2 USamuyeli 17 - iBhayibhili Elingcwele 1978

Iseluleko sikaAhithofeli

¹ UAhithofeli wasesithi kuAbisalomu: Ake ngithathe abantu abazinkulungwane ezilitshumi lambili, ngixotshane loDavida ngalobubusuku.

² Ngizamfica ekhathele, ebuthakathaka, ngimethuse; bonke abantu abalaye bazabaleka; ngizabulala inkosi kuphela.

³ Ngizaletha abantu bonke kuwe njengomlobokazi elethwa kumyeni wakhe. Ufuna ukuphila komuntu oyedwa nje; bonke abanye abantu bazakuphepha.

⁴ Lelilizwi lamthokozisa uAbisalomu labo bonke abadala bakoIsrayeli.

⁵ UAbisalomu wasesithi: Bizani loHushayi waseArki, kesizwe ukuthi yena uthini.

⁶ UHushayi esefikile, uAbisalomu wamtshela ukuba uAhithofeli utheni, wathi: Senze njengokutsho kwakhe na? Uba kungenjalo, wena uthini na?

⁷ UHushayi wathi kuAbisalomu: Ukweluleka kukaAhithofeli kakukuhle.

⁸ UHushayi wathi futhi: Uyamazi uyihlo labantu bakhe ukuba bangamaqhawe, lokuthi bathukuthele njengebhere elithathelwe imidlwane yalo egangeni. Futhi uyihlo yindoda yempi; kayikuhlala labantu ebusuku.

⁹ Lakhathesinje ucatshile emgodini, loba kwenye indawo. Kuzakuthi lapho abanye bebulawa ekuqaleni nje, kuthi ozwayo athi: Baphelile abantu abalandela uAbisalomu.

¹⁰ Kuthi lolesibindi olenhliziyo enjengeyesilwane aphele amandla ngenxa yokwesaba; ngoba wonke uIsrayeli uyazi ukuba uyihlo uliqhawe, lokuba lalabo abalaye labo balesibindi.

¹¹ Kodwa mina ngithi wonke uIsrayeli kabuthane kuwe kusukela koDani kuze kufike eBerisheba, babe ngangetshebetshebe elisolwandle ubunengi babo, wena ubususiya labo empini.

¹² Sizamfikela endaweni ethile lapho angafumaniseka khona, simehlele njengamazolo ewela emhlabathini; kungasali loyedwa wakhe lebantwini abalaye.

¹³ Uba ebalekela emzini, wonke uIsrayeli uzaletha amagoda kulowomuzi, siwuhudulele esihotsheni, kungabe kusafunyaniswa lelitshe khona.

¹⁴ UAbisalomu labo bonke abantu bakoIsrayeli bathi: Ukweluleka kukaHushayi waseArki kungcono kulokukaAhithofeli. Ngoba iNkosi uNkulunkulu yayimisile ukuba kudilizwe ukweluleka okuhle kukaAhithofeli ukuze imehlisele okubi uAbisalomu.

¹⁵ UHushayi wasesithi kuZadoki lakuAbiyatha abapristi: UAhithofeli weluleke uAbisalomu labadala bakoIsrayeli wathi wathi; minake ngabeluleka ngathi ngathi.

¹⁶ Ngakho thumani ilizwi masinyane kuDavida limtshele lithi: Ungahlali ngasemazibukweni asenkangala kulobubusuku, kodwa welela ngaphetsheya, hlezi inkosi ibulawe labantu bayo bonke.

¹⁷ UJonathani loAhimazi babelindile eEnirogeli; incekukazi ethile yayilokhu isiza ibatshela ukuthi bona bahambe bayebikela inkosi uDavida, ukuba bangabonwa bengena emzini.

¹⁸ Kodwa umfana othile wababona, wabikela uAbisalomu; basebehamba masinyane bobabili, bayafika endlini yomuntu othile eBahurimi. Lowomuntu wayelomthombo egumeni lakhe; bangena phakathi.

¹⁹ Owesifazana wathatha isimbombozo, wasendlala phezu komlomo womthombo, wachaya amabele phezu kwaso, kungazi muntu.

²⁰ Lapho zifika inceku zikaAbisalomu endlini, zathi kowesifazana: Bangaphi oAhimazi loJonathani na? Owesifazana wathi kizo: Bachaphele ngaphetsheya kwesifula. Sezibadinge zabaswela, zasezibuyela eJerusalema.

²¹ Kwathi sezihambile, baphuma emthonjeni baya bayitshela inkosi uDavida, bathi: Sukani masinyane, lichaphe isifula, ngoba uAhithofeli weluleke wathi wathi ngani.

²² UDavida wasesuka labo bonke abantu ababelaye, bachapha iJordani; ekuphumeni kwelanga kwakungasasalanga loyedwa ongalichaphanga iJordani.

²³ Lapho uAhithofeli ebona ukuthi ukweluleka kwakhe kakulandelwanga, wabophela ubabhemi wakhe, wasuka waya ekhaya emzini wakhe; eselungisile izinto zomuzi wakhe, waseziphanyeka, wafa, wangcwatshelwa elibeni likayise.

UDavida useMahanayimi

²⁴ Kwathi lapho uAbisalomu esechapha iJordani kanye labo bonke bakoIsrayeli, uDavida wayesefikile eMahanayimi.

²⁵ UAbisalomu wayebeke uAmasa ukuba yinduna yamabutho esikhundleni sikaJowabi. UAmasa wayeyindodana yomuntu othiwa nguIthira wakoIshmayeli, owayethethe uAbigali indodakazi kaNahashi, udadewabo kaZeruya unakaJowabi.

²⁶ UIsrayeli loAbisalomu bamisa elizweni laseGileyadi.

²⁷ Kwathi uDavida esefikile eMahanayimi, uShobi indodana kaNahashi waseRaba waseAmoni, loMakiri indodana kaAmiyeli waseLodebari, loBarizilayi waseGileyadi elaseRogelimi,

²⁸ baletha amacansi lemiganu, lendiwo, lamabele, lebhali, lempuphu, lomumbu okhanzingiweyo, lendumba, lemibhida,

²⁹ lenyosi, lamasi, lezimvu, letshizi kuDavida labantu ababelaye ukuba badle; ngoba bathi: Abantu balambile, badiniwe, bomile enkangala.