2 AbaseThesalonika 2 - iBhayibhili Elingcwele 1978

Ukufika kweNkosi lokufika koMubi

¹ Bazalwane, mayelana lokufika kweNkosi yethu uJesu Kristu lokubuthana kwethu ukuba siyihlangabeze, siyalincenga

² ukuba lingaphangisi likhathazeke engqondweni zenu, lethuswe, loba ngumoya, loba yilizwi, loba yincwadi ngokungathi ivela kithi, kuthiwa usuku lweNkosi selufikile.

³ Kakungabi khona umuntu olikhohlisayo langayiphi indlela; ngoba kaluyikufika lolosuku, kungakaveli ukuvukela uNkulunkulu kuqala, kwambulwe oMubi, indodana yokulahlwa,

⁴ omelana lakho konke, lozikhukhumeza phezu kwakho konke okuthiwa ngunkulunkulu, loba yinto nje ekhonzwayo aze ahlale ethempelini likaNkulunkulu ezibiza ngokuthi unguNkulunkulu.

⁵ Kalikhumbuli yini ukuthi ngisekhona kini ngalitshela ngalokhu na?

⁶ Selikwazi okumvimbelayo khathesi ukuze ambulwe ngesikhathi sakhe.

⁷ Ngoba amandla afihlakeleyo obubi asesebenza. Asebenza kuphela okwalesisikhathi aze asuswe lowo owavimbeleyo.

⁸ Kung’khonake ezakwambulwa lowo oMubi, kodwa iNkosi uJesu izakumqeda ngomoya womlomo wayo, imbhubhise ngokubonakala kwayo ekufikeni kwayo.

⁹ Ukufika koMubi kungumsebenzi kaSathane; kuzakuba ngawo wonke amandla, lezibonakaliso lezimangaliso zamanga,

¹⁰ langayo yonke inkohliso yokungalungi kulabo abamiselwe ukubhubha ngenxa yokuba bengavumanga ukuthanda iqiniso, ukuze basiliswe.

¹¹ Ngakhoke uNkulunkulu ubathumele okuduhisayo, ukuze bakholwe amanga,

¹² ukuba bonke abangakholwanga iqiniso kodwa bethokoziswa yikungalungi balahlwe.

Ukubonga lokunxusa kukaPawuli

¹³ Kodwa thina simele ukubonga uNkulunkulu njalo ngani, bazalwane abathandekayo beNkosi, ngoba uNkulunkulu walikhetha kusukela ekuqaleni, walikhethela ukuba lisiliswe ngobungcwele obuvela kuMoya langokukholwa iqiniso;

¹⁴ walibizela kulokhu ngevangeli esalilethayo, lize lizuze inkazimulo yeNkosi yethu uJesu Kristu.

¹⁵ Ngakhoke, bazalwane, qinani, libambelele emasikweni elawafundiswa yithi loba ngelizwi lomlomo ingabe ngencwadi.

¹⁶ Kakuthike iNkosi yethu uJesu Kristu uqobo, loNkulunkulu uBaba owasithandayo lowasinika ngomusa induduzo engapheliyo lethemba elihle,

¹⁷ aduduze inhliziyo zenu, aliqinise emisebenzini yonke emihle lasemazwini amahle.