2 AbaseKhorinte 8 - iBhayibhili Elingcwele 1978

Ngeminikelo yokusiza amaKristu angabayanga

¹ Siyalazisa, bazalwane, ngomusa kaNkulunkulu awuphiweyo amabandla aseMakedoniya,

² ukuthi ekulingweni okukhulu ngezinhlupheko ezingaka ukuthokoza kwawo kube kukhulu, aze aphana ngokupheleleyo ebuyangeni bawo obukhulu.

³ Ngoba ngokwawo anikela ngamandla awo, yebo, ngingafakaza ngithi langaphezu kwamandla awo;

⁴ asicela kakhulu ukuba anikwe ithuba lokuhlanganyela lathi ekusizeni abangcwele.

⁵ Kakubanga njengokuthemba kwethu kuphela, kodwa bazinikela bona uqobo kuqala eNkosini, lakithi futhi ngentando kaNkulunkulu.

⁶ Ngakhoke sacela uTitosi ukuthi, njengalokhu wayeseqalile ngaphambili lumsebenzi womusa, kaqhubeke awuqede.

⁷ Njengalokhu likhuthele kakhulu kukho konke, ukukholwa lokukhuluma, lokwazi, lokutshisekela konke, lothando elisithanda ngalo, khuthalani lakulumsebenzi womusa.

⁸ Kangililawuli ngokutsho lokhu, kodwa ukuze ukukhuthala kwabanye kuhlole ubuqotho bothando lwenu.

⁹ Ngoba liyawazi umusa weNkosi yethu uJesu Kristu ukuthi, lanxa wayenothile, waba ngumyanga ngenxa yenu, ukuze ngobuyanga bakhe linothe lina.

¹⁰ Nanku ukubona kwami ngalindaba; ngithi kulilungele ukuba liwuqede lowomsebenzi elawuqalisa nyakenye, lalingabokuqala ukuwenza lokuthanda ukuwenza.

¹¹ Ngakhoke qhubekani liwuqede; njengoba lakhuthalela ukuwuqalisa, khuthalelani lokuwuqeda ngalokho elilakho.

¹² Ngoba uba uthando lokupha lukhona, uNkulunkulu uyamukela lokho umuntu alakho, angakudingi lokho umuntu angelakho.

¹³ Kangitsho lokhu ukuze kusizakale abanye lina lisale lihlupheka, kodwa ukuze kube khona ukulingana.

¹⁴ Okwakhathesi inala yenu iyasiza ukuswela kwabo, kodwa ngolunye usuku inala yabo izakusiza ukuswela kwenu, kube khona ukulingana,

¹⁵ njengokulotshiweyo okokuthi: Owabutha okunengi kabanga lokusalayo, lowabutha okuncinyane kaswelanga.

¹⁶ Kabongwe uNkulunkulu ofaka enhliziyweni kaTitosi inkuthalo ngani.

¹⁷ Ngoba kavumanga isicelo sethu kuphela, kodwa lokhu ekhuthele usukile ukuza kini ngokuzithandela kwakhe.

¹⁸ Sithumela kanye laye umzalwane olodumo ngokutshumayela ivangeli emabandleni wonke,

¹⁹ kungesikho lokhu kuphela, kodwa ukhethiwe futhi yiwo amabandla ukuba asiphelekezele lokusisiza emsebenzini womusa esiwenzela ukuba kudunyiswe iNkosi, lokuba kubonakaliswe ukukhuthala kwethu.

²⁰ Senzela ukuba kungabi khona osisolayo ngokuphatha kwethu lesisphiwo esikhulu;

²¹ ngoba sinanzelela okuhle, kungasemehlweni eNkosi kuphela, kodwa lasemehlweni abantu.

²² Sithumela kanye labo umzalwane wethu esimfumene kanengi ekhuthele ezintweni ezinengi, khathesi ukhuthele kakhulu ngenxa yokulithemba kwakhe okukhulu.

²³ UTitosi yena engumhlanganyeli lesisebenzi kanye lami kini, abazalwaneke bona bayizithunywa zamabandla, bangababongekayo bakaKristu.

²⁴ Ngakhoke bonakalisani kubo phambi kwamabandla ubufakazi bothando lwenu lokuzincoma kwethu ngani.