2 USamuyeli 12 - iBhayibhili Elingcwele 1978

UNathani umkhuza uDavida

¹ INkosi yasithuma uNathani umprofethi kuDavida. Wafika wathi kuye: Kwakukhona amadoda amabili emzini othile, enye yayinothile, enye yayingumyanga.

² Enothileyo yayilezimvu lenkomo ezinengi kakhulu.

³ Kodwa engumyanga yayingelalutho, yeyilemvana ensikazi kuphela eyayiyithengile. Yayondla, yakhulela kuyo lebantwaneni bayo. Yadla ukudla kwayo, yanathela enkezweni yayo; yalala esifubeni sayo, yayinjengendodakazi kiyo.

⁴ Kwafikela isihambi endodeni enothileyo, kayifunanga ukuthatha ezimvini zayo lenkomeni zayo ukuhlabela isihambi esasifikele kiyo, kodwa yathatha imvana yendoda engumyanga, yayihlabela umuntu owayefikele kiyo.

⁵ UDavida wathukuthela kakhulu ngalowomuntu, wathi kuNathani: Ngifunga iNkosi, umuntu owenze lokho, ufanele ukufa.

⁶ Uzayibuyisela imvana iphindwe kane, ngoba enze lokho engabanga lesihawu.

⁷ UNathani wasesithi kuDavida: Nguwe lowomuntu. INkosi, uNkulunkulu kaIsrayeli, ithi: Ngakugcoba waba yinkosi koIsrayeli, ngakukhulula esandleni sikaSawuli.

⁸ Nganikela umbuso wenkosi yakho labafazi bayo ezandleni zakho, ngakunika lendlu kaIsrayeli lekaJuda; uba lokho bekukuncinyane, bengingakwengezelela ngokungangalokho futhi.

⁹ Udeleleni ilizwi leNkosi ukuba wenze okubi emehlweni ayo na? Ubulele uUriya umHethi ngomkhonto, umbulele ngomkhonto wamaAmoni, wathatha umkakhe waba ngowakho.

¹⁰ Ngakhoke umkhonto kawuyikusuka endlini yakho, ngoba ungidelele, wathatha umkaUriya umHethi ukuba abe ngumkakho.

¹¹ INkosi uNkulunkulu ithi: Ngizakukuvusela okubi okuvela endlini yakho; ngithathe omkakho phambi kwakho, ngibanike umakhelwane wakho, alale labo obala.

¹² Ngoba wena wakwenza ensitha; kodwa mina ngizakwenza lokhu phambi kukaIsrayeli wonke obala.

¹³ UDavida wasesithi kuNathani: Ngonile eNkosini. UNathani wathi kuDavida: LeNkosi isusile isono sakho; kawuyikufa.

¹⁴ Kodwake ngoba ngalesisenzo uyidelele iNkosi, umntwana ozamzalelwa uzakufa.

¹⁵ UNathani wasebuyela endlini yakhe. INkosi uNkulunkulu yamtshaya ngesifo umntwana owazalwa nguDavida kumkaUriya, wagula.

¹⁶ UDavida wamkhulekela kuNkulunkulu umntwana; wazila ukudla, wangena walala phansi ubusuku bonke.

¹⁷ Abadala bendlu yakhe bazama ukumvusa phansi; kodwa wala, futhi kavumanga ukudla labo.

¹⁸ Kwathi ngosuku lwesikhombisa umntwana wafa. Inceku zikaDavida zesaba ukumtshela ukuba umntwana usefile; ngoba zathi: Umntwana esaphila sakhuluma laye, kasilalelanga; pho, singamtshela kanjani ukuthi umntwana usefile na? Mhlawumbe angazenza okubi.

¹⁹ Kodwa lapho uDavida ebona ukuba inceku zakhe ziyanyenyezelana, wabona ukuba umntwana usefile; wathi encekwini zakhe: Umntwana usefile na? Zathi: Usefile.

²⁰ UDavida wasevuka phansi, wageza, wazigcoba, wagqoka ezinye izigqoko; wangena endlini yeNkosi wakhuleka; wasesiya endlini yakhe, wacela ukuba bamlethele ukudla; sekulethiwe, wadla.

²¹ Inceku zakhe zasezisithi: Kuyini lokhu okwenzileyo na? Uzile ukudla, wamkhalela umntwana esaphila; kodwa lapho esefile, uvukile wadla.

²² Yena wathi: Umntwana esaphila, ngizile ukudla, ngakhala, ngoba ngithe: Ngubani owaziyo ukuthi mhlawumbe iNkosi izakuba lomusa kimi ukuba umntwana aphile na?

²³ Kodwa khathesi usefile; ngizazilelani na? Ngingambuyisa na? Mina ngizakuya kuye, kodwa yena kayikubuya kimi.

²⁴ UDavida wamduduza uBathisheba umkakhe, waya kuye walala laye; wazala indodana, wayitha ibizo wathi nguSolomoni. INkosi uNkulunkulu yamthanda umfana,

²⁵ yathuma ilizwi ngoNathani umprofethi, yathi ngenxa yothando lwayo kabizwe ngokuthi nguJedidiya.

UDavida unqoba iRaba

²⁶ UJowabi wahlasela iRaba umuzi waseAmoni, wathatha isigaba esilechibi.

²⁷ Wathuma izithunywa kuDavida wathi: Ngihlasele iRaba, ngathatha ichibi.

²⁸ Ngakhoke buthanisa abantu abaseleyo, uwuvimbezele umuzi, uwuthathe, funa ngiwuthathe mina, ubusubizwa ngebizo lami.

²⁹ UDavida wasebuthanisa bonke abantu, waya eRaba, walihlasela, walithatha.

³⁰ Wathatha umqhele kankulunkulu wabo uMilkomu owawenziwe ngegolide elinzima kakhulu, owawulelitshe eliligugu wawubeka kwelakhe ikhanda. Wathatha emzini lowo impango enengi kakhulu.

³¹ Wathatha labantu ababephakathi kwawo, wabasebenzisa ngamasaha, langamapiki, langamahloka ensimbi, basebenza emahondweni ezitina; wenza njalo kuyo yonke imizi yamaAmoni. UDavida labo bonke abantu babuyela eJerusalema.