2 AbaseKhorinte 1 - iBhayibhili Elingcwele 1978

Isibingelelo

¹ Mina Pawuli, umphostoli kaKristu Jesu ngentando kaNkulunkulu, loTimothi umzalwane, sithi kulo ibandla likaNkulunkulu eliseKorinte lakubo bonke abangcwele abakulo lonke elaseAkaya:

² Kakube kini umusa lokuthula okuvela kuNkulunkulu uBaba laseNkosini uJesu Kristu.

UPawuli ubonga uNkulunkulu ngenduduzo langokusiliswa kwakhe engozini

³ Kabongwe uNkulunkulu uYise weNkosi yethu uJesu Kristu, uYise wobubele, loNkulunkulu wenduduzo yonke,

⁴ osiduduza ekuhluphekeni kwethu konke, ukuze sibe lamandla okududuza abasekuhluphekeni ngenduduzo esiduduzwa ngayo thina nguNkulunkulu.

⁵ Ngoba njengalokhu izinhlupheko zikaKristu zandile kithi, ngokunjalo ukududuzeka kwethu kwandile ngoKristu.

⁶ Uba sihlupheka, kungenxa yokududuzwa lokusiliswa kwenu; uba siduduzeka, kungenxa yokududuzwa kwenu okuvezwa yikubekezelela inhlupheko esihlupheka ngazo lathi.

⁷ Ithemba lethu ngani liqinile, ngoba siyazi ukuthi njengalokhu lihlanganyela lathi ezinhluphekweni zethu, ngokunjalo lizakuhlanganyela kanye lathi enduduzweni yethu.

⁸ Sithanda ukuba lazi, bazalwane, ngokuhlupheka kwethu okwasehlela eAsiya, ngoba sasindwa kakhulu ngokungaphezu kwamandla ethu, saze saphelelwa lithemba lokusila.

⁹ Impela sazizwela thina ngokwethu ukuthi simiselwe ukufa, ukuze singazithembi thina, kodwa sithembe uNkulunkulu ovusa abafileyo,

¹⁰ owasophula ekufeni okungaka lozakusophula; sesithemba kuye ukuthi uzakusophula futhi.

¹¹ Lani limele ukusizana lathi ngokusikhulekela, ukuze umusa esiwuphiweyo nguNkulunkulu ngenxa yokukhuleka kwabanengi siwubongelwe ngabanengi.

¹² Ukuzincoma kwethu yilokhu, okuyibufakazi besazela sethu, ukuthi sahamba emhlabeni ikakhulu maqondana lani ngobungcwele langobuqotho, kungesikho ngokuhlakanipha komhlaba kodwa ngomusa kaNkulunkulu.

¹³ Ngoba kasililobeli okunye, kodwa lokho elikufundayo likuzwe; ngithemba futhi ukuthi lizakukuzwisisa,

¹⁴ njengalokhu seliqedisisile kancinyane ukuthi lingazincoma ngathi, njengalokhu lathi singazincoma ngani osukwini lweNkosi yethu uJesu.

UPawuli uchasisa isizatho sokungafiki kwakhe eKorinte

¹⁵ Ngenxa yalelithemba ngafisa ukuza kini kuqala, ukuze lithokoziswe kabili;

¹⁶ ngafisa ukudlula kini ngisiya eMakedoniya, ngibuye kini futhi sengivela eMakedoniya, ukuze lingidlulisele eJudiya.

¹⁷ Phoke, bengidlala yini nxa ngiqonde lokho na? Lokho engikumisayo ngikumisa ngokwendlela yabantu yini, ukuze kimi kube khona ukuthi: Yebo; lokuthi: Atshi?

¹⁸ Kodwa njengokuba uNkulunkulu ethembekile, ilizwi lethu kini kalisuye uYebo loAtshi.

¹⁹ INdodana kaNkulunkulu uJesu Kristu esatshumayela ngaye phakathi kwenu, mina loSilivanu, loTimothi, wayengesuye uYebo loAtshi, kodwa kuye kunguYebo.

²⁰ Zonke izithembiso zikaNkulunkulu zipheleliswe kuye, ngakhoke ngaye sithi: Ameni; kudunyiswe uNkulunkulu.

²¹ KunguNkulunkulu osiqinisayo kanye lani kuKristu, lowasikhethayo,

²² owabeka uphawu lwakhe kithi, wasinika uMoya wakhe enhliziyweni zethu ukuba yisibambiso.

²³ Mina ngibiza uNkulunkulu ukuba abe ngufakazi womphefumulo wami ukuthi ukungezi kwami eKorinte yikuba bengingathandi ukulihlupha.

²⁴ Kakusikho ukuthi sibusa ukukholwa kwenu, kodwa sisebenzela ukuthokoza kwenu kanye lani, ngoba liqinile ekukholweni.