2 ImiLando 33 - iBhayibhili Elingcwele 1978

Ukubusa kukaManase

¹ UManase wayeleminyaka elitshumi lambili lapho eqalisa ukubusa; wabusa iminyaka engamatshumi amahlanu lanhlanu eJerusalema.

² Wenza okubi phambi kweNkosi, walingisa amanyala awezizwe iNkosi eyazixotsha phambi kwabakoIsrayeli.

³ Wabuya wakha indawo eziphakemeyo zokukhonzela uyise uHezekiya ayezivalile, wakhela oBali ama‐altare, wamisa insika zikankulunkulukazi uAshera, wadumisa zonke inkanyezi zaphezulu, wazikhonza.

⁴ Wakha ama‐altare ethempelini, indlu iNkosi eyakhuluma ngayo yathi: EJerusalema ibizo lami lizadunyiselwa khona kokuphela.

⁵ Wakhela zonke inkanyezi zaphezulu ama‐altare emagumeni womabili ethempeli.

⁶ Watshisa abantwana bakhe baba ngumnikelo esihotsheni saseBeni‐Hinomu, wavumisa, wenza imilingo lamalumbo, wasebenza labalamadlozi labathakathi. Wenza okubi kakhulu phambi kweNkosi, wayithukuthelisa.

⁷ Isithombe ayesenzile wasimisa endlini kaNkulunkulu, indlu uNkulunkulu akhuluma ngayo kuDavida lakuSolomoni indodana yakhe wathi: Kulindlu, laseJerusalema engilikhethe kuzo zonke izizwe zakoIsrayeli, ibizo lami lizadunyiselwa khona kuze kube nininini;

⁸ kangisayikuzulisa inyawo zabakoIsrayeli ziphume futhi elizweni engalinika okhokho benu, uba bezakunanzelela ukwenza njengokubalaya kwami ngomlayo wonke langezimiso zonke langemithetho eyanikwa ngoMose.

⁹ UManase wamduhisa uJuda labaseJerusalema, benza okubi ukwedlula izizwe iNkosi eyazichitha phambi kwabakoIsrayeli.

¹⁰ INkosi yakhuluma kuManase lasebantwini bakhe, kodwa kabalalelanga.

¹¹ Ngalokhuke iNkosi yabalethela abaphathi bempi yenkosi yaseAsiriya, ababamba uManase ngezingwegwe, bambopha ngezibopho zethusi, bamusa eBabiloni.

¹² Kwathi esosizini wancenga umusa weNkosi uNkulunkulu wakhe, wazithoba kakhulu phambi kukaNkulunkulu wabokhokho bakhe.

¹³ Wakhuleka kuye, uNkulunkulu wezwa ukuncenga lokukhuleka kwakhe, wambuyisela eJerusalema embusweni wakhe. UManase wazike ukuba iNkosi inguNkulunkulu.

¹⁴ Ngemva kwalokho wakha umduli ongaphandle komuzi kaDavida ngasentshonalanga kweGihoni esihotsheni, wawufikisa ngaseSangweni leNhlanzi, wawubhodisa iOfeli, wawenza waphakama kakhulu. Wabeka labaphathi bamabutho kuyo yonke imizi ebiyelweyo yakoJuda.

¹⁵ Wasusa onkulunkulu bezizweni lesithombe ethempelini, lama‐altare ayewakhile entabeni yethempeli lawaseJerusalema, wakuphosela ngaphandle komuzi.

¹⁶ Wabuyisela lealtare leNkosi, wanikela phezu kwalo iminikelo yokuthula leyokubonga. Walaya uJuda ukuba akhonze iNkosi, uNkulunkulu kaIsrayeli.

¹⁷ Kodwake abantu babelokhu benikela endaweni eziphakemeyo zokukhonzela, kodwa kuphela eNkosini uNkulunkulu wabo.

¹⁸ Ezinye indaba zikaManase, lomkhuleko wakhe kuNkulunkulu wakhe, lamazwi ababoni abawakhuluma kuye ngebizo leNkosi uNkulunkulu kaIsrayeli, kulotshiwe ogwalweni lwezindaba zamakhosi akoIsrayeli.

¹⁹ Umkhuleko wakhe, lokuthi uNkulunkulu wakwamukela kanjani ukuncenga kwakhe, lesono sakhe sonke, lokungathembeki kwakhe, lezindawo amisa kuzo indawo eziphakemeyo zokukhonzela, lensika zikankulunkulukazi uAshera, lezithombe, engakazithobi, konke kulotshiwe ogwalweni lwezindaba zababoni.

²⁰ UManase wasesiya kwabaphansi, wangcwatshelwa endlini yakhe. UAmoni indodana yakhe waba yinkosi esikhundleni sakhe.

Ukubusa kukaAmoni

²¹ UAmoni wayeleminyaka engamatshumi amabili lambili lapho eqalisa ukubusa; wabusa iminyaka emibili eJerusalema.

²² Wenza okubi phambi kweNkosi njengokwenza kukayise uManase; wahlabela zonke izithombe uyise uManase ayezenzile, wazikhonza.

²³ Kazithobanga phambi kweNkosi njengoyise uManase, kodwa uAmoni lo wenza amacala ngamacala.

²⁴ Inceku zakhe zamenzela icebo, zambulala endlini yakhe.

²⁵ Kodwa abantu belizwe babulala bonke labo ababenzele inkosi uAmoni icebo, babeka uJosiya indodana yakhe ukuba abe yinkosi esikhundleni sakhe.