2 AbaseThesalonika 1 - iBhayibhili Elingcwele 1978

UPawuli uyababingelela. Uyabonga ngokuthuthuka kwabo evangelini

¹ Thina oPawuli, loSilivanu, loTimothi, sithi kulo ibandla labaseTesalonika elikuNkulunkulu uBaba laseNkosini uJesu Kristu:

² Kakube kini umusa lokuthula okuvela kuNkulunkulu uBaba laseNkosini uJesu Kristu.

³ Simele ukumbonga njalo uNkulunkulu ngani, bazalwane, njengoba kufanele, ngoba ukukholwa kwenu kuyanda kakhulu, lothando lwenu lonke omunye komunye luyakhula.

⁴ Ngakhoke thina ngokwethu siyazincoma ngani emabandleni kaNkulunkulu ngenxa yokuqina lokukholwa kwenu phakathi kokuzingelwa konke lasezinhluphekweni elibekezela kuzo.

⁵ Lokhu kuyisiboniso sokuthonisisa okulungileyo kukaNkulunkulu, ukuze kuthiwe lingabafanele umbuso kaNkulunkulu elihlupheka ngenxa yawo.

⁶ Lokhu kuyinto elungileyo kuNkulunkulu ukuba abuyisele ukuhlupheka kubo abalihluphayo,

⁷ aliphe lina elihluphekayo ukuphumula kanye lathi ekwambulweni kweNkosi uJesu, evela ezulwini ngamalangabi omlilo, elezithunywa zamandla akhe.

⁸ Uzaphindisela kwabangamaziyo uNkulunkulu lakwabangalaleli ivangeli leNkosi yethu uJesu.

⁹ Bazakulahlwa ngokubhujiswa okungapheliyo, basuswe phambi kwakhe laphambi kwenkazimulo yamandla akhe,

¹⁰ mhla efika ukuba adunyiswe yibo abangcwele bakhe, abe ngomangalisayo kubo bonke abakholwayo; ngoba lakholwa ukufakaza kwethu.

¹¹ Ngenxa yalokho sihlala silikhulekela, ukuba uNkulunkulu wethu alenze libe ngabafanele ukubiza kwakhe, lokuba aphelelise ngamandla konke okuhle elikuthandayo lomsebenzi wokukholwa,

¹² ukuze ibizo leNkosi yethu uJesu lidunyiswe kini, lani kuye, ngomusa kaNkulunkulu wethu loweNkosi uJesu Kristu.