2 UPhethro 3 - iBhayibhili Elingcwele 1978

Ukufika kosuku lweNkosi

¹ Bathandekayo, le yincwadi yesibili engililobele yona. Kuzo zombili ngivuse ingqondo zenu eziqotho ngokulikhumbuza,

² ukuze likhumbule amazwi atshunyayelwa ngaphambili ngabaprofethi abangcwele, lomlayo weNkosi loMsilisi owatshunyayelwa ngabaphostoli benu.

³ Kuqala yazini lokhu ukuthi ngezinsuku zokucina kuzakufika abahleka ulunya, behamba ngezinkanuko zabo,

⁴ besithi: Singaphi isithembiso sokufika kwakhe na? Ngoba sekulokho obaba bafa, konke kumi kunjalo njengasekuqaleni kokudalwa.

⁵ Bakhohlwa yikuthi izulu lalikhona endulo, lokuthi umhlaba wavela emanzini wenziwa ngawo amanzi ngelizwi likaNkulunkulu,

⁶ lokuthi ilizwe elalikhona labhujiswa ngokukhukhulwa ngawo amanzi.

⁷ Izulu lomhlaba okukhona khathesi kubekelwe umlilo ngalona lelolizwi, kulindele usuku lokulahlwa lokubhujiswa kwabantu abeyisa uNkulunkulu.

⁸ Bathandekayo, lingakhohlwa lintonye eyokuthi kuyo iNkosi usuku olulodwa lunjengeminyaka eyinkulungwane, leminyaka eyinkulungwane injengosuku lunye.

⁹ INkosi kayilibali ukusigcwalisa isithembiso sayo njengalokhu abanye besithi iyalibala, kodwa iyalibekezelela ingathandi ukuba kubhubhe lamunye, kodwa ukuba bonke bafinyelele ekuphendukeni.

¹⁰ Kodwa usuku lweNkosi luzakufika njengesela, kuthi izulu lidlule ngokuhlokoma okukhulu, konke kuncibilikiswe ngumlilo, lomhlaba lemisebenzi ekuwo kuzakutsha.

¹¹ Njengoba konke kuzakuncibilika ngokunjalo, kumele ukuba linanzelele ukuthi lingabantu abanjani ekuhambeni kwenu okungcwele lasekukhonzeni uNkulunkulu,

¹² lisalindele lilangatha ukufika kosuku lukaNkulunkulu, usuku oluzakuncibilikisa izulu ngomlilo, konke kutshiswe kuncibilike.

¹³ Kodwa ngokwesithembiso sakhe silindele izulu elitsha lomhlaba omutsha okukhona kuwo ukulunga.

¹⁴ Ngakho, bathandekayo, lokhu lisalindele lezozinto, tshisekelani ukuba lifunyanwe nguye lingelacwatshana, lingelasici, lilokuthula.

¹⁵ Lithi ukubekezela kweNkosi yethu kuyikusilisa, njengalokhu lomzalwane wethu othandekayo uPawuli walilobela, watsho njalo ngokuhlakanipha akuphiweyo;

¹⁶ utsho njalo lasencwadini zakhe zonke, okukhona kuzo izinto ezilukhuni ukuzwakala, okuthi abangaziyo labangaqinanga bazihlanekele njengokwenza kwabo, lakweminye imibhalo bazibhubhise ngakho.

¹⁷ Ngakhoke, bathandekayo, njengalokhu selikwazi lokho ngaphambili, xwayani ukuze lingaduhiswa yikukhohlisa kwabantu abangelamlayo, liwe ekuqineni kwenu.

¹⁸ Kodwa khulani emuseni lasekwazini iNkosi yethu loMsilisi uJesu Kristu. Kakube kuye ubukhosi khathesi kuze kube lusuku olungapheliyo.