2 AbaseThesalonika 3 - iBhayibhili Elingcwele 1978

Izicelo lezifiso lezeluleko zikaPawuli

¹ Elokucinake, bazalwane, sikhulekeleni ukuba ilizwi leNkosi liqhubekele phambili ngamandla, lidunyiswe, njengalokhu kwaba njalo phakathi kwenu,

² lokuba sikhululwe ebantwini abaduhileyo lababi; ngoba kayisibo bonke abakholwayo.

³ Kodwa iNkosi ithembekile, izakuliqinisa, ilivikele komubi.

⁴ Silethemba eNkosini ngani ukuthi lokhu esililaya khona liyakwenza, njalo lizakukwenza.

⁵ INkosi ayiqondise inhliziyo zenu othandweni lukaNkulunkulu lasekubekezeleni kukaKristu.

⁶ Siyalilayake, bazalwane, ebizweni leNkosi yethu uJesu Kristu, ukuba lizahlukanise labazalwane bonke abavilaphayo, bengahambi ngomlayo elawamukela kithi.

⁷ Lani liyazi ngokwenu ukuthi lifanele ukuba lisilingise kanjani, sasingavilaphi sikhona phakathi kwenu,

⁸ kasidlanga nje kudla komuntu kodwa satshikatshikeka, sisebenza ubusuku lemini ukuba singabi ngumthwalo kini,

⁹ kungesikho ukuba sasingelalo ilungelo, kodwa ukuze silinike isibonelo sokuba lisilingise.

¹⁰ Ngoba lalapho sisekhona kini, salilaya ngalokhu ukuthi: Uba umuntu engathandi ukusebenza, kangadli.

¹¹ Sizwa kuthiwa abanye phakathi kwenu bayavilapha, kabasebenzi lutho, kodwa benza okungafanelanga;

¹² abanjaloke siyabalaya sibeluleka eNkosini uJesu Kristu ukuba basebenze ngokuthula, badle okwabo ukudla.

¹³ Bazalwane, lingadinwa yikwenza okuhle.

¹⁴ Uba ekhona ongalaleli ilizwi lethu kulincwadi, mqapheliseni lowomuntu, lingahlangani laye, ukuze abe lenhloni;

¹⁵ kodwa lingamphathisi okwesitha, mlulekeni njengomzalwane.

¹⁶ INkosi yokuthula uqobo kayilinike ukuthula ngezikhathi zonke langezindlela zonke. INkosi ibe lani lonke.

Isicino

¹⁷ Mina Pawuli ngiyaloba lesisibingelelo ngesandla sami; lokhu kuluphawu lwazo zonke incwadi zami; ngiloba ngokunjalo.

¹⁸ Umusa weNkosi yethu uJesu Kristu kawube lani lonke.