1 USamuyeli 30 - iBhayibhili Elingcwele 1978

UDavida uchitha amaAmaleki

¹ Ngosuku lwesithathu uDavida labantu bakhe bafika eZiklagi. AmaAmaleki ayehlasele iNegebi leZiklagi; alichitha iZiklagi, alitshisa ngomlilo,

² athumba abesifazana labo bonke ababephakathi kwalo, abakhulu labancinyane; kawabulalanga muntu, kodwa abathatha, ahamba.

³ Lapho uDavida labantu bakhe befika emzini, bawufica usutshisiwe ngomlilo; omkabo, lamadodana abo lamadodakazi abo sebethunjiwe.

⁴ UDavida labantu ababelaye badazuluka, bakhala baze behluleka ukukhala.

⁵ OmkaDavida bobabili labo babethunjiwe, uAhinowama waseJezereli loAbigayili umkaNabali waseKarmeli.

⁶ UDavida wahlupheka kakhulu; ngoba abantu bebekhuluma ngokumkhanda ngamatshe, ngoba inhliziyo zabo bonke zazidabukile ngenxa yamadodana lamadodakazi abo. Kodwa uDavida waziqinisa ngeNkosi uNkulunkulu wakhe.

⁷ UDavida wasesithi kuAbiyatha umpristi indodana kaAhimeleki: Akungilethele ingubo yamahlombe. UAbiyatha waseyiletha ingubo yamahlombe kuDavida.

⁸ UDavida wasebuza eNkosini uNkulunkulu esithi: Ngixotshane lalo leloxuku na? Ngingalifica na? Yamphendula yathi: Xotshana lalo, ngoba uzalifica impela, ubakhulule bonke.

⁹ Ngakhoke uDavida wasehamba, yena labantu abangamakhulu ayisithupha ababelaye, bafika esifuleni iBesori lapho abanye basala khona.

¹⁰ Kodwa uDavida labantu abangamakhulu amane baqhubekela phambili; abangamakhulu amabili abasebekhathele kakhulu basala emuva, kabasiwelanga isifula iBesori.

¹¹ Bafica umGibithe emmangweni; bamletha kuDavida, bamnika ukudla, wadla, bamnathisa lamanzi.

¹² Bamnika lesinkwa somkhiwa lamahlukuzo amabili ezithelo zevini ezomisiweyo. Kwathi esedlile waqaqabuka, ngoba wayengadlanga lutho, enganathanga manzi insuku ezintathu lobusuku obuthathu.

¹³ UDavida wambuza wathi: Ungokabani na? Uvela ngaphi na? Yena wathi: Ngiyinsizwa yaseGibithe, inceku yomAmaleki; inkosi yami ingitshiyile ngoba sengilensuku ezintathu ngigula.

¹⁴ Besihlasela iNegebi yamaKerethi, lengxenye yakoJuda, leNegebi yakoKalebi; satshisa iZiklagi ngomlilo.

¹⁵ UDavida wasesithi kuye: Ungangisa kuleloxuku na? Yena wathi: Funga kimi ngoNkulunkulu ukuthi kawuyikungibulala, kawuyikunginikela enkosini yami; ngizakukusa kuleloxuku.

¹⁶ Wasemusa khona, babafumanisa begcwele indawo yonke, besidla, benatha, bethokozela impango enkulu ababeyithumbile elizweni lamaFilistiya lelakoJuda.

¹⁷ UDavida wababulala kusukela ekuseni kwaze kwakusihlwa, waphinda langosuku olulandelayo. Kakuphunyukanga muntu, kuphela insizwa ezingamakhulu amane, ezagada amakamela zabaleka.

¹⁸ UDavida wakhulula bonke ababethunjiwe ngamaAmaleki kanye labomkakhe bobabili.

¹⁹ Kakusilelanga muntu omncinyane lomkhulu, indodana loba indodakazi, impango loba okunye okwakuthunjiwe; uDavida wakuthatha konke.

²⁰ UDavida wathumba zonke izimvu lenkomo. Abantu baziqhuba inkomo phambi kwakhe besithi: Yimpango kaDavida le.

²¹ UDavida wafika kulabobantu abangamakhulu amabili ababekhathele kakhulu abehluleka ukumlandela, basala esifuleni iBesori; baphuma ukumhlangabeza yena labantu ababelaye. Lapho uDavida esondela kubo, wababingelela.

²² Kodwa bonke abantu ababi labonakeleyo phakathi kwabantu ababehambe loDavida bathi: Njengoba bengahambanga lathi, kasiyikubanika lutho empangweni esiyithumbileyo, kuphela nje ukuba leyo laleyondoda ithathe umkayo labantwana bayo, ihambe.

²³ Kodwa uDavida wasesithi: Kaliyikwenza njalo; ngoba khumbulani lokho esikuphiwe yiNkosi uNkulunkulu, lokuthi yasilondoloza, yanikela ezandleni zethu ixuku elasihlaselayo.

²⁴ Ngubani ozalilalela kulindaba na? Isabelo salowo oya ekulweni sizafanana lesabelo salowo osala empahleni; bazakwabelwa ngokulinganayo.

²⁵ Kusukela mhlalokho kusiya phambili wakumisa lokhu, kwaba yisimiso lomthetho koIsrayeli kuze kube lamuhla.

²⁶ UDavida esefikile eZiklagi, wathumela enye impango kwabadala bakoJuda lakubangane bakhe, wathi: Nanso isiphiwo senu esivela empangweni yezitha zeNkosi uNkulunkulu.

²⁷ Wayithumela kwabaseBetheli, labaseRamothi laseNegebi, labaseJatiri,

²⁸ labaseAroweri, labaseSifimothi, labaseEshitemowa,

²⁹ labaseRakali, labasemizini yamaJerameli, labasemizini yamaKeni,

³⁰ labaseHorma, labaseBorashani, labaseAthaki,

³¹ labaseHebroni; lasendaweni zonke lapho uDavida labantu bakhe babejwayele ukuhamba khona.