1 USamuyeli 29 - iBhayibhili Elingcwele 1978

UDavida uxotshwa ngamaFilistiya

¹ AmaFilistiya abuthanisa zonke izimpi zawo eAfeki; abakoIsrayeli babemise ngasemthonjeni waseJezereli.

² Lapho izikhulu zamaFilistiya zidlula lamabutho azo ngamakhulu langezinkulungwane, uDavida labantu bakhe babesekucineni kwamabutho loAkishi.

³ Izinduna zamaFilistiya zathi: LamaHeberu enzani lapha na? UAkishi wathi kuzo induna zamaFilistiya: Lo nguDavida, inceku kaSawuli inkosi yakoIsrayeli, osehlale lami umnyaka munye lokwedlulayo. Kangifumananga lutho olubi kuye selokhu wabalekela kimi kuze kube lamuhla.

⁴ Kodwa induna zamaFilistiya zamthukuthelela uAkishi, zathi kuye: Mbuyisele lumuntu emzini owambeka kiwo. Kayikuhamba kanye lathi ukuyakulwa, funa asiphendukele empini abe yisitha sethu. Yiyiphi indlela angabuyisana ngayo lenkosi yakhe ngaphandle kwaleyo eyokusibulala na?

⁵ Lo kasuye uDavida yini abahlabelela ngaye begida besithi: USawuli ubulele izinkulungwane, kodwa uDavida ubulele inkulungwane ezingamatshumi?

⁶ UAkishi wasebiza uDavida wathi kuye: Ngifunga iNkosi, wena ungumuntu oqotho; ukusebenza kwakho emabuthweni ami kube kuhle kimi. Kangifumanisanga lutho olubi kuwe kusukela osukwini lokufika kwakho kimi kuze kube lamuhla; kodwa kuzo izikhulu zamaFilistiya kawufuneki.

⁷ Ngakho buyela ekhaya ngokuthula, ukuba ungathukuthelisi izikhulu zamaFilistiya.

⁸ UDavida wathi kuAkishi: Hawu, ngenzeni na? Ufumeneni encekwini yakho, kusukela osukwini engaqala ngalo ukukusebenzela kuze kube lamuhla, ukuba ngingayikulwa lezitha zenkosi yami na?

⁹ UAkishi wamphendula uDavida wathi: Ngiyazi ukuba ulungile kimi, unjengesithunywa sikaNkulunkulu; kodwa izinduna zamaFilistiya zithe: Kayikuhamba lathi ukuyakulwa empini.

¹⁰ Ngakhoke ubovuka ekuseni kusasa kanye lenceku zenkosi yakho ezifike lawe, lisuke ekuseni sekukhanya, lihambe liye endaweni engilinike yona; lingacabangi imicabango emibi, ngoba kimi ulungile.

¹¹ UDavida wasuka ekuseni kakhulu labantu ababelaye, babuyela elizweni lamaFilistiya. AmaFilistiya aya eJezereli.