1 USamuyeli 28 - iBhayibhili Elingcwele 1978

¹ Ngalezonsuku amaFilistiya abutha izimpi zawo ukuba alwe loIsrayeli. UAkishi wathi kuDavida: Yazi ukuba wena labantu bakho lizaphuma impi lami.

² UDavida wathi kuAkishi: Kulungile, uzabona ukuthi inceku yakho ingenzani. UAkishi wasesithi kuDavida: Kulungile, ngizakukubeka ube ngumlindi wekhanda lami kokuphela.

USawuli lowesifazana oledlozi eEndori

³ USamuweli wayesefile; bonke abakoIsrayeli babemlilele, bamngcwabela eRama emzini wakibo. USawuli wayebaxotshile elizweni bonke abalamadlozi labathakathi.

⁴ AmaFilistiya abuthana ayamisa eShunemi. USawuli wabutha wonke uIsrayeli, bamisa eGilibowa.

⁵ Lapho uSawuli ebona impi yamaFilistiya, watshaywa luvalo, wathuthumela kakhulu.

⁶ Lapho uSawuli ebuza eNkosini, iNkosi kayimphendulanga langamaphupho langenkatho iUrimi langabaprofethi.

⁷ USawuli wasesithi encekwini zakhe: Ngidingelani owesifazana oledlozi ukuze ngiye kuye, ngibuze kuye. Inceku zakhe zathi kuye: Kukhona owesifazana oledlozi eEndori.

⁸ USawuli wazifihla, wagqoka ezinye izigqoko, wahamba lamadoda amabili; bafika kowesifazana ebusuku. Wathi: Akungivumisele ngedlozi, ungikhuphele engizamutsho kuwe.

⁹ Owesifazana wathi kuye: Impela uyazi ukuba uSawuli wenzeni, ukuthi ubaqedile elizweni abalamadlozi labathakathi. Pho, ungithiyelani ukuba ungibulale na?

¹⁰ Kodwa uSawuli wafunga iNkosi kuye, wathi: Ngifunga iNkosi, kawuyikuba lacala ngalokho.

¹¹ Owesifazana wasesithi: Ngikukhuphele ubani na? Wathi: Ngikhuphela uSamuweli.

¹² Lapho owesifazana embona uSamuweli, waklabalala, wathi kuSawuli: Ungikhohliseleni na? Ngoba unguSawuli wena.

¹³ USawuli wathi kuye: Ungesabi; ubonani? Owesifazana wathi kuSawuli: Ngibona unkulunkulu ephuma phansi.

¹⁴ USawuli wathi kuye: Unjani? Waphendula wathi: Kuphuma ixhegu elembethe ingubo. USawuli wasebona ukuthi nguSamuweli; wathi mbo ngobuso bakhe phansi, wakhuleka.

¹⁵ USamuweli wasesithi kuSawuli: Ungikhathazeleni ngokungikhupha na? USawuli waphendula wathi: Ngiyahlupheka kakhulu; amaFilistiya alwa lami, loNkulunkulu usengifulathele, kasangiphenduli ngabaprofethi langamaphupho. Ngakhoke ngikubizile ukuba ungitshele ukuthi ngenzeni.

¹⁶ USamuweli wathi: Pho, ubuzelani kimi, lokhu iNkosi isikufulathele, yaba yisitha sakho na?

¹⁷ INkosi isikwenzile kuwe lokho eyakutsho ngami; ikuhluthunele umbuso, yawunika omunye umuntu, uDavida.

¹⁸ Kawulilalelanga ilizwi leNkosi, futhi kawukwenzanga lokho okolaka lwayo olutshisayo kumaAmaleki; ngakhoke iNkosi yenzile lokhu kuwe lamuhla.

¹⁹ Futhi iNkosi izanikela uIsrayeli kanye lawe kumaFilistiya; kusasa wena lamadodana akho lizakuba lami. Impela iNkosi izanikela impi yakoIsrayeli kumaFilistiya.

²⁰ USawuli wasedilikela phansi, walala wathi daca emhlabathini, wesaba kakhulu ngenxa yamazwi kaSamuweli. Wayengaselamandla ngoba wayengadlanga lutho usuku lonke lobusuku bonke.

²¹ Owesifazana wasesiya kuSawuli, wabona ukuba wethukile kakhulu, wathi kuye: Incekukazi yakho ililalele ilizwi lakho, ngingenisile ukuphila kwami engozini, ngalalela lokho okukhulume kimi.

²² Ngakhoke lawe akulalele ilizwi lencekukazi yakho; ngikunike isinkwa ukuba udle, ukuze uzuze amandla okuhamba indlela yakho.

²³ Kodwa wala wathi: Kangiyikudla. Kodwa zamcindezela inceku zakhe kanye lowesifazana; waselalela amazwi abo. Wasesukuma phansi, wahlala embhedeni.

²⁴ Owesifazana wayelethole elinonileyo ekhaya; walihlaba masinyane; wathatha impuphu, wayixova, wenza isinkwa esingelamvubelo,

²⁵ wasibeka phambi kukaSawuli lenceku zakhe; badla. Basuka bahamba ngalobobusuku.