2 ImiLando 22 - iBhayibhili Elingcwele 1978

Ukubusa kukaAhaziya koJuda

¹ AbaseJerusalema babeka uAhaziya indodana kaJoramu encinyane waba yinkosi esikhundleni sakhe; ngoba ixuku labantu elafika lamaArabiya ezihonqweni bawabulala wonke amadodana amadala. Ngakho uAhaziya indodana kaJoramu inkosi yakoJuda waba yinkosi.

² Wayeleminyaka engamatshumi amane lambili lapho eqalisa ukubusa, wabusa eJerusalema umnyaka owodwa. Ibizo likanina lalinguAthaliya, umntanomntanakhe kaOmri.

³ Laye walandela izindlela zendlu kaAhabi, ngoba unina wayengumeluleki wakhe ekwenzeni okubi.

⁴ Wenza okubi phambi kweNkosi njengendlu kaAhabi, ngoba ngemva kokufa kukayise babengabeluleki bakhe, bamlethela ukuchitheka.

⁵ Walalela ukweluleka kwabo, waphuma loJehoramu indodana kaAhabi inkosi yakoIsrayeli ukuyahlasela uHazayeli inkosi yaseSiriya eRamothi‐Gileyadi. AmaSiriya amlimaza uJehoramu;

⁶ wabuyela eJezereli ukuyakwelatshwa amanxeba ayewalinyazwe eRama, ekulweni kwakhe loHazayeli inkosi yaseSiriya. UAhaziya indodana kaJoramu inkosi yakoJuda wahamba ukuyambona eJezereli, ngoba wayegula.

UJehu ubulala uAhaziya

⁷ Kwakumiswe nguNkulunkulu ukuba ukubhubha kukaAhaziya kumfikele ngokuhambela kwakhe uJehoramu. Ngoba ekufikeni kwakhe khona waphuma loJehoramu ukuyahlangabeza uJehu indodana kaNimshi, iNkosi uNkulunkulu eyayimmisele ukubhubhisa indlu kaAhabi.

⁸ Kwathi lapho uJehu esenza lokho okuyifaneleyo indlu kaAhabi, wahlangana lezikhulu zakoJuda lamadodana abafowabo kaAhaziya ababemsebenzela uAhaziya, wababulala.

⁹ Wasedinga uAhaziya, bambamba esecatshile eSamariya, bamletha kuJehu, wabulawa. Bamngcwaba ngoba bathi: Ungumntanomntanakhe kaJehoshafati owadinga iNkosi ngenhliziyo yakhe yonke. Indlu kaAhaziya kayibanga loyedwa olamandla okubusa.

UAthaliya uzibeka abe ngumbusi

¹⁰ Kwathi uAthaliya unina kaAhaziya esebonile ukuthi indodana yakhe ifile, wabulala bonke abantwana benkosi bendlu yakoJuda.

¹¹ Kodwa uJehosheba indodakazi yenkosi wathatha uJowashi indodana kaAhaziya, wamkhupha emadodaneni enkosi ayebulawa, wamfihla kanye lomlizane wakhe endlini yokulala. Ngokunjaloke uJehosheba indodakazi yenkosi uJoramu, umkaJehoyada umpristi, ngoba wayengudadewabo kaAhaziya wamfihla kuAthaliya ukuba angambulali;

¹² wahlala labo iminyaka eyisithupha ecatshile endlini kaNkulunkulu, uAthaliya esabusa elizweni.