2 AbaseKhorinte 7 - iBhayibhili Elingcwele 1978

¹ Lokhu silalezizithembiso, bathandwayo, asizihlambulule kukho konke ukungcola komzimba lokomoya, siphelelise ubungcwele bethu sisesaba iNkosi.

UPawuli ujabuliswa yikufika kukaTitosi

² Sivuleleni indawo enhliziyweni zenu; kasonanga muntu, kasonakalisanga muntu, kasidlanga muntu.

³ Kangitsho lokhu ngokulilahla; ngoba ngatsho ngaphambili ukuthi lisenhliziyweni zethu; loba sisifa loba siphila, sikanye.

⁴ Ngiyalithemba kakhulu, ngiyaziqhenya ngani; yinkulu induduzo yami; phakathi kwazo zonke inhlupheko zethu ngilentokozo enkulu.

⁵ Lasekufikeni kwethu eMakedoniya kasibanga lakuphumula, kodwa sakhathazeka inxa zonke; ngaphandle kwakukhona ingxabano ezinengi, lasenhliziyweni zethu ukwesaba.

⁶ Kodwa uNkulunkulu oduduza abadanileyo wasiduduza ngokufika kukaTitosi,

⁷ kungesikho ngokufika kwakhe kuphela, kodwa langenduduzo aduduzeka ngayo ngani. Wasilandisela ngokusilangatha kwenu, langokudabuka kwenu, langokutshiseka kwenu ngami, ngaze ngathokoza kakhulu.

⁸ Lanxa ngalidabukisa ngencwadi yami, kangizisoli; loba ngazisola ngokubona ukuthi leyoncwadi yalidabukisa, lanxa ngokwesikhathi nje.

⁹ Kodwa khathesi ngiyathokoza, kungesikho ngokuthi ngoba ladabukiswa, kodwa ngoba laphendulwa ngokudabukiswa; ladabukiswa ngokukaNkulunkulu, ukuze lingalahlekelwa lutho ngokwenza kwethu.

¹⁰ Ngoba ukudabuka okuthwalwa ngendlela kaNkulunkulu kuletha ukuphenduka angezisole ngakho umuntu, kuveze ukusiliswa; kodwa ukudabuka okuthwalwa ngendlela yomhlaba kuletha ukufa.

¹¹ Khangelani, khona lokhokudabukiswa kwenu okungendlela kaNkulunkulu kuveze kini ukukhuthala okungaka, lokuziphendulela, lokuthukuthela, lokwesaba, lokusilangatha, lokutshiseka, lokuthanda ukuba kwenziwe ukulunga. Kukho konke lazibonakalisa ukuthi kalilacala.

¹² Ngakho lanxa ngalilobela, kangililobelanga ngenxa yalowo owonayo langenxa yalowo owoniwayo, kodwa ukuze ukusitshisekela kwenu kubonakaliswe kini phambi kukaNkulunkulu.

¹³ Ngalokhoke siduduzekile. Kodwa ngaphezu kokududuzeka kwethu sathokoza impela, ikakhulu ngokuthokoza kukaTitosi, ngoba umoya wakhe uzuze ukuthula ngani.

¹⁴ Ngoba uba ngake ngazincoma ngolutho kuye ngani, kangidaniswanga; kodwa njengoba konke esakukhuluma kini kwaba liqiniso, ngokunjalo ukuzincoma kwethu kuTitosi kwaba liqiniso.

¹⁵ Ukulithanda kwakhe kukhulu, lapho ekhumbula ukulalela kwenu lonke lokuthi lamamukela ngokwesaba langokuthuthumela.

¹⁶ Ngiyathokoza, ngoba ngiyalithemba kakhulu.