini yami ngani na?

³⁶ Inceku yakho izake ichaphe nje iJordani lenkosi; inkosi izanginikelani umvuzo ongaka na?

³⁷ Ngiyakuncenga, yekela inceku yakho ibuyele, ukuze ngifele emzini wami eduze lengcwaba likababa lelikamama. Kodwa nansi indodana yami uKhimihamu, kayichaphe lenkosi yami, uyenzele lokho okubona kufanele.

³⁸ Inkosi yathi: UKhimihamu angachapha lami; ngizamenzela lokho okubona kufanele, lakho konke okufunayo kimi ngizakukwenzela khona.

³⁹ Bonke abantu basebechapha iJordani, lenkosi layo yachapha; inkosi yamanga uBarizilayi, yambusisa, yena wabuyela emzini wakhe.

⁴⁰ Inkosi yasisiya eGiligali, loKhimihamu wahamba layo; bonke abantu bakoJuda lengxenye yabantu bakoIsrayeli bayiphelekezela.

⁴¹ Basebesiza bonke abantu bakoIsrayeli enkosini bathi kuyo: Abafowethu abakoJuda bakuntshontsheleni, bachaphisa inkosi lendlu yayo iJordani kanye labo bonke abantu bakaDavida na?

⁴² Bonke abantu bakoJuda baphendula abantu bakoIsrayeli, bathi: Ngoba inkosi iyisihlobo sethu impela. Lithukuthelelani ngalokhu na? Sike sadlani olungolwenkosi na? Futhi isinike isipho bani na?

⁴³ Abantu bakoIsrayeli baphendula abantu bakoJuda, bathi: Thina ukuyinanzelela kwethu inkosi kukhulu kulokwenu ngokuphindwe katshumi, futhi lakuDavida sibadala kulani. Phoke, lisidelelelani na? Kakusithi esingabokuqala abakhuluma ngokubuyiswa kwenkosi yethu na? Kodwa amazwi abantu bakoJuda ayelukhuni kulamazwi abantu bakoIsrayeli.