2 ImiLando 6 - iBhayibhili Elingcwele 1978

Umkhuleko kaSolomoni

¹ USolomoni wasesithi: Nkosi, wena okhethe ukuhlala emnyameni omkhulu

² ngikwakhele indlu ephakemeyo, indawo ongahlala kiyo kuze kube nini lanini.

³ Inkosi uSolomoni yasiphenduka, yalibusisa lonke ibandla lakoIsrayeli elalimi.

⁴ Yathi: Kayibongwe iNkosi, uNkulunkulu kaIsrayeli, egcwalise ngesandla sayo lokho eyakuthembisa kuDavida ubaba isithi:

⁵ Kusukela ekubakhupheni kwami abantu bami eGibithe kangikhethanga muzi ezizweni zonke zakoIsrayeli ukwakhela khona indlu yami, ukuba ibizo lami lidunyiselwe khona, kangikhethanga muntu ukuba ngumbusi wabantu bami bakoIsrayeli;

⁶ kodwa ngakhetha iJerusalema ukuba ibizo lami lidunyiselwe khona, ngakhetha uDavida ukuphatha abantu bami uIsrayeli.

⁷ Kwakuyisifiso sikababa uDavida ukwakhela iNkosi, uNkulunkulu kaIsrayeli, indlu.

⁸ Kodwa iNkosi yathi kubaba uDavida: Njengoba bekuyisifiso sakho ukungakhela indlu, wenze kuhle ukufisa lokho;

⁹ kodwake kawuyikuyakha indlu wena, indodana ozakuyizala yiyo ezakungakhela indlu.

¹⁰ INkosi isigcwalisile isithembiso eyasenzayo, ngoba mina ngingenile esikhundleni sikababa uDavida, ngiyabusa uIsrayeli, sengiyakhele iNkosi, uNkulunkulu kaIsrayeli, indlu.

¹¹ Ngiwubeke khona umtshokotsho wesivumelwano seNkosi eyasenza labantu bakoIsrayeli.

¹² USolomoni wasesima phambi kwealtare leNkosi phambi kwalo lonke ibandla lakoIsrayeli, waphakamisela izandla zakhe phezulu.

¹³ Wayenze ithala lethusi, ubude balo buzingalo ezinhlanu, lobubanzi balo buzingalo ezinhlanu, ukuphakama kwalo kuzingalo ezintathu, walibeka egumeni. Wema phezu kwalo, waguqa ngamadolo phambi kwalo lonke ibandla lakoIsrayeli, waphakamisela izandla zakhe phezulu,

¹⁴ wathi: Nkosi, Nkulunkulu kaIsrayeli, kakho uNkulunkulu ofana lawe ezulwini lasemhlabeni ogcina isivumelwano utshengisa uthando olungapheliyo ezincekwini zakho ezihamba phambi kwakho ngobuqotho.

¹⁵ Usigcinile isithembiso owasenza kubaba uDavida; lokho owakuthembisayo lamhla ukugcwalisile ngokupheleleyo.

¹⁶ Ngakhoke, Nkosi, Nkulunkulu kaIsrayeli, gcina isithembiso owasenza lenceku yakho uDavida ubaba usithi: Kawuyikuswela muntu ozabusa abakoIsrayeli uba amadodana akho enanzelela ukuhamba kwawo phambi kwami, ehamba ngomlayo wami njengawe.

¹⁷ Ngakhoke, Nkosi, Nkulunkulu kaIsrayeli, kaligcwaliseke ilizwi lakho owalikhuluma kuDavida, inceku yakho.

¹⁸ Kambe uNkulunkulu uzahlala emhlabeni labantu na? Khangela, iphezulu, lezulu eliphezulu kakhulu kakukulingananga; pho, lindlu engiyakhileyo ingayini kuwe na?

¹⁹ Kodwake akuzwe umkhuleko wenceku yakho lokucela kwayo, Nkosi Nkulunkulu wami, ulalele ukukhala lokukhuleka kwenceku yakho ekwenzayo phambi kwakho.

²⁰ Ebusuku lemini amehlo akho kawakhangele lindlu, indawo owatsho ngayo ukuthi ibizo lakho lizakudunyiswa lapho, ukuze uwuzwe umkhuleko wenceku yakho ikhangele kulindawo.

²¹ Akulalele ukucela kwenceku yakho lokwabantu bakho uIsrayeli lapho bekhuleka bekhangele kulindawo; yebo, uzwe wena, usezulwini endaweni yakho yokuhlala; lapho usizwa, uthethelele.

²² Uba umuntu esona umakhelwane wakhe, afungiswe, enze isifungo sakhe phambi kwealtare lakho kulindlu,

²³ akuzwe wena usezulwini, wahlulele inceku zakho, uyilahle elecala, wehlisele izenzo zayo phezu kwayo, uyekele elungileyo, uyinike umvuzo ofanele ukulunga kwayo.

²⁴ Lapho abantu bakho bakoIsrayeli besahlulwa yizitha zabo ngoba bonile kuwe, uba bephenduka, balivume ibizo lakho, bakhuleke kuwe bekuncenga kulindlu,

²⁵ akuzwe wena usezulwini, uthethelele isono sabantu bakho uIsrayeli, ubabuyise futhi elizweni owalinika bona labokhokho babo.

²⁶ Lapho iphezulu livaliwe, kungelazulu ngoba bonile kuwe, uba bekhuleka bekhangele kulindawo belivuma ibizo lakho, baphenduke esonweni sabo nxa ubatshaya,

²⁷ akuzwe wena usezulwini, uthethelele izono zenceku zakho, abantu bakho uIsrayeli, ubafundise indlela elungileyo abangahamba ngayo, unise izulu elizweni lakho owabanika lona libe ngelabo.

²⁸ Uba kukhona indlala elizweni lomkhuhlane lokutshisa lengumane lesikhongwane lemihogoyi, uba izitha zabo zivimbezela imizi yabo, loba behlutshwa yikuphi ukufa lomkhuhlane,

²⁹ nxa bonke abantu bakho uIsrayeli loba oyedwa wabo ekhuleka, ecela, evuswa yinhlupheko losizi, ephakamisela izandla zakhe kulindlu,

³⁰ akuzwe wena usezulwini, endaweni yakho yokuhlala, umthethelele, umnike okufanele izenzo zakhe, wena owaziyo inhliziyo yakhe — ngoba nguwe wedwa owaziyo inhliziyo zabantu —

³¹ ukuba bakwesabe bahambe endleleni zakho insuku zonke zokuphila kwabo elizweni owalinika okhokho bethu.

³² Futhi owezizweni ongesuye wasebantwini bakho uIsrayeli evela elizweni elikhatshana ngenxa yebizo lakho elikhulu langesandla sakho esilamandla langengalo yakho elamandla eze ukukhuleka akhangele kulindlu,

³³ akuzwe wena usezulwini, endaweni yakho yokuhlala, umenzele konke akucelayo, ukuze abantu bonke emhlabeni bazi ibizo lakho, bakwesabe, njengabantu bakho bakoIsrayeli, ukuba bazi ukuthi lindlu engiyakhileyo iyindawo lapho ibizo lakho lidunyiselwa khona.

³⁴ Uba abantu bakho bephuma impi ukulwa lezitha zabo loba kungaphi lapho obesa khona, bakhuleke kuwe bekhangele ngakulo umuzi owukhethileyo langasendlini engikwakhele yona,

³⁵ akuzwe wena usezulwini ukukhuleka lokuncenga kwabo, ubamele.

³⁶ Uba besona kuwe, ngoba kakulamuntu ongoniyo, ubusubathukuthelela, ubanikele esitheni, ukuze bathunjelwe elizweni elikhatshana ingabe eliseduze,

³⁷ baphenduke elizweni abathunjelwe kilo, bakhuleke kuwe elizweni lelo bathi: Sonile, senza okungalunganga lokubi;

³⁸ baphenduke ngengqondo zabo zonke langenhliziyo zabo zonke elizweni abathunjelwe kilo, bakhuleke bekhangele ngaselizweni labo owalinika okhokho babo, lasemzini owawukhethayo, lasendlini engikwakhele yona,

³⁹ akuzwe wena umkhuleko wabo lokucela kwabo usezulwini, endaweni yakho yokuhlala, ubamele, ubathethelele abantu bakho izono zabo.

⁴⁰ Ngakhoke, Nkulunkulu wami, amehlo akho kawavulekele umkhuleko walindawo lendlebe zakho ziwulalele.

⁴¹ Sukake, Nkosi Nkulunkulu, uze endaweni yakho yokuphumula, wena lomtshokotsho wamandla akho. Abapristi bakho, Nkosi Nkulunkulu, kabambathe ukukhululwa, labathembekileyo bakho bathokoze ngokulunga kwakho.

⁴² Nkosi Nkulunkulu, ungafulatheli ogcotshiweyo wakho. Khumbula izenzo ezinhle zikaDavida inceku yakho.