2 AbaseKhorinte 13 - iBhayibhili Elingcwele 1978

UPawuli ubaxwayisa engakafiki kubo

¹ Lokhu kungokwesithathu ukuza kwami kini; izindaba zonke zifanele ukuqiniswa ngemilomo yabofakazi ababili ingabe abathathu.

² Kulabo abonayo ngaphambili lakwabanye futhi ngiyaphinda ukuxwayisa kwami kwesibili, sengikutsho futhi ngingekho ukuthi ekufikeni kwami khathesi kangizukuba lasihawu,

³ njengoba lifuna ubufakazi bokuthi uKristu ukhuluma ngami. Yena kabuthakathaka ekuliphatheni kwakhe, kodwa ulamandla phakathi kwenu.

⁴ Ngoba lanxa ebuthakathakeni wabethelwa, kanti uyaphila ngamandla kaNkulunkulu. Lathi sibuthakathaka kuye, kodwa ekuliphatheni kwethu sizakuphila kanye laye ngamandla kaNkulunkulu.

⁵ Zihloleni lina, libone ukuba lisekukholweni yini; zihlolenike. Kanti kalazi hini ukuthi uJesu Kristu ukini na? Uba kungenjalo lingabangafanelanga.

⁶ Ngithemba ukuthi lizakwazi ukuthi thina kasisibo abangafanelanga.

⁷ Sikhuleka kuNkulunkulu ukuba lingenzi lutho olubi, kangitsho ukuthi ukuze sibonakale thina singabafaneleyo, kodwa ukuba lina lenze okulungileyo, loba thina kungathi sinjengabangafanelanga.

⁸ Ngoba kasilamandla okwenza ulutho olumelana leqiniso, kodwa silamandla uba simela iqiniso.

⁹ Siyajabula nxa sibuthakathaka thina, linake lilamandla. Esikukhulekelayo yikupheleliswa kwenu.

¹⁰ Ngiloba lezizinto ngingekho, ukuze kuthi nxa ngifikayo, ngingabi bukhali ekusebenziseni amandla iNkosi eyanginika wona, abe ngawokwakha, angabi ngawokubhidliza.

Isicino

¹¹ Elokucinake, bazalwane, salani kuhle; liphelele, lilalele ukuncenga kwami, lizwane, lihlale ngokuthula; uNkulunkulu wothando lowokuthula uzakuba lani.

¹² Bingelelanani ngokwanga okungcwele. Bonke abangcwele bayalibingelela.

¹³ Umusa weNkosi uJesu Kristu, lothando lukaNkulunkulu, lokuhlanganyela kukaMoya oNgcwele kakube lani lonke.