2 UJohane 1 - iBhayibhili Elingcwele 1978

Isibingelelo

¹ Mina omdala, ngilobela yona inkosikazi ekhethiweyo labantwana bayo engibathanda ngeqiniso, kungesimi ngedwa kodwa labo bonke abalaziyo iqiniso,

² ngenxa yeqiniso elihlala kithi lelizakuba lathi kuze kube nininini,

³ ngithi: Kuzakuba lathi umusa lesihawu lokuthula okuvela kuNkulunkulu uBaba lakuJesu Kristu iNdodana kaBaba, ngeqiniso langothando.

Iqiniso lothando

⁴ Ngathokoza kakhulu ngoba ebantwaneni bakho ngifumene abathile abahamba eqinisweni, njengokulaywa kwethu nguBaba.

⁵ Ngakhoke ngiyakuncenga, nkosikazi, kungesikho ukuthi ngikulobela umlayo omutsha, kodwa wona lowo esasilawo kusukela ekuqaleni owokuthi asithandane.

⁶ Yilolu uthando ukuba sihambe ngemilayo yakhe; yilo umlayo ukuba lihambe ngothando, njengoba lawuzwa kusukela ekuqaleni.

⁷ Ngoba abakhohlisi abanengi baphumele emhlabeni, abantu abangavumiyo ukuthi uJesu Kristu weza waba ngumuntu. Lababantu bangabakhohlisi labaphikukristu.

⁸ Qaphelani ukuze lingalahlekelwa ngeselikusebenzele, kodwa lamukele umvuzo opheleleyo.

⁹ Lowo oweqisayo, angemi ekufundiseni kukaKristu, kalaye uNkulunkulu; ohlala ekufundiseni kukaKristu lowo ulaye uBaba leNdodana.

¹⁰ Uba kufika umuntu kini engalethi lokhukufundisa, lingamngenisi endlini, futhi lingambingeleli;

¹¹ ngoba lowo ombingelelayo uhlanganyela laye emisebenzini yakhe emibi.

Isicino

¹² Lanxa ngilokunengi engingalilobela ngakho, kangithandi ukukuloba ephepheni ngeyinki, kodwa ngithemba ukuza kini, ngikhulume lani sikhangelene, ukuze ukuthokoza kwethu kuphelele.

¹³ Abantwana bakadadewenu okhethiweyo bayakubingelela.