2 ImiLando 8 - iBhayibhili Elingcwele 1978

Ezinye izenzo zikaSolomoni

¹ Emva kweminyaka engamatshumi amabili uSolomoni akhile ithempeli lendlu yakhe,

² wabuye wavusa imizi uHuramu ayemnike yona, wahlalisa abakoIsrayeli kiyo.

³ Wayahlasela iHamathi‐Zoba, walinqoba.

⁴ Wakha iTadimori enkangala layo yonke imizi yokugcinela amabele ayakha eHamathi.

⁵ Wakha leBeti‐Horoni elingaphezulu leBeti‐Horoni elingaphansi, imizi ebiyelweyo elemithangala lamasango alemigoqo,

⁶ wakha leBalathi, lemizi yonke yokugcinela amabele ayelayo, leyokugcinela izinqola zakhe lamabhiza akhe, loba kuyini ayefisa ukukwakha khona eJerusalema, laseLebanoni, lakulo lonke ilizwe lombuso wakhe.

⁷ Abantu bonke ababesele kumaHethi lakumaAmori lakumaPerizi lakumaHivi lakumaJebusi, ababengeyisibo abakoIsrayeli,

⁸ inzalo yabo eyayisele elizweni abangayibulalanga abakoIsrayeli uSolomoni wababutha izibhalwa; banjalo kuze kube lamhla.

⁹ Kodwa abakoIsrayeli uSolomoni kabenzanga izigqili zomsebenzi, wabenza amabutho, lezinduna zakhe, labaphathi bezinqola zakhe zokulwa, labagadi bamabhiza akhe.

¹⁰ Laba baba zinduna ezinkulu zenkosi uSolomoni, babengamakhulu amabili lamatshumi amahlanu bephethe abantu.

¹¹ USolomoni wasesusa indodakazi kaFaro emzini kaDavida, wayisa endlini ayeyakhele yona ngoba wathi: Umkami kayikuhlala endlini kaDavida inkosi yakoIsrayeli, ngoba izindawo lapho kwakusiwe khona umtshokotsho wesivumelwano seNkosi zingcwele.

¹² USolomoni wasenikela eNkosini iminikelo yokutshiswa phezu kwealtare leNkosi ayelakhile ngaphambi komkoto,

¹³ njengokumiselwe lolo lalolosuku, wanikela njengokumiswe ngumlayo kaMose ngamaSabatha, langokuthwasa kwenyanga, langemikhosi emithathu yomnyaka, umkhosi wesinkwa esingelamvubelo, umkhosi wamaviki, lomkhosi wamadumba.

¹⁴ Ngesimiso sikaDavida uyise wamisa izigaba zabapristi zenkonzo yabo, lezamaLevi zokuhlabelela izindumiso lokusiza abapristi njengokufunekayo ngalolo lalolosuku, lezabalindi bamasango kulelo lalelosango; ngoba wayetsho njalo uDavida umuntu kaNkulunkulu.

¹⁵ Kaphambukanga kulokho inkosi uDavida eyayikutshilo mayelana labapristi lamaLevi lezindlu zenotho.

¹⁶ Waphelake wonke umsebenzi kaSolomoni kusukela osukwini lokubekwa kwesisekelo sethempeli laze laphela ukwakhiwa. Kwaphelake ukwakhiwa kwethempeli.

¹⁷ USolomoni wasesiya eZiyoni‐Geberi laseElathi ngasolwandle elizweni laseEdoma.

¹⁸ UHuramu wathumela kuye imikolo ephethwe zinduna zakhe, lenceku ezejwayele ulwandle, zaya eOfiri kanye lenceku zikaSolomoni, zalanda khona igolide elingamathalenta angamakhulu amane lamatshumi amahlanu, zaliletha enkosini uSolomoni.