2 ImiLando 17 - iBhayibhili Elingcwele 1978

Ukuqiniswa kombuso kaJehoshafati

¹ UJehoshafati indodana kaAsa waba yinkosi esikhundleni sakhe; waziqinisela ukulwa loIsrayeli.

² Wabeka amabutho kuyo yonke imizi ebiyelweyo yakoJuda; wabeka lamabutho okulinda elizweni lakoJuda, lasemizini yakoEfrayimi eyayithunjwe nguyise uAsa.

³ INkosi yaba laye uJehoshafati, ngoba wahamba ngendlela zikayise zokuqala, kabadinganga oBali,

⁴ kodwa wadinga uNkulunkulu kayise, wahamba ngemilayo yakhe, kaze alingisa indlela zakoIsrayeli.

⁵ Ngakhoke iNkosi uNkulunkulu yawuqinisa umbuso esandleni sakhe, labo bonke abakoJuda bathela kuye; waba lenotho enengi lodumo.

⁶ Inhliziyo yakhe yaziqhenya ngendlela zeNkosi; futhi wavala indawo eziphakemeyo zokukhonzela, waqeda lensika ezimiselwe unkulunkulukazi uAshera koJuda.

⁷ Ngomnyaka wesithathu wokubusa kwakhe wathumela izikhulu zakhe ukufundisa emizini yakoJuda, oBeni‐Hayili loObadiya loZekariya loNethaneli loMikaya,

⁸ bahamba lamaLevi oShemaya loNethaniya loZebadiya loAsaheli loShemiramothi loJehonathani loAdonija loTobija loTobadonija, kanye labapristi oElishama loJehoramu.

⁹ Bafundisa koJuda, belogwalo lomlayo weNkosi uNkulunkulu; bayihambela yonke imizi yakoJuda, befundisa abantu.

¹⁰ Ukuyesaba iNkosi uNkulunkulu kwehlela phezu kwayo yonke imibuso yamazwe ayehanqe elakoJuda; kayimhlaselanga uJehoshafati.

¹¹ Abathile kumaFilistiya bamlethela uJehoshafati izipho, bathela langesiliva; lamaArabiya lawo aletha kuye inqama ezizinkulungwane eziyisikhombisa lamakhulu ayisikhombisa, lezimpongo ezizinkulungwane eziyisikhombisa lamakhulu ayisikhombisa.

¹² UJehoshafati waye lokhu ekhula njalo, waze waba lamandla amakhulu. Wakha koJuda izinqaba lemizi yokugcinela amabele;

¹³ wayeleziphala ezinkulu emizini yakoJuda. Wayelamabutho, amaqhawe alamandla, eJerusalema,

¹⁴ ayebuthwe ngezindlu zawo ngokunje; kwabakoJuda, induna zezinkulungwane, kwakunguAdina engumphathi, elamaqhawe alamandla azinkulungwane ezingamakhulu amathathu;

¹⁵ elandelwa nguJohanani umphathi, elamabutho azinkulungwane ezingamakhulu amabili lamatshumi aficaminwembili;

¹⁶ kulandele uAmasiya indodana kaZikiri, owayezinikelele umsebenzi weNkosi uNkulunkulu, elamaqhawe alamandla azinkulungwane ezingamakhulu amabili.

¹⁷ KwabakoBenjamini kwakunguEliyada indoda eliqhawe, elamadoda azinkulungwane ezingamakhulu amabili, ehlome ngemitshoko langezihlangu;

¹⁸ elandelwa nguJehozabadi elamadoda ahlomileyo azinkulungwane ezilikhulu lamatshumi aficaminwembili.

¹⁹ Laba babesebenzela inkosi ngaphandle kwalabo inkosi eyayibabeke emizini ebiyelweyo kulo lonke lakoJuda.