2 USamuyeli 15 - iBhayibhili Elingcwele 1978

UAbisalomu uvukela uDavida

¹ Emva kwalokhu uAbisalomu wazidingela inqola yokulwa, lamabhiza, labantu abangamatshumi amahlanu ukuba bamkhaphe.

² UAbisalomu wayevuka ekuseni eme eceleni kwendlela eya esangweni lomuzi; kuthi wonke umuntu olecala eliya enkosini ukuba lithethwe, uAbisalomu ambize athi kuye: Ungowawuphi umuzi na? Kuthi lapho yena esithi: Inceku yakho ingowesinye sezizwe zakoIsrayeli;

³ uAbisalomu abesesithi kuye: Indaba yakho yinhle, ilungile, kodwa kakulamuntu obekwe yinkosi ukuba akuzwe.

⁴ UAbisalomu abesesithi: Kungathi ngabe ngibekwe umahluleli elizweni! Ng’khona bonke abaletha amacala lezindaba kimi bengizabalungisela.

⁵ Kuthi lapho kusondela umuntu ukuba akhuleke kuye, elule isandla sakhe, ambambe, amange.

⁶ UAbisalomu wenze njalo kubo bonke abakoIsrayeli abeza enkosini ngamacala; ngakho uAbisalomu wazithumba inhliziyo zabantu bakoIsrayeli.

⁷ Kwathi emva kweminyaka emine uAbisalomu wathi kuDavida: Ake ngiyegcwalisa isifungo sami engasifunga eNkosini uNkulunkulu eHebroni.

⁸ Ngoba mina nceku yakho ngafunga ngisahlala eGeshuri elaseAramu ngathi: Uba iNkosi uNkulunkulu ingibuyisela isibili eJerusalema, ngizakuyikhonza eHebroni.

⁹ Inkosi uDavida yathi kuye: Uhambe kuhle. UAbisalomu wasesuka esiya eHebroni.

¹⁰ Wasethuma izithunywa ezizweni zonke zakoIsrayeli esithi: Lapho lisizwa ukukhala kophondo, lithi: UAbisalomu uyinkosi eHebroni!

¹¹ Kwahamba loAbisalomu abantu abangamakhulu amabili abamenyiweyo besuka eJerusalema, bahamba bengesabi lutho, bengazi lutho.

¹² UAbisalomu esanikela umhlatshelo wabiza uAhithofeli waseGilo, umeluleki kaDavida, emzini wakhe eGilo. Ukuhlamuka kwaqina, labantu banda njalo ngakuAbisalomu.

¹³ Kwasekufika isithunywa kuDavida, sathi: Inhliziyo zabantu bakoIsrayeli sezibuyele ngakuAbisalomu.

¹⁴ Wasesithi uDavida encekwini zakhe zonke ezazilaye eJerusalema: Asibalekeni masinyane, ngoba uba singenzi njalo, kakuyikuphepha lamunye wethu kuAbisalomu. Phangisani, hlezi asifice asehlisele okubi, awuchithe umuzi ngomkhonto.

¹⁵ Inceku zenkosi zathi kuyo: Thina silungele ukwenza loba kuyini inkosi ekubona kufanele.

¹⁶ Yasiphuma inkosi, bayilandela bonke abendlu yayo. Inkosi yatshiya abanye abafazi bayo abalitshumi ukuba balinde indlu yayo.

¹⁷ Yahambake inkosi, bonke abantu bayilandela; bafika bema endlini yokucina.

¹⁸ Zonke inceku zayo zema phansi kwayo; kwathi amaKerethi lamaPelethi ayengabalindi, loIthayi kanye labantu baseGiti abangamakhulu ayisithupha, badlula phambi kwenkosi.

¹⁹ Inkosi yasisithi kuIthayi waseGiti: Uhambelani lathi na? Buyela uhlale lenkosi entsha, ngoba ungowezizweni lomxotshwa elizweni lakini.

²⁰ Ufike izolo nje; pho, lamuhla uzazulazula lami na? Kangazi lapho ngiya khona. Buyela ekhaya, uhambe labakini; iNkosi uNkulunkulu ikunike uthando olungapheliyo leqiniso.

²¹ Kodwa uIthayi wayiphendula inkosi wathi: Ngifunga iNkosi uNkulunkulu, futhi ngifunga wena nkosi yami, kuleyondawo ezakuba kiyo inkosi yami, loba kusekufeni loba kusekuphileni, izakuba khona lapho lenceku yakho.

²² UDavida wasesithi kuIthayi: Kulungile, dlulake, uhambe. Wasedlulake uIthayi waseGiti kanye labantu bakhe bonke labantwana ababelaye.

²³ Ilizwe lonke laduma ngokukhala kwabo. Inkosi yasala imi lapho abantu bechapha isifula iKidroni ngaphambi kwayo, ngendlela eya ngasenkangala.

²⁴ UZadoki laye wayekhona lawo wonke amaLevi; babethwele umtshokotsho wesivumelwano sikaNkulunkulu, bawubeka phansi eduze loAbiyatha baze baphuma bonke abantu emzini.

²⁵ Inkosi yasisithi kuZadoki: Buyisela umtshokotsho kaNkulunkulu emzini. Uba ngifumene umusa emehlweni eNkosi, izangibuyisa ngiwubone wona kanye lendlu yawo.

²⁶ Kodwa uba isithi: Kangithokozi ngawe; nanku ngikhona, kayenze kimi ekubona kufanele.

²⁷ Inkosi yaqhubeka yathi kuZadoki umpristi: Buyela emzini, wena loAbiyatha, uhambe lensizwa zombili, uAhimazi indodana yakho loJonathani indodana kaAbiyatha.

²⁸ Minake ngizalinda ngasemazibukweni asenkangala, kuze kufike ilizwi elivela kini lokungibikela.

²⁹ Ngakhoke uZadoki loAbiyatha bawubuyisela umtshokotsho kaNkulunkulu eJerusalema, bahlala khona.

³⁰ UDavida wasekhwela intaba ethiwa yiOliveti, ehamba ekhala, embomboze ikhanda lakhe, engafakanga amanyathelo; bonke abantu ababelaye bambomboza amakhanda abo, bahamba bekhala.

³¹ Kwabikwa kuDavida kwathiwa: UAhithofeli uphakathi kwabahlamuke loAbisalomu. UDavida wakhuleka wathi: Nkosi, ake uphendule amacebo kaAhithofeli abe yibuthutha.

³² Kwathi ukuba uDavida adundubale engqongeni yentaba lapho uNkulunkulu wayekhulekwa khona, wahlangabezwa nguHushayi waseArki umngane wakhe, ibhatshi lakhe lidatshuliwe, lekhanda lakhe ligcwele inhlabathi.

³³ UDavida wathi kuye: Uba uhamba lami, uzakuba ngumthwalo kimi.

³⁴ Kodwa uba ubuyela emzini uthi kuAbisalomu: Ngizakuba yinceku yakho, nkosi; kade ngiyinceku kayihlo, khathesi ngizakuba yinceku yakho; uzangichithela amacebo kaAhithofeli.

³⁵ Kuzakuba khona kanye lawe abapristi uZadoki loAbiyatha; ubatshele konke okuzwayo endlini yenkosi.

³⁶ Kukhona lapho lamadodana abo amabili, uAhimazi indodana kaZadoki, loJonathani indodana kaAbiyatha; uzangitshela ngabo konke ozakukuzwa.

³⁷ UHushayi umngane kaDavida wafika emzini, uAbisalomu engena eJerusalema.