1 USamuyeli 8 - iBhayibhili Elingcwele 1978

AbakoIsrayeli bafuna inkosi

¹ Kwathi lapho uSamuweli eseluphele wabeka amadodana akhe ukuba abe ngabahluleli koIsrayeli.

² Ibizo lendodana yakhe elizibulo lalinguJoweli, eleyesibili linguAbija; ayengabahluleli eBerisheba.

³ Amadodana akhe ayengahambi ngendlela zakhe, kodwa athanda inzuzo, amukela umvuzo wokuthengwa, ahlanekela izahlulelo.

⁴ Kwasekubuthana abadala bonke bakoIsrayeli, baya kuSamuweli eRama.

⁵ Bathi kuye: Khangela, usuluphele, amadodana akho kawahambi ngendlela zakho; ngakho sibekele inkosi isibuse njengazo zonke izizwe.

⁶ Kodwa leyonto kayimthokozisanga uSamuweli lapho besithi: Sinike inkosi ukusibusa. USamuweli wasekhuleka eNkosini.

⁷ INkosi yasisithi kuSamuweli: Lalela ilizwi labantu kukho konke abakutshoyo kuwe, ngoba kakusuwe abakwalayo, kodwa bala mina ukuba ngingabi yinkosi yabo.

⁸ Benza kuwe konke lokho abakwenza kimi, kusukela ekubakhupheni kwami eGibithe kuze kube lamhla; bangitshiyile bakhonza abanye onkulunkulu.

⁹ Lalela ilizwi labo; kodwa ubaxwayise kakhulu, ubatshengise indlela inkosi ezakubabusa ngayo.

¹⁰ USamuweli wabatshela abantu abacela kuye inkosi wonke amazwi eNkosi uNkulunkulu.

¹¹ Wathi kibo: Lezi zizakuba zindlela zenkosi ezalibusa; izathatha amadodana enu iwasebenzise enqoleni zayo zokulwa, iwenze abe ngabagadi bamabhiza ayo, lokuba agijime phambi kwezinqola zayo zokulwa.

¹² Izazibekela kiwo izinduna zezinkulungwane lezinduna zamatshumi amahlanu, amanye azalima amasimu ayo, avune amabele ayo, enze izikhali zayo zempi lempahla yezinqola zayo zokulwa.

¹³ Izathatha amadodakazi enu iwenze abe ngabathaki bamakha, labapheki, labaphekizinkwa.

¹⁴ Izazithathela amasimu enu, lezivini zenu lezivande zenu zamaoliva ezinhle, ikunike izinceku zayo.

¹⁵ Izazithathela okwetshumi kwamabele enu lokwezivini zenu, ikunike izinduna zayo lezinceku zayo.

¹⁶ Izazithathela izinceku zenu lezincekukazi zenu lenkomo zenu ezinhle lobabhemi benu abahle, izisebenzise emsebenzini wayo.

¹⁷ Izazithathela okwetshumi kwemfuyo yenu, lina libe yizigqili zayo.

¹⁸ Ngalolosuku lizakhala ngenxa yenkosi yenu elizikhethele yona; kodwa iNkosi uNkulunkulu kayiyikuliphendula mhlalokho.

¹⁹ Kodwa abantu bala ukulilalela ilizwi likaSamuweli, bathi: Atshi, sifuna ukuba sibe lenkosi,

²⁰ ukuze lathi sibe njengezizwe zonke, inkosi yethu isibuse, isikhokhele empini, ilwe izimpi zethu.

²¹ Kwathi lapho uSamuweli esewazwile wonke amazwi abantu, wawalandisa eNkosini.

²² INkosi yathi kuSamuweli: Lalela ilizwi labo, ubabekele inkosi. USamuweli wasesithi ebantwini bakoIsrayeli: Hambani liye emizini yenu.