2 ImiLando 11 - iBhayibhili Elingcwele 1978

¹ Kwathi uRehobowamu esefikile eJerusalema wabuthanisa bonke abakoJuda labakoBenjamini, amadoda empi ayizinkulungwane ezilikhulu lamatshumi aficaminwembili ukuba alwe labakoIsrayeli ukubuyisa umbuso.

² Kodwa ilizwi leNkosi uNkulunkulu lafika kuShemaya umuntu kaNkulunkulu lathi:

³ Tshela uRehobowamu indodana kaSolomoni, inkosi yakoJuda, lalabo bonke abakoIsrayeli koJuda lakoBenjamini,

⁴ uthi: INkosi ithi: Kaliyikuphuma ukulwa lezihlobo zenu. Buyelani lonke emizini yenu, ngoba lokhu kuyintando yami. Basebelilalela ilizwi leNkosi, babuyela emizini yabo, kabayanga ukulwa loJerobowamu.

Ukuphumelela kukaRehobowamu

⁵ URehobowamu wahlala eJerusalema, wakha imizi eyizinqaba koJuda.

⁶ Wakha iBetlehema leEtamu leTekowa

⁷ leBeti‐Zuri leSoko leAdulamu

⁸ leGathi leMaresha leZifi

⁹ leAdorayimi leLakishi leAzeka

¹⁰ leZora leAjaloni leHebroni, imizi ebiyelweyo ekoJuda lakoBenjamini.

¹¹ Waqinisa izinqaba, wabeka abaphathi kizo, wabuthela kuzo ukudla lamafutha lewayini.

¹² Wafaka izihlangu lemikhonto kuyo yonke imizi, wayiqinisa kakhulu. Wababusake abakoJuda labakoBenjamini.

¹³ Abapristi lamaLevi ababekibo bonke abakoIsrayeli beza kuRehobowamu bevela kuzo zonke indawo ababehlala kuzo.

¹⁴ Ngoba amaLevi atshiya amadlelo awo lamasimu awo, eza koJuda laseJerusalema, ngoba uJerobowamu lamadodana akhe bawakhupha esikhundleni sobupristi beNkosi;

¹⁵ yena wazibekela abakhe abapristi ezindaweni eziphakemeyo zokukhonzela, lababomoya ababi, labamathole ayewenzile.

¹⁶ Labo ababezimisele ukuyidinga iNkosi, uNkulunkulu kaIsrayeli, bawalandela eJerusalema amaLevi bevela kuzo zonke izizwe zakoIsrayeli ukuyahlabela iNkosi, uNkulunkulu wabokhokho babo.

¹⁷ Bawuqinisa umbuso wakoJuda, benza uRehobowamu indodana kaSolomoni waba lamandla iminyaka emithathu, ngoba bahamba endleleni kaDavida loSolomoni iminyaka emithathu.

¹⁸ URehobowamu wathatha uMahalathi indodakazi kaJerimothi indodana kaDavida, lekaAbihayili indodakazi kaEliyabi indodana kaJese, waba ngumkakhe,

¹⁹ wamzalela amadodana oJewushi loShemariya loZahamu.

²⁰ Wabuya wathatha uMahaka indodakazi kaAbisalomu, owamzalela oAbija loAthayi loZiza loShelomithi.

²¹ URehobowamu wayemthanda uMahaka ukwedlula bonke omkakhe labanye abafazi bakhe; wathatha abafazi abalitshumi lesificaminwembili, labanye abafazi abangamatshumi ayisithupha, wayelamadodana angamatshumi amabili lesificaminwembili lamadodakazi angamatshumi ayisithupha.

²² URehobowamu wabeka uAbija indodana kaMahaka waba nguye omkhulu phakathi kwabafowabo, ngoba wayeqonde ukumenza inkosi.

²³ Wenza ngokuhlakanipha, wawabeka amadodana akhe ezindaweni zonke zakoJuda lakoBenjamini, kuyo yonke imizi ebiyelweyo, wawanika ukudla okunengi, wawadingela abafazi.