2 AbaseKhorinte 6 - iBhayibhili Elingcwele 1978

¹ Thina esisebenza kanye laye siyalincenga ukuba lingawamukeli ngeze umusa kaNkulunkulu.

² Ngoba uthi: Ngesikhathi esihle ngikuzwile, langosuku lokusiliswa ngakusiza. Khangelani, khathesi sekuyisikhathi esihle impela; sekulusuku lokusiliswa.

³ Kasikhubekisi muntu, ukuze inkonzo yethu ingasoleki.

⁴ Kodwa kukho konke sizibonakalisa siyizikhonzi zikaNkulunkulu ngokubekezela okukhulu, ezinhluphekweni, lasebunzimeni, lasekubandezekeni,

⁵ lasekutshayweni, lasekubotshweni, laseziphithiphithini, lasekusebenzeni nzima, sihamba singalali singadli.

⁶ Siyazibonakalisa langokuhlambuluka, langokwazi, langokubekezela, langobumnene, langoMoya oNgcwele, langothando oluqotho,

⁷ langokukhuluma iqiniso, langamandla kaNkulunkulu, langokusebenzisa izikhali zokulunga ngesandla sokunene langesokhohlo;

⁸ ngodumo langehlazo, ngokuthukwa langokudunyiswa. Siyaphathwa njengabakhohlisi, kanti singabeqiniso;

⁹ njengabangaziwayo, kanti saziwa kakhulu; njengabafayo, kanti khangelani, sisekhona; njengabalaywa ngokuhlupheka, kanti kasibulawa;

¹⁰ njengabalosizi, kanti siyathokoza njalonjalo; njengabayanga, kanti sinothisa abanengi; njengabangelalutho, kanti silakho konke.

¹¹ Lina baseKorinte, sikhuluma ngokusobala kini, silivulela inhliziyo zethu;

¹² uba livinjelwe, kalivinjelwanga yithi, livinjelwe zinhliziyo zenu.

¹³ Linake, ukuze kube khona ukwenanana, sivuleleni inhliziyo zenu; ngikhuluma njengakubantwana.

UPawuli uxwayisa abakholwayo ukuba bangahlangani labangakholwayo

¹⁴ Lingazihlanganisi labangakholwayo, ngoba kulokuhlanganyela ngaphi ukulunga lokungalungi na? Kulokuhlanganyela ngaphi ukukhanya lomnyana na?

¹⁵ UKristu ulokuzwana ngaphi loBeliyali na? Ulesabelo bani okholwayo longakholwayo na?

¹⁶ Livumelana ngaphi ithempeli likaNkulunkulu lezithombe na? Ngoba thina silithempeli likaNkulunkulu ophilayo, njengokutsho kwakhe ukuthi: Ngizakuhlala labo, ngihambe phakathi kwabo; ngizakuba nguNkulunkulu wabo, bona babe ngabantu bami.

¹⁷ Ngakhoke phumani phakathi kwabo, lahlukane labo, kutsho iNkosi; lingathinti okungcolileyo; ng’khonake ngizakulamukela.

¹⁸ Ngizakuba nguYihlo wenu, lina libe ngamadodana lamadodakazi ami, kutsho iNkosi uSomandla.