2 USamuyeli 16 - iBhayibhili Elingcwele 1978

¹ Kwathi uDavida esedlule kancinyane engqongeni yentaba, wahlangabezwa nguZiba inceku kaMefiboshethi eqhuba obabhemi ababili ababotshelweyo, bethwele izinkwa ezingamakhulu amabili, lamahlukuzo alikhulu ezithelo ezomisiweyo zevini, lamahlukuzo alikhulu omkhiwa, lomgodla wewayini.

² UDavida wathi kuZiba: Uzakwenzani ngalezizinto na? UZiba waphendula wathi: Obabhemi ngabokugadwa ngabendlu yenkosi, izinkwa lomkhiwa ngokokudliwa yizinsizwa, lewayini ngelokunathwa ngabaphelelwa ngamandla enkangala.

³ Inkosi yasisithi: Ungaphi umzukulu wenkosi yakho na? UZiba wathi enkosini: Usele eJerusalema, ngoba uthe: Lamuhla uIsrayeli uzabuyisela kimi umbuso kababamkhulu.

⁴ Inkosi yasisithi kuZiba: Khangela, konke obekungokukaMefiboshethi sekungokwakho. UZiba wasesithi: Ngiyakhuleka; kangifumane umusa kuwe kokuphela, nkosi yami.

⁵ Kwathi lapho inkosi uDavida efika eBahurimi, kwaphuma khona umuntu wosendo lwendlu kaSawuli, ibizo lakhe linguShimeyi indodana kaGera; weza ehamba ethuka.

⁶ Wajikijela uDavida ngamatshe kanye lenceku zakhe zonke, labo bonke abantu lamaqhawe wonke ayengasesandleni sakhe sokunene langasekhohlo.

⁷ Yilokhu akutshoyo uShimeyi lapho ethuka, wathi: Hamba, hamba, wena muntu wegazi, muntu omubi!

⁸ INkosi uNkulunkulu yehlisele phezu kwakho lonke igazi lendlu kaSawuli obukade ubusa esikhundleni sakhe; inikele umbuso kuAbisalomu indodana yakho. Khangela, ububi bakho sebukuficile, ngoba wena ungumuntu wegazi.

⁹ UAbishayi indodana kaZeruya wasesithi enkosini: Linja efileyo iyithukelani inkosi yami na? Ngivumela ngiyeyiquma ikhanda.

¹⁰ Kodwa inkosi yathi: Kulihlupha ngani lokhu, lina madodana kaZeruya na? Uba engithuka ngoba iNkosi uNkulunkulu ithe kuye: Thuka uDavida; ngubani ongathi: Ukwenzeleni lokho na?

¹¹ UDavida wasesithi kuAbishayi lakuzo zonke inceku zakhe: Eyami indodana uqobo ifuna ukungibulala; phoke, kuzakuba njani ngalo owakoBenjamini na? Myekeleni athuke, ngoba iNkosi uNkulunkulu imlayile ukuba akwenze lokhu.

¹² Mhlawumbe izabona usizi lwami, ingilethele okuhle ngalokhu ukuthukwa kwalamuhla.

¹³ UDavida labantu bakhe bahamba ngendlela; uShimeyi wahamba eceleni kwentaba maqondana laye, wahamba ethuka, emjikijela ngamatshe, emthela ngothuli.

¹⁴ Inkosi labo bonke abantu ababelayo bafika eJordani sebekhathele; baphumula khona.

¹⁵ UAbisalomu labantu bonke bakoIsrayeli bafika eJerusalema, loAhithofeli wayelaye.

¹⁶ Kwathi lapho uHushayi waseArki, umngane kaDavida, efika kuAbisalomu, wathi kuAbisalomu: Bayethe nkosi! Bayethe nkosi!

¹⁷ UAbisalomu wathi kuHushayi: Yikho ukuthembeka kwakho lokhu kumngane wakho na? Kungani ungahambanga lomngane wakho na?

¹⁸ UHushayi wasesithi kuAbisalomu: Atshi bo, kungoba ngizakuba ngowalowo okhethwe yiNkosi uNkulunkulu layilababantu layibo bonke abantu bakoIsrayeli, ngihlale laye.

¹⁹ Futhi ngizakhonza bani na? Kangiyikukhonza indodana yakhe na? Njengoba ngakhonza uyihlo, lawe ngizakukukhonza ngokunjalo.

²⁰ UAbisalomu wasesithi kuAhithofeli: Ake useluleke, sizakwenza njani na?

²¹ Wathike uAhithofeli kuAbisalomu: Ngena abanye abafazi bakayihlo abatshiywe ukuba balinde indlu; wonke uIsrayeli uzakuzwa ukuba usuyisinengiso kuyihlo, baqine bonke abakulandelayo.

²² Basebemmisela ithente uAbisalomu phezu kophahla lwendlu; wangena abanye abafazi bakayise phambi kwabo bonke abakoIsrayeli.

²³ Kulezonsuku iseluleko sikaAhithofeli sasinjengokungathi umuntu ubuza kuNkulunkulu; sasinjalo iseluleko sikaAhithofeli kuDavida lakuAbisalomu.