2 USamuyeli 11 - iBhayibhili Elingcwele 1978

UDavida loBathisheba

¹ Ekuthwaseni komnyaka ngesikhathi sokuhlasela kwamakhosi, uDavida wathuma uJowabi kanye lenceku zakhe, loIsrayeli wonke, bahlasela amaAmoni, bavimbezela iRaba. Kodwa yena wasala eJerusalema.

² Kwathi ngolunye usuku kusihlwa uDavida wavuka embhedeni wakhe, wahambahamba phezu kophahla lwendlu yenkosi, wabona esophahleni owesifazana egeza; wayemuhle kakhulu, ebukeka.

³ UDavida wasethumela ilizwi ukubuza ngalowowesifazana. Kwathiwa: Lowo nguBathisheba indodakazi kaEliyamu, umkaUriya umHethi.

⁴ UDavida wathuma izithunywa ukumthatha, wafika kuye, walala laye, lanxa wayengakahlambuluki ezibukweni lakhe. Wasebuyela endlini yakhe.

⁵ Owesifazana waba lesisu, wasethumela ilizwi ukumtshela uDavida ukuba uselesisu.

⁶ UDavida wasethumela ilizwi kuJowabi wathi: Thumela kimi uUriya umHethi. UJowabi wasemthumela.

⁷ Esefikile kuye uUriya, uDavida wambuzabuza ngoJowabi langokuba abantu banjani, lokuthi impi iqhubeka njani.

⁸ UDavida wasesithi kuUriya: Yana endlini yakho, ugeze inyawo zakho. Wasephuma endlini yenkosi uUriya, walandelwa yisipho esivela enkosini.

⁹ Kodwa uUriya kayanga endlini yakhe, walala ngasemnyango wendlu yenkosi kanye lenceku zonke zenkosi yakhe.

¹⁰ Kwathi uDavida esetsheliwe ukuthi uUriya kayanga endlini yakhe, uDavida wathi kuye: Kawuveli ekuhambeni na? Yini ungayanga endlini yakho na?

¹¹ U‐Uriya wathi kuDavida: Umtshokotsho wesivumelwano, loIsrayeli, loJuda bahlala emadumbeni; inkosi yami uJowabi lenceku zenkosi yami bamisile emmangweni; minake ngizakuya endlini yami, ngidle, nginathe, ngilale lomkami na? Ngifunga wena, kangiyikuyenza leyonto.

¹² UDavida wasesithi kuUriya: Hlala lapha lalamuhla, kusasa ngizakuvumela ukuba uhambe. U‐Uriya wasehlala eJerusalema ngalolosuku.

¹³ Ngosuku olulandelayo uDavida wammema ukuba adle anathe laye, wamdakisa; kodwa kusihlwa waphuma wayalala embhedeni wakhe kanye lenceku zenkosi, kayanga endlini yakhe.

¹⁴ Kwathi kusisa uDavida walobela uJowabi incwadi, wayiphathisa uUriya.

¹⁵ Waloba encwadini ukuthi: U‐Uriya limmise ngaphambili, lapho impi itshisa khona, beselihlehla limyekela ebulawa.

¹⁶ Kwathi lapho uJowabi esewuvimbezela umuzi, wamisa uUriya lapho azi ukuthi kukhona amaqhawe alamandla.

¹⁷ Abantu baphuma balwa loJowabi; kwafa abantu abathile encekwini zikaDavida, wafa laye uUriya umHethi.

¹⁸ UJowabi wasethumela isithunywa ukubikela uDavida zonke indaba zempi;

¹⁹ wasilaya wathi: Lapho usuqedile ukuyibikela inkosi zonke indaba zempi,

²⁰ kuthike lapho inkosi ithukuthela, isithi kuwe: Belisondelelani kangaka emzini ukulwa na? Belingazi yini ukuthi bebezakuciba besemdulini na?

²¹ Ngubani owabulala uAbimeleki indodana kaJerubeshethi na? Angithi owesifazana othile ephezu komduli wamwisela ngelitshe lokuchola, wafa eThebezi na? Lisondeleleni kangaka eduze lomduli na? Ubususithi: Inceku yakho uUriya umHethi laye ufile.

²² Sasesihambake isithunywa, safika sambikela uDavida konke esasikuthunywe nguJowabi. UDavida wamthukuthelela uJowabi, wathi esithunyweni: Belisondelelani kangaka emzini ukulwa na? Belingazi yini ukuthi bebezakuciba besemdulini na? Ngubani owabulala uAbimeleki indodana kaJerubeshethi na? Angithi owesifazana othile ephezu komduli wamjikijela ngembokodo, wafa eThebezi na? Lisondeleleni kangaka eduze lomduli na?

²³ Isithunywa sathi kuDavida: Abantu basihlanganyela, basiphumela ngaphandle; kodwa sabadudula kwaze kwaba sesangweni.

²⁴ Abemitshoko bephezu komduli baciba inceku zakho; zifile ezinye inceku zenkosi; ifile lenceku yakho uUriya umHethi.

²⁵ UDavida wasesithi kuso isithunywa: Uzamtshela uJowabi, uthi: Lokho kungakuhluphi, ngoba umkhonto udla lo lalowana; uwuhlasele uqinise umuzi, uwuchithe: ubusummisa isibindi.

²⁶ Lapho umkaUriya esezwile ukuthi uUriya indoda yakhe ufile, wayililela indoda yakhe.

²⁷ Sekuphelile ukulila, uDavida wambiza, wamletha endlini yakhe; waba ngumkakhe, wamzalela indodana. Kodwa leyonto eyenziwa nguDavida yayimbi eNkosini.