2 ImiLando 26 - iBhayibhili Elingcwele 1978

Ukubusa kukaUziya

¹ Bonke abantu bakoJuda bathatha uUziya owayeleminyaka elitshumi lesithupha, bambeka waba yinkosi esikhundleni sikayise uAmaziya.

² Nguye owakha iElathi, walibuyisa koJuda ngemva kokufa kwenkosi.

³ Wayeleminyaka elitshumi lesithupha lapho eqalisa ukubusa; wabusa iminyaka engamatshumi amahlanu lambili eJerusalema. Ibizo likanina lalinguJekoliya waseJerusalema.

⁴ Wenza okulungileyo phambi kweNkosi njengokwenza konke kukayise uAmaziya.

⁵ Wazimisela ukumdinga uNkulunkulu ensukwini zikaZekariya owamfundisa ukumesaba uNkulunkulu; ngesikhathi sonke eyidinga iNkosi, uNkulunkulu wamphumelelisa.

⁶ Waphuma ukuyahlasela amaFilistiya, wadilizela phansi umduli waseGathi lomduli waseJabine lomduli waseAshidodi, wakha imizi elizweni laseAshidodi lakwezinye indawo zamaFilistiya.

⁷ UNkulunkulu wamsiza ukulwa lamaFilistiya, lamaArabiya ayehlala eGuribali, labaseMewuni.

⁸ AmaAmoni athela kuUziya, udumo lwakhe lwanda lwaze lwafinyelela emngceleni waseGibithe, ngoba waba lamandla kakhulu.

⁹ Futhi uUziya wakha imiphotshongo eJerusalema ngaseSangweni leNgonsi langaseSangweni leSigodi langaseNgonsini, yaba yizinqaba.

¹⁰ Wakha lemiphotshongo enkangala, wemba imithombo eminengi, ngoba wayefuyile kakhulu elezinkomo ezinengi eShefela lasemagcekeni; wayelabalimi lezisebenzi zezivini ezintabeni lasemazweni avundileyo, ngoba wayethanda ukulima.

¹¹ Futhi wayelamabutho ayekwazi ukulwa ebuthwe ngezigaba ezazenziwa ngokubala kukaJeyiyeli umabhalane loMahaseya induna ephethwe nguHananiya omunye wezinduna zenkosi.

¹² Zonke inhloko zezindlu okwavela kuzo amaqhawe alamandla zazizinkulungwane ezimbili lamakhulu ayisithupha.

¹³ Zaziphatha ibutho elilabantu abazinkulungwane ezingamakhulu amathathu lesikhombisa lamakhulu amahlanu elalilamandla amakhulu okulwa lisiza inkosi ezitheni zayo.

¹⁴ U‐Uziya wayenzela yonke impi izihlangu, lemikhonto, lezingowane zensimbi, lamabhatshi ensimbi, lemitshoko, lamatshe ezavutha.

¹⁵ EJerusalema wenza imitshina eyaqanjwa ngabantu abahlakaniphileyo, wayibeka phezu kwemiphotshongo lasezingonsini ukuba itshoke imitshoko, iphosa lamatshe amakhulu. Udumo lwakhe lwafinyelela khatshana, ngoba wasizwa ngokumangalisayo waze waqina.

¹⁶ Kodwa lapho eseqinile wazikhukhumeza, kwamlethela ukuchitheka. Ngoba wona eNkosini uNkulunkulu wakhe ngokungena ethempelini leNkosi ukuba atshise impepha phezu kwealtare lempepha.

¹⁷ UAzariya umpristi wangena ngemva kwakhe elabapristi beNkosi uNkulunkulu abangamatshumi aficaminwembili amadoda alesibindi;

¹⁸ bamelana layo inkosi uUziya, bathi kuye: Kakusumsebenzi wakho, wena Uziya, ukutshisela iNkosi impepha, kodwa kungumsebenzi wabapristi amadodana kaAroni abahlukaniselwe ukutshisa impepha. Phuma endaweni engcwele, ngoba usuwenze okubi; lokhu kakuyikukulethela udumo oluvela eNkosini uNkulunkulu.

¹⁹ Wasethukuthela uUziya. Wayephethe udengezi ukuba atshise impepha; esebathukuthelele abapristi, waba lobulephero ebunzini lakhe phambi kwabapristi ethempelini eduze lealtare lempepha.

²⁰ UAzariya umpristi omkhulu kanye labo bonke abapristi bamkhangela, babona ukuthi uselobulephero ebunzini lakhe; basebemkhupha masinyane, laye uqobo waphangisa ukuphuma, ngoba iNkosi yayisimtshayile.

²¹ Inkosi uUziya yaba lobulephero yaze yafa; ngoba elobulephero wahlala endlini yakhe yedwa, wavalelwa ukuya ethempelini. UJothamu indodana yakhe wayegcina isigodlo senkosi, ephethe labantu belizwe.

²² Ezinye indaba zikaUziya, kusukela ekuqaleni kuze kube sekucineni, zalotshwa nguIsaya umprofethi, indodana kaAmozi.

²³ U‐Uziya waya kwabaphansi, bamngcwaba kuboyise emalibeni angayisiwo awamakhosi, ngoba bathi: Ulobulephero. UJothamu indodana yakhe waba yinkosi esikhundleni sakhe.