2 USamuyeli 10 - iBhayibhili Elingcwele 1978

Ukwahlulwa kwamaAmoni lamaSiriya

¹ Kwathi emva kwalokho inkosi yamaAmoni yafa, uHanuni indodana yayo waba yinkosi esikhundleni sayo.

² UDavida wathi: Ngizamenzela umusa uHanuni indodana kaNahashi njengoba uyise wangenzela umusa. UDavida wasethuma inceku zakhe ukuyamkhalela ngoyise. Zafikake elizweni lamaAmoni.

³ Izikhulu zamaAmoni zathi kuHanuni inkosi yazo: Kambe ucabanga ukuthi uDavida uthumele abaduduzi kuwe ukuba ahloniphe uyihlo na? Kazithumanga yini inceku zakhe kuwe ukuba ziphenye umuzi, ziwuhlole, ziwuchithe na?

⁴ UHanuni wasezibamba inceku zikaDavida, wazigela indevu nganxanye, waquma ingubo zazo zafika ezinqeni, wasezixotsha.

⁵ Esekubikelwe lokho uDavida wathumela umuntu ukuzihlangabeza ngoba ayeselenhloni kakhulu lawomadoda; wasesithi: Hlalani eJeriko zize zihlume indevu zenu, beselibuyake.

⁶ Lapho amaAmoni esebonile ukuba aseyisinengiso kuDavida, aqatsha amaSiriya aseBeti‐Rehobi lawaseZoba, amabutho ahamba ngenyawo ayeyizinkulungwane ezingamatshumi amabili, lenkosi yaseMahaka ilabantu abayinkulungwane, labantu baseTobi abazinkulungwane ezilitshumi lambili.

⁷ Kwathi lapho uDavida esekuzwile lokho wathumela uJowabi layo yonke impi yamaqhawe.

⁸ AmaAmoni aphuma amisa impi ngasesangweni lomuzi; amaSiriya eZoba lawaseRehobi, labantu baseTobi labaseMahaka babebodwa egangeni.

⁹ Lapho uJowabi esebonile ukuba impondo zempi zimhanqile ngaphambili langemuva, wakhetha abanye kwabakhethiweyo koIsrayeli, wabahlela ukuba balwe lamaSiriya.

¹⁰ Abanye abaseleyo wabanikeza kuAbishayi umfowabo, owabahlela ukuba balwe lamaAmoni.

¹¹ UJowabi wathi kuye: Uba amaSiriya engahlula, uzengisiza; uba amaAmoni ekwahlula, ngizakuza ukukusiza.

¹² Mana isibindi; asidode ngenxa yabantu bakithi, langenxa yemizi kaNkulunkulu wethu; intando yeNkosi uNkulunkulu kayenziwe.

¹³ UJowabi labantu ababelaye basebesondela ukuba balwe lamaSiriya; abaleka phambi kwabo.

¹⁴ Lapho amaAmoni ebona ukuba amaSiriya ayabaleka, abaleka lawo phambi kukaAbishayi, angena emzini. UJowabi wasebuya ekulweni lamaAmoni, waya eJerusalema.

¹⁵ AmaSiriya esebonile ukuthi ahluliwe nguIsrayeli, abuthana ndawonye.

¹⁶ UHadadezeri wathumela ilizwi ukubiza amaSiriya ayengaphetsheya kweYufrathi, afika eHelamu eholwa nguShobaki induna yempi kaHadadezeri.

¹⁷ Lapho uDavida ebikelwa lokho, wabuthanisa wonke uIsrayeli, wachapha iJordani, wafika eHelamu. AmaSiriya azihlelela ukulwa loDavida.

¹⁸ AmaSiriya abaleka phambi kukaIsrayeli; uDavida wabulala amaSiriya ezinqola zokulwa angamakhulu ayisikhombisa, labamabhiza abazinkulungwane ezingamatshumi amane, walimaza uShobaki induna yempi, wafela khona lapho.

¹⁹ Lapho wonke amakhosi ayebuswa nguHadadezeri esebonile ukuba ahlulwe nguIsrayeli, axolisana loIsrayeli, athela. Ngakho amaSiriya asesesaba ukusiza amaAmoni futhi.