2 AbaseKhorinte 5 - iBhayibhili Elingcwele 1978

¹ Ngoba siyazi ukuthi uba indlu yethu yasemhlabeni elidumba idilizwa, silesakhiwo esivela kuNkulunkulu esiyindlu engenziwanga ngezandla, engapheliyo esezulwini.

² Impela khathesi siyabubula, silangatha ukwambatha indlu yethu yasezulwini,

³ ukuze kuthi ngokwambatha yona singafunyanwa size.

⁴ Ngoba nxa sisekhona kulelidumba siyabubula, siyasindwa, ngoba kasifisi ukwambulwa kodwa ukwambathiswa, ukuze lokho okubhubhayo kuginywe yikuphila.

⁵ Owasenzela khona lokho nguNkulunkulu owasipha uMoya ube yisibambiso.

⁶ Ngakho simi isibindi ngesikhathi sonke, sisazi ukuthi nxa sisekhona emzimbeni sikhatshana leNkosi;

⁷ ngoba sihamba ngokukholwa, kasihambi ngokubona.

⁸ Ngithi simi isibindi, singathanda kakhulu ukwahlukana lomzimba, sibe sekhaya kanye leNkosi.

⁹ Ngalokhoke, loba sisekhaya loba singekho, sizimisele ukuyithokozisa.

¹⁰ Thina sonke simele ukuma phambi kwesihlalo sokuthonisisa sikaKristu, ukuze ilowo lalowo amukele njengalokhu akwenzileyo esemzimbeni, okuhle ingabe okubi.

Ukuphila okutsha okukuKristu. Inkonzo yokubuyisana

¹¹ Ngakhoke lokhu sikwazi ukwesaba iNkosi, siyabancenga abantu; kodwa thina sibonakalisiwe kuNkulunkulu; ngithemba ukuthi sibonakalisiwe lasenhliziyweni zenu.

¹² Kasizivezi futhi kini, kodwa silinika ithuba lokuzincoma ngathi, ukuze libe lakho okokuphendula labo abazincomayo ngokusemehlweni kungesikho okusenhliziyweni.

¹³ Uba sihlanya, kungenxa kaNkulunkulu; uba siqondile, kungenxa yenu.

¹⁴ Ngoba uthando lukaKristu luyasiqhubezela, sibona lokhu ukuthi munye owafela bonke; ngakhoke bonke sebafa.

¹⁵ Wafela bonke, ukuze abaphilayo bangabe besaziphilela, kodwa baphilele yena owabafelayo, wabuye wavuka.

¹⁶ Ngakhoke thina kasisayikuhlola umuntu ngokwabantu, lanxa sake samhlola uKristu ngokwabantu, kodwa khathesi kasisamhloli.

¹⁷ Uba umuntu ekuKristu, usedalwa kutsha; okudala sekudlule; khangela, sekuvele okutsha.

¹⁸ Konke lokhu kuvela kuNkulunkulu owabuyisana lathi ngoKristu, wasinika inkonzo yokubuyisana,

¹⁹ okuyikuthi uNkulunkulu wayekuKristu ebuyisana lomhlaba, engababaleli iziphambeko zabo, lokuthi wanika thina ilizwi lokubuyisana

²⁰ Ngakhoke siyizithunywa zikaKristu okuyikuthi uNkulunkulu uyalincenga ngathi; lathi siyalincenga esikhundleni sikaKristu sithi: Buyisanani loNkulunkulu.

²¹ Ongasazanga isono uNkulunkulu wamenza isono ngenxa yethu, ukuze kuye senziwe sibe yikulunga kukaNkulunkulu.