2 USamuyeli 13 - iBhayibhili Elingcwele 1978

UAmnoni loTamari

¹ UAbisalomu indodana kaDavida wayelodadewabo omuhle othiwa nguTamari; uAmnoni enye yamadodana kaDavida wamthanda.

² UAmnoni wahlupheka kakhulu waze wagula ngenxa kadadewabo uTamari; ngoba wayeyintombi egcweleyo, kwabonakala kuAmnoni kunzima ukwenza ulutho kuye.

³ UAmnoni wayelomngane wakhe othiwa nguJonadabi indodana kaShimeya, umfowabo kaDavida; uJonadabi wayengumuntu olobuqili kakhulu.

⁴ Wathi kuye: Mntanenkosi, uhlotshiswa yini kangaka insuku ngensuku? Ungengitshele na? UAmnoni wathi kuye: Ngiyamthanda uTamari udadewabo kaAbisalomu umfowethu.

⁵ UJonadabi wasesithi kuye: Lala embhedeni wakho, uzitshaye ogulayo; kuthi lapho uyihlo efika ukukubona, uthi kuye: Ake kuze uTamari udadewethu, anginike ukudla, akulungise phambi kwami ukuba ngikubone, ngikwamukele esandleni sakhe kuphela.

⁶ Waselalake uAmnoni, wazitshaya ogulayo; lapho inkosi ifika ukuzambona, uAmnoni wathi kuyo: Ngicela uTamari udadewethu ukuba azekwenza amaqebelengwana amabili phambi kwami ukuba ngiwamukele esandleni sakhe.

⁷ UDavida wasethumela ilizwi endlini kuTamari esithi: Yana endlini yomfowenu uAmnoni, umlungisele ukudla.

⁸ Wasehambake uTamari, waya endlini kaAmnoni umfowabo, wamfica elele. Wathatha inhlama, wayixova, wenza amaqebelengwana phambi kwakhe, wawapheka.

⁹ Waseyephula imbiza, wawathululela phambi kwakhe. Kodwa uAmnoni wala ukudla, wathi kabaphume bonke abantu endlini. Basebephuma bonke abantu.

¹⁰ UAmnoni wasesithi kuTamari: Letha ukudla endlini yami yokulala ukuba ngidle esandleni sakho. UTamari wathatha amaqebelengwana ayewenzile, wawangenisa endlini yokulala kuAmnoni umnewabo.

¹¹ Lapho ewasondeza kuye ukuba awadle, wambamba, wathi kuye: Woza ulale lami, dadewethu.

¹² Yena wamphendula wathi: Atshi mnewethu, ungangibambi, ngoba lokhu kakwenziwa koIsrayeli, ungenzi lamanyala.

¹³ Minake ngingatshona ngaphi lehlazo lami na? Lawe uzaphenduka isiphukuphuku koIsrayeli. Ake ukhulume lenkosi, ngoba kayiyikwala lami.

¹⁴ Kodwa kamlalelanga; ngoba wayelamandla kulaye, wambamba walala laye.

¹⁵ UAmnoni wasemzonda kakhulu; ukumzonda kwakhe kwaba kukhulu ukwedlula ukumthanda kwakhe. Wathi kuye: Vuka uhambe.

¹⁶ Yena wathi kuye: Atshi, mnewethu; lobububi bokungixotsha bukhulu ukwedlula lokho ongenze khona. Kodwa kamlalelanga.

¹⁷ Wasebiza inceku eyayisebenza kuye, wathi: Susa lumfazi, umkhuphele phandle, ukhiye umnyango.

¹⁸ UTamari wayegqoke isigqoko esilemikhono emide, ngoba amadodakazi enkosi ayizintombi ayegqoka enze njalo. Leyonceku yaeimkhuphela phandle, yakhiya umnyango.

¹⁹ UTamari wasezithela ngomlotha ekhanda, wadabula isigqoko sakhe esilemikhono emide ayesigqokile, wathwala imikhono ekhanda, wahamba ekhala kakhulu.

²⁰ UAbisalomu umnewabo wathi kuye: Umnewenu uAmnoni kade elawe na? Thula, dadewethu, yena ungumnewenu; ungazidubi ngalokhu. UTamari wahlala yedwa edanile endlini kaAbisalomu umnewabo.

²¹ Inkosi uDavida isizwile zonke lezizinto yathukuthela kakhulu; kodwa yayingathandi ukumhlupha uAmnoni ngoba wayelizibulo layo imthanda.

²² UAbisalomu wayengasamkhulumisi uAmnoni, wamzonda ngoba ebambe udadewabo uTamari.

UAbisalomu ubulala uAmnoni; abesebaleka

²³ Emva kweminyaka emibili epheleleyo uAbisalomu egunda izimvu zakhe eBali‐Hazori eliseduze leEfrayimi, wamema wonke amadodana enkosi.

²⁴ Waya enkosini uDavida wathi: Inceku yakho iyagunda izimvu; inkosi ake ize lenceku zayo.

²⁵ Kodwa inkosi yathi kuAbisalomu: Atshi, ndodana yami, kasingezi sonke sibe ngumthwalo kuwe. Wayibamba ngamandla kodwa kayivumanga ukuhamba, kodwa yamtshela ukuba ahambe.

²⁶ UAbisalomu wasesithi: Kulungile, kodwa uAmnoni umfowethu kahambe lathi. Inkosi yathi: Uzahambelani lawe na?

²⁷ UAbisalomu waphikelela, yaze yavuma ukuba uAmnoni lawo wonke amadodana enkosi ahambe laye. UAbisalomu wasesenza idili elifanele inkosi.

²⁸ UAbisalomu waselaya inceku zakhe esithi: Khangelani, nxa uAmnoni esethokoza ngewayini, lapho ngisithi kini: Bulalani uAmnoni, limbulale. Lingesabi, ngoba ngizabe ngililayile. Lime isibindi, libe ngamaqhawe.

²⁹ Inceku zikaAbisalomu zenza kuAmnoni njengoba ayezilayile. Amadodana wonke enkosi asesuka, egada imbongolo zawo ebaleka.

³⁰ Kwathi besesendleleni, kwafika ilizwi kuDavida elithi: UAbisalomu usebulele wonke amadodana enkosi, kakusalanga leyodwa.

³¹ Inkosi yasisukuma idabula izigqoko zayo, yalala phansi; zonke inceku zayo zazimi lapho izigqoko zazo zidatshuliwe.

³² UJonadabi indodana kaShimeya, umfowabo kaDavida, wathi: Inkosi yami kayingathi babulele wonke amadodana enkosi, ngoba nguAmnoni yedwa ofileyo; ngoba uAbisalomu wazimisela ukwenza lokhu kusukela osukwini uAmnoni abamba ngalo udadewabo uTamari.

³³ Ngakhoke inkosi yami kayingakubeki lokhu enhliziyweni, icabange ukuthi wonke amadodana enkosi afile, ngoba nguAmnoni yedwa ofileyo.

³⁴ UAbisalomu wabaleka. Umlindi olindayo wakhangela, wabona abantu abanengi besehla entabeni ngaseHoronayimi. Weza wabikela inkosi wathi: Ngibona abantu abanengi besehla entabeni ngaseHoronayimi.

³⁵ UJonadabi wathi enkosini: Nanka amadodana enkosi asefikile, njengokutsho kwenceku yakho.

³⁶ Kwathi eseqedile ukukhuluma, afika amadodana enkosi, adazuluka, akhala; lenkosi lazo zonke inceku zayo zakhala kakhulu.

³⁷ Kodwa uAbisalomu wabalekela kuTalimayi indodana kaAmihudi inkosi yaseGeshuri. UDavida wayililela indodana yakhe isikhathi eside.

³⁸ Wabalekake uAbisalomu, waya eGeshuri, wahlala khona iminyaka emithathu.

³⁹ Inhliziyo kaDavida yamkhanuka uAbisalomu kakhulu, ngoba wayeseduduzekile ngokufa kukaAmnoni.