2 AbaseKhorinte 11 - iBhayibhili Elingcwele 1978

Ukuziphendulela kukaPawuli ngomsebenzi wakhe

¹ Kungathi lingangibekezelela ebuthutheni obuyingcosana, yebo, ngibekezelelani.

² Ngilobukhwele ngani ngobukhwele obungobukaNkulunkulu, ngoba ngalendisela kuKristu ukuba ngilise endodeni eyodwa liyintombi emsulwa.

³ Kodwa ngilovalo lokuthi njengalokhu inyoka yamkhohlisa uEva ngobuqili bayo, ngokunjalo imicabango yenu mhlawumbe ingaduhiswa, iyekele ukuthembeka okuqotho kuKristu.

⁴ Ngoba uba kufika umuntu etshumayela omunye uJesu esingamtshumayelanga thina, loba lisamukela omunye umoya elingamamukelanga, loba elinye ivangeli elingalamukelanga, lilokubekezela okukhulu.

⁵ Ngithi kangisileli ngalutho kulabo abaphostoli abakhulu.

⁶ Loba ngingesiso isikhulumi, kangisweli ukwazi; sikubonakalisile lokho kini ngendlela zonke ezintweni zonke.

⁷ Kambe ngona yini ngokutshumayela ivangeli ngesihle kini, ngizithoba ukuba liphakanyiswe lina na?

⁸ Ngaphanga amanye amabandla, ngisamukela iholo kuwo, ukuze ngilisize lina.

⁹ Lalapho ngangikhona kini ngiswele, kangibanga ngumthwalo emuntwini, ngoba abazalwane abavela eMakedoniya bathwala inswelo zami. Kukho konke ngazimisela ukuba ngingabi ngumthwalo kini, futhi ngisezakuzimisela.

¹⁰ Njengalokhu iqiniso likaKristu likimi, kangiyikukwamukwa muntu lokhukuzincoma kwami endaweni zaseAkaya.

¹¹ Kungani na? Kungoba ngingalithandi na? UNkulunkulu uyazi ukuthi ngiyalithanda.

¹² Engikwenzayo ngizakukwenza futhi, ukuze ngibathathele ithuba labo abafuna ithuba lokuba bafunyanwe belingana lathi kulokho abazincoma ngakho.

¹³ Ngakho abanje bangabaphostoli bamanga, izisebenzi ezikhohlisayo ezizitshaya abaphostoli bakaKristu.

¹⁴ Kakumangalisi lokhu, ngoba uSathane uqobo uzitshaya isithunywa sokukhanya.

¹⁵ Ngakhoke kakusinto enkulu, uba izinceku zakhe zizitshaya izinceku zokulunga; ukuphela kwazo kuzakuba njengokwemisebenzi yazo.

¹⁶ Ngiyaphinda futhi ngithi: Kakungatsho muntu ukuthi ngiyisithutha; kodwa uba lingatsho njalo, ngamukelani njengaso, ukuze lami ngizincome kancinyane.

¹⁷ Lokho engikutshoyo kangikutsho ngokulaywa yiNkosi, kodwa ngikutsho njengesithutha, ngilesibindi sokuzincoma.

¹⁸ Lokhu abanengi bayazincoma ngokwasemhlabeni, lami ngizakuzincoma.

¹⁹ Ngoba lithanda ukuzibekezelela izithutha, lina lingabahlakaniphileyo!

²⁰ Liyabekezela, uba umuntu elenza izigqili, uba elidla, uba elibamba, uba ezikhukhumeza, loba elimakala.

²¹ Ngitsho ngilenhloni ukuthi thina besibuthakathaka! Kodwa kulokho umuntu alesibindi sokuzincoma ngakho, lapha ngikhuluma njengesithutha, lami ngilesibindi sokuzincoma ngakho.

²² BangamaHeberu na? Lami. BangabakoIsrayeli na? Lami. Bayinzalo kaAbrahama na? Lami.

²³ Bayizikhonzi zikaKristu na? Ngikhulumisa okohlanya, ngiyiso kakhulu mina kulabo bonke. Ngoba ngibe sekusebenzeni nzima kulabo, ngibe sekubotshweni kanengi kulabo, ngibe sekutshayweni okukhulu, ngaba sengozini zokufa ngezikhathi ezinengi.

²⁴ NgabaJuda ngatshaywa kahlanu imivimvinya engamatshumi amathathu leficamunwemunye.

²⁵ Ngatshaywa kathathu ngezinduku; ngakhandwa ngamatshe kanye; kathathu ngonakalelwa ngumkolo, ngandenda olwandle ubusuku bunye lemini.

²⁶ Ngangisekuhambeni kanengi; ngangisengozini zemifula, lasengozini zabaphangi, lasengozini kwabakithi, lasengozini kwabezizwe, lasengozini emizini, lasengozini enkangala, lasengozini olwandle, lasengozini kubazalwane bamanga.

²⁷ Ngangisekutshikatshikeni lekukhathazekeni, ngingalali insuku ezinengi; ngisekulambeni lasekomeni, kanengi ngizila ukudla, ngibulawa ngamakhaza ngihambaze.

²⁸ Langaphandle kwakho konke lokhu kukhona okungelekayo insuku zonke, ukukhathalela kwami wonke amabandla.

²⁹ Ngubani obuthakathaka ngingabi buthakathaka lami na? Ngubani okhubekiswayo ngingavuthi ngokuthukuthela na?

³⁰ Uba ngimele ukuzincoma, ngizakuzincoma ngezinto zobuthakathaka bami.

³¹ UNkulunkulu uYise weNkosi uJesu, obongekayo kuze kube nini lanini, uyazi ukuthi kangiqambi manga.

³² EDamaseko induna yenkosi uAretha yalinda umuzi waseDamaseko ukuba ingibambe;

³³ kodwa ngehliswa ewindini lomduli ngesilulu, ngaphepha ezandleni zayo.