2 AbaseKhorinte 10 - iBhayibhili Elingcwele 1978

UPawuli uyazivikela kwabamhlebayo

¹ Mina Pawuli uqobo ngiyalincenga ngobumnene langothando lukaKristu, mina engithobileyo nxa ngikhona phakathi kwenu, njengokutsho kwenu, kodwa engilesibindi nxa ngingekho.

² Ngiyalincenga ukuthi, nxa ngifikayo, kungadingeki ukuba ngibasukele ngesibindi engizimisele ukuba laso kwabanye abatshoyo ngathi ukuthi sihamba ngokomhlaba.

³ Ngoba lanxa sikhona emhlabeni kasilwi impi yasemhlabeni;

⁴ ngoba izikhali zokulwa kwethu kayisizo zasemhlabeni, kodwa zilamandla kaNkulunkulu okubhidliza izinqaba.

⁵ Sichitha inkani, lakho konke okuziphakamisela ukumelana lokumazi uNkulunkulu, lemicabango yonke siyithumbela ukumlalela uKristu;

⁶ futhi silungele ukutshaya ukungalaleli konke, nxa ukulalela kwenu sekuphelele.

⁷ Khangelani iqiniso eliphambi kwenu. Uba umuntu ezithemba yena ukuba ungokaKristu, kanakane ukuthi, njengoba yena engokaKristu, sinjalo lathi.

⁸ Loba ngingaze ngizincome ngaphezudlwana ngamandla ethu eyasinika wona iNkosi ukuba lakhiwe lingachithwa ngawo, kangiyikuyangeka.

⁹ Kangithandi ukuba kube njengokungathi ngiyalethusa ngencwadi zami.

¹⁰ Ngoba kuthiwa: Incwadi zakhe zinzima, zibukhali; kodwa nxa ekhona ngomzimba, ubuthakathaka, lokukhuluma kwakhe kudelelekile.

¹¹ Abanjalo kabanakane ukuthi lokhu esikutshoyo ngencwadi nxa singekho, sizakukwenza nxa sesikhona.

¹² Kasilasibindi sokuzilinganisa lokuzifanisa labathile babo abaziqhenyayo. Kodwa bona bazilinganisa omunye ngomunye bazifanisa bona uqobo lwabo, kabalakuqedisisa.

¹³ Kodwa thina kasiyikuzincoma ngokudlula indawo yethu, kodwa sizakuzincoma ngendawo uNkulunkulu asimisele yona ukuba ibe yindawo yethu, indawo ehamba ize ifike lakini.

¹⁴ Ngoba kasizeluli ngokweqileyo ngokungathi kasizanga sifinyelele kini, ngoba yithi abokuqala ukufika kini levangeli likaKristu.

¹⁵ Kasizincomi ngokudlulayo ngomsebenzi owenziwe ngabanye, kodwa silethemba lokuthi ngokukhula kokukholwa kwenu indawo yomsebenzi wethu izakukhuliswa phakathi kwenu,

¹⁶ size sitshumayele ivangeli lasendaweni ezingaphambili kwenu, singazincomi ngomsebenzi osuwenziwe endaweni yomunye.

¹⁷ Kodwa ozincomayo kazincome ngeNkosi.

¹⁸ Ngoba kasuye ozincomayo ovunywayo, kodwa yilowo onconywa yiNkosi.