2 ImiLando 18 - iBhayibhili Elingcwele 1978

UMikaya ukhuluma ngokunqotshwa kukaAhabi loJehoshafati

¹ UJehoshafati wayenothile kakhulu elodumo; wenza isivumelwano loAhabi ngokwendiselana laye.

² Ngemva kweminyaka waya kuAhabi eSamariya. UAhabi wamhlabela yena lababelaye izimvu lenkabi ezinengi, wamncenga ukuba bayehlasela iRamothi‐Gileyadi.

³ UAhabi inkosi yakoIsrayeli wasesithi kuJehoshafati inkosi yakoJuda: Uzaphuma lami ukuyakulwa eRamothi‐Gileyadi na? UJehoshafati wathi: Okwami ngokwakho, lami uqobo labantu bami. Sizakuba lawe empini.

⁴ UJehoshafati wasesithi enkosini yakoIsrayeli: Akubuze eNkosini uNkulunkulu kuqala.

⁵ Inkosi yakoIsrayeli yasibuthanisa abaprofethi baba ngamakhulu amane, yathi kubo: Ngiyehlasela iRamothi‐Gileyadi kumbe ngingayi na? Bona bathi: Hamba, ngoba iNkosi uNkulunkulu izalinikela esandleni sakho.

⁶ UJehoshafati wasesithi: Kakukho yini lapha omunye umprofethi weNkosi uNkulunkulu esingambuza na?

⁷ Inkosi yakoIsrayeli yathi kuye: Kusekhona omunye umuntu esingabuza ngaye eNkosini, nguMikaya indodana kaImla, kodwa kangimthandi ngoba kazake akhuluma okuhle ngami, kodwa uhlala ekhuluma okubi; uJehoshafati wathi: Nkosi, ungatsho njalo.

⁸ Inkosi yakoIsrayeli yasibiza umthenwa yathi kuye: Ngilandela masinyane uMikaya indodana kaImla.

⁹ Inkosi yakoIsrayeli loJehoshafati inkosi yakoJuda babehlezi ezihlalweni zabo zobukhosi, begqoke izambatho zabo zobukhosi, besesizeni ngasesangweni leSamariya, bonke abaprofethi babeprofetha phambi kwabo.

¹⁰ UZedekiya indodana kaKenana wazenzela impondo zensimbi, wathi kuAhabi: INkosi ithi: Ngalezimpondo uzahlaba amaSamariya uze uwaqede.

¹¹ Labo bonke abaprofethi batsho njalo, bathi: Hamba uyenqoba iRamothi‐Gileyadi, iNkosi izalinikela esandleni sakho.

¹² Isithunywa esasiyembiza uMikaya sathi kuye: Amazwi abaprofethi ayathandeka wonke enkosini; lelizwi lakho kalifanane lawabo, ukhulume okuthandekayo.

¹³ Kodwa uMikaya wathi: Ngifunga iNkosi uNkulunkulu, lokho iNkosi ekutshoyo kimi ngizakukukhuluma.

¹⁴ Esefilike enkosini, uAhabi yathi kuye: Mikaya, siyehlasela iRamothi‐Gileyadi kumbe singayi na? Yena wathi kuyo: Hambani, lizanqoba; bazanikelwa ezandleni zenu.

¹⁵ Kodwa inkosi uAhabi yathi kuye: Ngizakukufungisa kuze kube kangaki ukuba ungitshele iqiniso lodwa ebizweni leNkosi uNkulunkulu na?

¹⁶ Yena wathi: Ngabona uIsrayeli wonke echithekile phezu kwezintaba njengezimvu ezingelamalusi; iNkosi yathi: Laba kabalamkhokheli, kabazibuyelele kuhle emakhaya.

¹⁷ Inkosi yakoIsrayeli yasisithi kuJehoshafati: Kangikutshelanga yini ukuthi kayikukhuluma okuhle ngami kodwa okubi kuphela na?

¹⁸ UMikaya wasesithi: Zwaninike ilizwi leNkosi uNkulunkulu. Ngayibona ihlezi esihlalweni sayo sobukhosi, lexuku lonke lasezulwini limi phansi kwayo ngakwesokunene langakwesokhohlo;

¹⁹ iNkosi yathi: Ngubani ozakhohlisa uAhabi inkosi yakoIsrayeli ukuba ahambe ayefela eRamothi‐Gileyadi na? Omunye watsho okunye, lomunye okunye.

²⁰ Kwasekuphuma umoya, wema phambi kweNkosi wathi: Ngizamkhohlisa mina. INkosi yathi kuwo: Kanjani na?

²¹ Wona wathi: Ngizahamba ngibe ngumoya wokuqamba amanga emilonyeni yabo bonke abaprofethi bakhe. INkosi yathi: Impela uzakumkhohlisa; hambake wenze njalo.

²² Ngakhoke iNkosi ifakile umoya wokuqamba amanga emilonyeni yalababaprofethi bakho, ngoba iNkosi ikumisele okubi.

²³ UZedekiya indodana kaKenana wasesondela, wawakala uMikaya esihlathini, esithi: Umoya weNkosi wasuka njani kimi ukuyakhuluma kuwe na?

²⁴ UMikaya wathi: Wena uqobo uzakukubona lokhu mhla ubalekela ezindlini ezingaphakathi ukuyacatsha.

²⁵ Inkosi yakoIsrayeli yalaya ukuba uMikaya abanjwe, abuyiselwe kuAmoni umbusi womuzi lakuJowashi indodana yenkosi,

²⁶ yathi: Valelani lumuntu entolongweni, limnike ukudla lamanzi alutshwana ngize ngibuye kuhle.

²⁷ UMikaya wathi: Uba ubuya kuhle, iNkosi izabe ingakhulumanga ngami.

²⁸ Inkosi yakoIsrayeli loJehoshafati inkosi yakoJuda baphuma baya eRamothi‐Gileyadi.

²⁹ Inkosi yakoIsrayeli yathi kuJehoshafati: Mina ngizazifinla, ngingene ekulweni, kodwa wena gqoka izambatho zakho zokubhosi. Inkosi yakoIsrayeli yasizifihla, yangena ekulweni.

³⁰ Inkosi yaseSiriya yayilayile izinduna zenqola zayo zokulwa yathi: Lingalwi lamuntu, lilwe lenkosi yakoIsrayeli kuphela.

³¹ Kwathi induna zezinqola zokulwa zibona uJehoshafati zathi: Yiyo le sibili inkosi yakoIsrayeli. Zasezimsukela, yena wahlaba umkhosi; iNkosi uNkulunkulu yamsiza. Yazisusa kuye.

³² Lapho izinduna zezinqola zokulwa zibona ukuba kwakungesiyo inkosi yakoIsrayeli, zayekela ukuxotshana laye.

³³ Umuntu othile watshoka umtshoko wakhe engananzelele, wahlaba inkosi yakoIsrayeli ngaphansi kwesivikelo sesifuba; yasisithi kumtshayeli wenqola yayo yokulwa: Phenduka, ungikhuphe phakathi kokulwa, ngoba sengilimele.

³⁴ Ukulwa kwaba nzima mhlalokho; inkosi yayizisekele enqoleni yayo yokulwa, ikhangele amaSiriya kwaze kwaba ntambama; yafa ekutshoneni kwelanga.