2 UPhethro 2 - iBhayibhili Elingcwele 1978

UPetro uxwayisa ngabafundisi bamanga

¹ Kodwa kwavela abaprofethi bamanga phakathi kwabantu, njengokuba lakini kuzakuba khona abafundisi bamanga abazakungenisa ngensitha izifundiso ezichithayo, bephika iNkosi eyabathengayo, bezilethela ngokuphangisa ukuchitheka.

² Abanengi bazakulandela amanyala abo; langenxa yabo indlela yeqiniso izakuthukwa.

³ Ekufiseni kwabo imali bazakuthengiselana ngani ngamazwi obuqili; ukulahlwa kwabo sekukade kusebenza phakathi kwabo, lokuchitheka kwabo kakuwozeli.

⁴ UNkulunkulu kaziyekelanga izithunywa ezonayo, kodwa waziphosela esihogweni ezinikela emigodini yomnyama, ukuba zigcinwe kuze kube lusuku lokulahlwa.

⁵ Kaliyekelanga ilizwe lasendulo mhla eletha uzamcolo emhlabeni oweyisa uNkulunkulu, kodwa walondoloza uNowa owayengumtshumayeli wokulunga kanye labanye abayisikhombisa.

⁶ Lemizi yaseSodoma laseGomora wayichitha ngokuyitshisa ngomlilo, eyenza ibe yisibonelo kulabo abeyisa uNkulunkulu.

⁷ Kodwa wamophula uLoti olungileyo, owahlutshwa yikuhamba okubi kwabangalunganga;

⁸ ngoba lowomuntu olungileyo, ngokuhlala kwakhe phakathi kwabo, wezwa ubuhlungu emphefumulweni wakhe ngokubona lokuzwa insuku zonke izinto ezimbi ezenziwayo yibo.

⁹ Ngakhoke iNkosi iyakwazi ukubophula ekulingweni labo abamkhonzayo uNkulunkulu, lokubagcina ababi ekutshayweni kuze kube lusuku lokuthonisiswa,

¹⁰ ikakhulu bona abazithokozisa ngenkanuko ezingcolisayo, bedelela amandla eNkosi. Abalenkani abaziqakisayo kabesabi ukuhlambaza labo abalenkazimulo;

¹¹ kanti izithunywa, lanxa zizinkulu ngamandla azo, kazibamangaleli ngenhlamba phambi kukaNkulunkulu.

¹² Kodwa lababantu bahlambaza izinto abangazaziyo, banjengezinyamazana ezingelangqondo, ezazalelwa ukubanjwa lokubulawa, labo bazakubhujiswa ekubhujisweni kwazo,

¹³ bamukele umvuzo ngokungalungi kwabo. Bathi kuyikuthokoza ukuminza emini, bengcolile, bebabi, beminza ekuthokozeni kwabo, bezitika lani.

¹⁴ Balamehlo akhangele ubufebe langayekeli ukukhangela isono; bayenga ababuthakathaka; balenhliziyo ezejwayele ubuhwaba; bangabantwana abaqalekisiweyo;

¹⁵ batshiye indlela eqondileyo, baduha, balandela indlela kaBalami, indodana kaBeyori, owayethanda inzuzo yokwenza okubi,

¹⁶ kodwa wasolwa ngenxa yeziphambeko zakhe; ubabhemi oyisimungulu wakhuluma ngelizwi lomuntu, wanqanda ubuhlanya bomprofethi.

¹⁷ Laba bayimithombo engelamanzi, lenkungu eqhutshwa yisiphepho, abagcinelwe umnyama omkhulu.

¹⁸ Ngokuziqakisa okuyize bayabayenga ngezinkanuko zomzimba langamanyala labo asebephose baphuma ekuduheni;

¹⁹ bebathembisa inkululeko, kanti bona uqobo bayizigqili zokubola; ngoba lokho umuntu ahlulwa yikho uyisigqili sakho.

²⁰ Uba emva kokuba sebephephile ekungcoleni komhlaba ngokuyazi iNkosi yethu loMsilisi uJesu Kristu, babuye behilelwa, bahlulwa yikho, ukucina kwabo kubi kulokuqala.

²¹ Ngoba ngabe kwaba ngcono kibo uba babengayazanga indlela yokulunga kulokuba kuthi sebeyazile bafulathele umlayo ongcwele ababewunikiwe.

²² Kubehlele ngokwesaga esiqinisileyo esithi: Inja ibuyela emahlanzweni ayo; lokuthi: Ingulube igeziswa ibuye iphindele ekuzibhixeni ngodaka.