2 AbaseKhorinte 12 - iBhayibhili Elingcwele 1978

UPawuli wamukela izambulo kuJesu

¹ Kumele ukuba ngizincome lanxa kungasizi lutho; sengizakulandisa ngemibono langezambulo zeNkosi.

² Ngiyamazi umuntu ekuKristu, sekudlule iminyaka elitshumi lane, owahluthulwa wasiwa kwelesithathu izulu; loba wayesemzimbeni, loba wayengaphandle komzimba, kangazi, nguNkulunkulu owaziyo.

³ Yebo, ngiyamazi umuntu onjalo; loba wayesemzimbeni, loba wayengekho emzimbeni, kangazi, nguNkulunkulu owaziyo;

⁴ ukuthi wahluthulwa wasiwa eParadise, wezwa amazwi angakhulumekiyo, okungavunyelwa ukuba umuntu awakhulume.

⁵ Ngizakuzincoma ngonjalo, kodwa ngami uqobo kangiyikuzincoma, kuphela ngobuthakathaka bami.

⁶ Uba bengingathanda ukuzincoma, bengingazukuba yisithutha; ngoba bengizabe ngikhuluma iqiniso, kodwa ngiyakuyekela lokho, ngoba kangithandi ukuba umuntu acabange ngami okungaphezu kwalokho angibona ngiyikho lakuzwa ngami.

⁷ Futhi ukuze ngingaziphakamisi kakhulu ngobukhulu bezambulo, nganikwa ameva enyameni, isithunywa sikaSathane, ukungidutshuza, ukuze ngingaziphakamisi kakhulu.

⁸ Ngalokhoke nganxusa iNkosi kathathu ukuba asuswe kimi.

⁹ Kodwa yathi kimi: Umusa wami ukwanele; ngoba amandla ami apheleliswa ebuthakathakeni. Ngakhoke ngizakujabulela ukuzincoma ngobuthakathaka bami, ukuze amandla kaKristu ahlale phezu kwami.

¹⁰ Ngakhoke ngikholiwe yibuthakathaka, lokuhlekwa, lobunzima, lokuzingelwa, lokukhathazeka, ngenxa kaKristu; ngoba nxa ngibuthakathaka, kung’khona ngilamandla.

Ukusolwa kwakhe libandla kakukho eqinisweni

¹¹ Sengize ngaba yisithutha, kodwa yini elingicindezele kukho. Bekufanele ukuba ngivezwe yini. Ngoba kangisilele ngalutho kulabo abaphostoli abakhulu, loba ngingesilutho lwalutho.

¹² Impela impawu zobuphostoli obuqotho zenziwa phakathi kwenu ngokubekezela konke, langezibonakaliso, langezimangaliso, langemisebenzi yamandla.

¹³ Kambe lancitshwani kulamanye amabandla ngaphandle kokuthi mina uqobo kangibanga ngumthwalo kini na? Ngithethelelani lokhukuphosisa!

¹⁴ Sengilungele ukuza kini ngokwesithathu; kangizukuba ngumthwalo kini, ngoba kangifuni okwenu, ngifuna lina. Ngoba abantwana kabafanele ukudlinzekela abazali, kodwa abazali bafanele ukudlinzekela abantwana.

¹⁵ Minake ngijabulela kakhulu ukunikela konke, yebo, ngizinikela mina uqobo ngenxa yenu. Uba ngilithanda kakhulu, kanti mina ngifanele ukuthandwa kancinyane na?

¹⁶ Kangibanga ngumthwalo kini mina uqobo, kodwa lithi ngiyisihlakaniphi, ngalahlula ngobuqili.

¹⁷ Ngaliqilibizela yini ngomunye walabo engabathuma kini na?

¹⁸ Ngacela uTitosi ukuza kini, ngathuma kanye laye umzalwane; uTitosi waliqilibizela na? Kasihambanga ngoMoya munye langandlelanye na?

Izeluleko zokucina zikaPawuli kwabaseKorinte

¹⁹ Belikade licabanga ukuthi siyaziphendulela kini na? Atshi, thina besikhuluma phambi kukaNkulunkulu sikuKristu; konke kwenzelwa ukwakhiwa kwenu, bathandwayo.

²⁰ Ngilovalo lokuthi ekufikeni kwami mhlawumbe ngizakulifumana lingenjengalokho engikuthandayo, lami lingifumane ngingenjengalokho elikuthandayo. Ngilovalo lokuthi mhlawumbe kungaba khona ukuxabana, lomona, lokuthukuthela, lombango, lokuhleba, lokunyeya, lokuzazisa, leziphithiphithi.

²¹ Ngilovalo lokuthi ekufikeni kwami futhi uNkulunkulu wami angithobise phambi kwenu, ngililele abanengi abonileyo ngaphambili, abangaphendukanga kukho ukungcola lobufebe lamanyala abakwenzileyo.